Read Yimchungru Naga Isa 20 Bible Online

Isa 20 - Yimchungru Naga bible

Isa 20

¹Asiria kiulongthsüpuh Sargonnü athiyikhi, akube-limthobuh ju Ashdod ching arü tüsho ju bede keochihbah alukhi kam ching —

²ju kim ching ATUNGPUHNÜ Amoz tsührü Isaia ki asukde tha, “ Yüang, tüsho nü chim kheaknü shungliukhimbo trünang tüsho nü jing chingnü jingkhümpü yihkhitang,” tüsho apinü ju ruk bünkeang tsahde tüsho jing keangkeangnü yüla arüla de tsah.

³Judüki ATUNGPUHNÜ tha, “ I yamlarü Isaianü Ijip tüsho Ethiopia azhihkhi amütsan bünkeang tüsho jing keangkeang kam mahsam tsahkhi nangde,

⁴Asiria kiulongthsüpuhnü Ijiprü aramrü thsüde tüsho Ethiopiarü ramtsorü thsüde bede atsobah, ane chido athunu tüsho shinbeshinbuh, bünkeang tüsho jing keangkeang, kiung aleangkheaknü, Ijip kheak achih hande arübah.

⁵Tüsho arünü arü mulonglamkhi Ethiopia tüsho arü kükheangkhi Ijip dünkheaknü trede achih ngübah.

⁶Ju nimung ching ha keyean larübonü athabah, ‘ Kheahang, shepü kheak isanü mulonglamkhea tüsho arung thsungkheak yükhea tüsho Asiria kiulongthsüpuh kheaknü khümkhitpü kheak tümü dünjia la! Küde thsah isa tsokhitba?’ ”