Read Yimchungru Naga Isa 29 Bible Online

Isa 29 - Yimchungru Naga bible

Isa 29

¹Ah, Ariel, Ariel, David binkheampung kiuto! Kamnü kam yukajakang; thüniobonü mükamshang.

²Tütüshe inü Ariel lümthsünü jihbah, tüsho ju ching mitripkhi tüsho atüzhokhi labah, tüsho alibe ju I ki Ariel nangde alabah.

³Inü nü azhihde alala mükamde abinkhambah; inü aheangsadam thsüde nü yanbah tüsho nü azhihde ayanpü rhimobah.

⁴Judüki alo asük chingnü nünü athabah, asungthulung abobe chingnü nü yubo akhiukbah; nü düsheak alo chingnü me düsheak nangde arübah, tüsho nü yu thakhi asungthulung chingnü amütkhitbah.

⁵Tüshe nü riri boto ju asungthulung shimshim nangde alabah, tüsho bukmüke yakzanshuhrü boto ju hitsüt phinkhi nangde alabah. Tüsho amülümkhi, zukleangnü,

⁶Wuto ATUNGPUHNÜ tsüngmukde tüsho muliuyuk züngde tüsho atonü alande, chitmühean tüsho chinthrüm, tüsho aniuabahbe motru hode nü rhuakheahbah.

⁷Tüsho Ariel azhihde thirithsüpü trükshih boto alala, anihbe tüsho chipi azhihde thirithsüpü alala tüsho anihbe lümthsünü jihrü, milim khülang, tüsho are michih khülang nangde alabah.

⁸Khümsahde alakhi mihtsürünü yimtsühde mibah ju ruk lang khümde asürükhi ruk, yungsho kethüri mihtsürünü ke yungde mibah ju ruk lang thüride, sühkeakeade asürükhi ruk, junangde Zion bede thirithsürü trükshih boto alala labah.

⁹Nüsa makhaang tüsho zhazhade kamang, nüsa mük yihdoang tüsho tukang! Müshangang, tüshe yukhunü yung; yingyingang, tüshe amüshangbenü yung!

¹⁰Tümüde ATUNGPUHNÜ nüsa kheak yapnekudobe me dungkihdo; nüsa wukihrübo, apinü nüsa mük yihdojihdo, tüsho nüsa angürübo, nüsa kubo muhiujihdo.

¹¹Ha michih alala nüsa thsungkheaknü ayümdokhi mütsanhüm yubo nangde kamdo. Ha akhekhukrü ki, “Ha kheang” de thiyukhüm jihsho, apinü thachoh, “ Inü mükhekhuk, tümüde ha yümdoa lah.”

¹²Tüsho ha amükhekhukrü ki, “Ha kheang” de jihde thasho, apinü thachoh, “ Inü mükhekhuk.”

¹³ATUNGPUHNÜ tha: Tümütüsho harü mihtsürünü arü münnü phünide arüchoh tüsho arü münküpnü I wüntrechoh, tüshe arü mulong a I kheaknü limshulah, tüsho arü kingaünkhi ju mihtsürü yukhüm lümkangyunü anikhitkhi lah;

¹⁴jumonü ha mihtsürü kheak niuknimde amüyinsahbe rhimobah. Arü lümlung larü lümkhi dükheakbah, tüsho lümlung anikhitpü lakhi ramabahbah.

¹⁵Are! Nüsa sherünü ATUNGPUH kheaknü limshude lümkhi khide sükde ramcho, shepü rhimobo amiting ching la, tüsho shepünü thacho, “Shenü isa ngüla? Shenü isa mükheahla?”

¹⁶Nüsanü kimkethürü niukphülapchoh! Phühdamrü ju alo nangde khejihbea de? Kukruknü athsübuh ki, “Apinü I müthsü” de athaba de; yungsho rhimokhitkhi kukruknü rhimokhitbuh ki, “Api anikhitkhi müla” de athabea de?

¹⁷Anükhüh kheaknü Lebanon ju aso-asokhi lu mükamba de, tüsho aso asokhi lu ju murung mükamba de?

¹⁸Ju nimung nükhünpeangrünü thrütqiu yubo sobah, tüsho azhingdokhi tüsho amiting chingnü müktukrü müknü angübah.

¹⁹Azhihayihrünü ATUNGPUH kheak asühachihkhi rünkihbah, tüsho küpkhukrü mihtsürünü Israel Amüsühbuh Khülang kheak asühkhi labah.

²⁰Tümüde mihlungchihrü mülade akambah, tüsho lülüshishirü akheam thsübah; amütsü rhimopü athrirü alala kheamshihbah —

²¹sherünü mihtsürübo amülim kamshihcho, shepünü chipiripit ching mahkhaprü thsungkheak azheang zocho, tüsho mütsanmükhi mülade alungki ching larü thiyuro rahlocho.

²²Jumonü Abraham rhokhitbuh ATUNGPUHNÜ Jakob yamkhün dünkheak ha thachoh: Kheaküa Jakob machih, api miro mümürüm.

²³Tümüde küyimki apinü api lung inü ajihkhi tsührübo ngübanü, arünü I mung müsühkhitbah; arünü Jakob yo Amüsühbuh Khülang müsühkhitbah, tüsho Israel Thrünpuh wüntrekhi ching zhipbah.

²⁴Tüsho sherünü me ching lakmih-a lanü anikhitkhi ching arübah, tüsho sherünü arhunganimchonü thsangdankhi leangkhibah.