Read Yimchungru Naga Isa 21 Bible Online

Isa 21 - Yimchungru Naga bible

Isa 21

¹Keto sunglo dünkheak müchityu. Negeb ching chitmühean yünkhi nangde, ha loshelo chingnü, atrebe lomi khülang chingnü arüchoh.

²I ki michih amuthsuk thaa lah; mülapyukrünü mülapyukchoh, tüsho athsümünimrünü thsümünimchoh. Wutuang, O Elam, yandoang, O Midia; anihbenü thsünüshihkhi alala inü akheam thsüshihbah.

³Jumonü I chimbo atukkhinü mido; athsükhinü I tholodo, aliberü zübechoki thsünükhi nangde; inü asochoki I lümthsünüdo, inü ju ngüchoki I mulong keahkhiabahdo.

⁴I lümkhi heanchoh, atrebenü I müyinsahshihdo; inü mürheangde alakhi shuhyini I thsungkheaknü ajanpü kamdo.

⁵Arünü dükhüm kheanga zochoh, arünü sangbün-nüpnüp khima zochoh, arünü tsühchoh, arünü yungchoh. Asürang, limthorübo, tsungbo müdangke lünang!

⁶Tümüde ATUNGPUHNÜ I ki ha thachoh: “ Yüang, aheangrü zhipshang, apinü tümü ngübanü thiyusheak jihshang.

⁷Küyimki apinü khoraberü ngüba, khoraberü mahnene, donkibo kheak aberü, kemelbo kheak aberü, apinü düshihde anishang, khide düshihde.”

⁸Judüki aheangrünü zhi: “Aheangpung kheak I zhiplah, O ATUNGPUH nimung aban mutukzhakde, tüsho I aheangpung ching I tsüngreroro lah.

⁹Kheahang, ju ching arü arüchoh, khoraberübo, khoraberü mahnene!” Tüsho apinü thalo, “Babilon lungdo, lungdo; tüsho anihbe sangthsü thrünpuhbo alala alo kheak keamthünaka yaplah.”

¹⁰O I mihtsürü, anitkhi tüsho athripkhi, tümü Wuto ATUNGPUH Israel Thrünpuh kilimnü inü asokheanü inü nüsa ki zhichoh.

¹¹Edom dünkheak müchityu. Khülangnü Seir chingnü I ki jichoh, “Aheangbuh, tsüngre künangde ahoba? Aheangbuh, tsüngre künangde ahoba?”

¹²Aheangbuhnü tha: “ Yapsu arüchoh, tüsho azhing she arüchoh. Nünü akeokhipü lasho, keokhiang; alode arang.”

¹³Loshelo dükhün dünkheak müchityu. Sangrung lakhi loshelo dükhün ching nüsa binkheambah, O Dedanrü hantsahrübo.

¹⁴Kethürirü kilim ke handarang, yikhap lubah tsotsahrü shoruang, O Tema lomi ching larübo.

¹⁵Tümüde arübo nukshang chingnü, nukshang dukkhitkhi chingnü, sanglüh hünkihkhi chingnü, tüsho atrebe keochih chingnü tsokhichoh.

¹⁶Tümüde ATUNGPUHNÜ I ki ha thado: Muloa rhimorü khülang kambo yande, kam khülang dükeaknü Kedar müretahkhi alala arün thsübah;

¹⁷tüsho Kedar thirithsürü sanglühbo aningkhi nükde alabah; tümüde ATUNGPUH , Israel Thrünpuhnü asukdo.