Read Yimchungru Naga Isa 22 Bible Online

Isa 22 - Yimchungru Naga bible

Isa 22

¹Jindükhün michih dünkheak müchityu. Nüsa alala, thüyam kumung wutukhi ha tümü a,

²nüsa azhikhinü mide larü, arhunganimkhi kiuto, asühachihkhi kiuto? Nüsa shekhi ju nukshangnü alaksahkhi yung, yungsho arübo keochih ching shekhi yung.

³Nüsa yo yakzanshuhrübo alala rukhühnü tsodo; arübo sanglüh mushuhde ramdo. Arübo limshu ching shande lalashe angükhitrübo ramdo.

⁴Jumonü inü tha: I kheaknü anguhde tsoang, inü tripdüsükde tripanü; inü muzhokhi mihtsürübo dükheakkhi thsungkheak I düshukheam.

⁵Tümüde Wuto ATUNGPUH Thrünpuh nimung khülang arhunganim tüsho junakpü tüsho yingyingrara michih jindükhün ching lah, rhübo kingkheamdo tüsho arung thsungkheak zhikhi awungbo ching lah.

⁶Elamnü khora-lolungbe tüsho khorabo kheak, hühzopung hanlah tüsho Kirnü tsung thsakhamlah.

⁷Nüsanü amokhitkhi jindükhünbo khora-lolungbenü mide alakheah, tüsho khoraberü nü chipiripit ki zhip.

⁸Apinü Juda tsunglobe lude tsodo. Ju nimung nünü Murungto Yam ching thsühnukbo kheah,

⁹tüsho nünü David kiuto ching akeamthünakkhi ahihdo ngü, tüsho nünü abobe kekhip ching ke dükimmukhung.

¹⁰Nünü Jirusalem yambo khedo, tüsho chipi ayünpü nünü thüyambo lukkheam.

¹¹Nünü chipi mahne dükeak awün kekhip ke zopung kekung khülang thsü. Tüshe shepünü ju rhimokheanü nünü api kilim mükheah, yungsho adüso shepünü ha lümkhi thsükheanü api kheak akinashu müjih.

¹²Ju nimung ching Wuto Atungpuh THRÜNPUHNÜ atrippü tüsho atüzhopü, ku hütpü tüsho shungliukhim phuyupü jikheah;

¹³tüshe ju müthri asühachih tüsho thünio lakheah, moshipung tüsho namfimihnu laksahde, shih tsühde tüsho yukhu yungde la. Nüsanü tha, “ Isanü tsühanü tüsho yunganü, tümüde shido isa ashebah.”

¹⁴Wuto ATUNGPUHNÜ I nükhün ching huhdo: Tsükjide nüsa müsheyi khiungde ha amülim neak mübahjih, Wuto Atungpuh THRÜNPUHNÜ thachoh.

¹⁵Wuto Atungpuh THRÜNPUHNÜ ha thachoh: Arang, ha khinkihthsübuh Shebna, yambuk ching aputungpuh kilim yüang, tüsho api ki thaang:

¹⁶Nü ha ching tümü alim la? Ha ching keoniorü sherü a, junangde ha achang ching nü kiuyuk kiupü tüsho lung ching nü lapung kheancho?

¹⁷ATUNGPUHNÜ nü rüp jipyuka bahpü lah, O sühmüh lakhi mihtsürü. Apinü nü düngde ramlobah,

¹⁸nü ju mükamde hita bahbah, tüsho amülih lomi khülang ching athulung khülang nangde jipa bahbah; ju ching nü ashebah, tüsho ju ching nü kükheangkhi khora-lolungbe yapbah, nünü nü putungrü achih ngüshihchoh!

¹⁹Inü nü rhimoyam chingnü nimkhita bahbah, tüsho nü binpung chingnü thokhia bahbah.

²⁰Ju nimung Hilkia tsührü I yamlarü Eliakim inü ajibah,

²¹tüsho api kheak nü yo shulünkhim phukihbah tüsho api kheak nü chimrümbe rümjihbah. Inü nü hahmülang api khah ching jihbah, tüsho api ju Jirusalem ching larü tüsho Juda yamkhün ching abuh khülang labah.

²²Inü api dubuh kheak David yamkhün yo mükhipmürabe yihkihjihbah; junangde apinü akhimshuhbah, tüsho shenü mürih; tüsho apinü arihbah, tüsho shenü mükhimshuh.

²³Inü api adüküng dangpung ching müzam nangde müsüma zobah, tüsho api jipürü yamkhün ching api wüntre lakhi kiulongthsü-binkiu khülang kambah.

²⁴Tüsho arünü api kheak api jipürü yamkhün hahmülang alala, tsührü tüsho münü, pungphuru aninibo, pungbonü keluhbo khiungde wuh-a zhinbah.

²⁵Wuto ATUNGPUHNÜ thachoh, Ju nimung adüküng dangpung ching müzam müsümkhi aniukkhia bahbah, tüsho ju kheak ajapkhi hah dükheakbah, tümüde ATUNGPUHNÜ asukdo.