Read Yimchungru Naga Isa 26 Bible Online

Isa 26 - Yimchungru Naga bible

Isa 26

¹Ju nimung ha khün Juda lomi ching thsübah: Isa kiuto amüküp lah; apinü rhü tüsho chipi tsunglochoh.

²Chipiripitbo khimshuhang, junangde thiyuro-lungki trükshihbo akin larünü ayüzahbah.

³Sherü lümkhi dükünglanü nünü mungtsü ching zochoh — tümütüsho arünü nü kheak kinchoh.

⁴Lünnü ATUNGPUH kheak kinang, tümüde Atungpuh T H RÜ NPU H ju akheam mülakhi Lung ah.

⁵Tümüde apinü achang kheak larübo thokheamdo; adüküng kiuto apinü keamkhishih. Apinü alo kheak yapshih, asungthulung ching bahdo.

⁶Jingnü judodo, junoa larü jingnü, zhochihrü jingdükünü.

⁷Thiyuro-lungki limro arihlah; O Thiyuro labuh Khülang, nünü thiyuro-lungki limro arihde kamshih.

⁸Nü mahkhapkhi limro ching, O ATUNGPUH , isanü nü aleanglah; nü mung tüsho nü mungthu menü künde lah.

⁹I menü nü thsungkheak azhing ching mürheangchoh, I kheak lakhi menü künsahde nü yimchoh. Tümüde küyimki nü mahkhapkhi alomi ching labanü, alomiküp ching larübonü thiyuro-lungki anikhitchoh.

¹⁰Mihbukmuyuk ki amuzho huhsho, arünü thiyuro-lungki mümükheah; alungki lakhi lomi ching arünü bephülapchoh tüsho ATUNGPUH wüntre-müretah mükheah.

¹¹O ATUNGPUH , nü khah shuhkihlah tüshe arünü ju müngü. Nünü nü mihtsürü thsungkheak mulong jihkhi arünü ngüshang tüsho achihshang. Nü azhihrü monü arü aniuabahshang.

¹²O ATUNGPUH , nünü isa thsungkheak mungtsü lashihbah, atsütsü, isanü arhimokhi alala, nünü isa thsungkheak rhimokheah.

¹³O ATUNGPUH isa Thrünpuh, nü hobah püpü atungrünü isa kurungkheak yakzan shuhdo, tüshe isanü nü mung lang mütsanlah.

¹⁴Asherü a rhangdung müla; mebo masürü — tümütüsho nünü arü thsümüchi tüsho thsümünim tüsho arü lümkhitpü alala dükheakshih.

¹⁵Tüshe nünü trükshih alü kamshih, O ATUNGPUH , nünü trükshih alü kamshih; nü müretahdo; nünü lomi aredung alala jakihshihdo.

¹⁶O ATUNGPUH , lümthsünü ching arünü nü yim, nünü arü thsümüchichoki arünü nü ki tamkhüntamnü.

¹⁷Pang makeangkhi azoberü kim khiungchoki, anihbe thsünü ching chinphülapde akhungkhi nangde nü miki isa she alakheah O ATUNGPUH ;

¹⁸isa khungarü hanbah thsünüde alakheah, tüshe isanü apung lang zübedo. Isanü alomi kheak tümü akuk müngü, tüsho sheshe alomiküp ching lapü müzübe.

¹⁹Isa mihtsürü shea larü arhang kamlobah, arü mibo asürübah. O asungthulung ching larübo, asürang tüsho asühachihkhi khün thsang! Tümüde nü yo ayinke ju yapsu ayinke nangde lah, tüsho alominü shea larü yankhitbah.

²⁰Arang, I mihtsürü, nü yo khiungshak ching yüzahang, tüsho nü dunglim ripitbo rihang; bukakhiukkhi muhoyi khiungde anükhühkheak nü jikang.

²¹Kheahang, alomi ching larübo arü amülim dün thsümüchipü ATUNGPUH api lapung chingnü akhiukchoh; alominü nihbe kheak thiyih bukkhi yihkhita huhbah, tüsho kheaküa alaksahkhi mülüpdo.