Read Yimchungru Naga Isa 3 Bible Online

Isa 3 - Yimchungru Naga bible

Isa 3

¹Tümüde kheakü Wuto ATUNGPUHNÜ arü tsühyungbe ngüpung yikhap tüsho ke alala Jirusalem tüsho Juda chingnü hande tsochoh;

²thirithsürü tüsho bonungrü, mahkhaprü tüsho wukihrü, kuhikheahrü tüsho azothsürü,

³thünim yo wühkenorü tüsho wüntre mihtsürübo, lümthiyan-jihrübo tüsho ayeanzo sangrhimosorü tüsho athsükhit wurük-huhrü.

⁴Tüsho inü athrürü nunubo arü yakzanshuhrü kamshihbah, tüsho khungarübonü arü kurungkheak yakzan shuhbah.

⁵Mihtsürübo mihbüm abande püpürünü tüsho mihbüm abande yamhingrünü junobah; athunurünü azothsürü ki, tüsho akheamkhirünü wüntre larü ki mükhemükimbah.

⁶Khürünü betsührü she arambah, guk ching kheyukrü khülangnü athabah, “ Nü a khimmih lah; jumonü ha küpkhuk kim ching nü isa limberü thsüang.”

⁷Tüshe apinü ju nimung zhide athabah, “ I athsüngurü khülang müthsü; I yam ching yikhap yungsho khimmih she müla; nüsanü I mihtsürü limberü dükamshih.”

⁸Tümüde Jirusalem jing mükhedo tüsho Juda angakdo, tümütüsho arü yu thakhi tüsho arü rhimobonü ATUNGPUH azhihkhi lah, api müretahkhi arün thsüshihdo.

⁹Arü miro kheak kheahkhinü arü azhihkhi thiyumütsan huhchoh; arünü arü neak Sodom nangde zhiyukchoh, arünü ju müram. Arübo ayokhe! Tümüde arünü amütsü rhimo arü kheak handarüdo.

¹⁰Thiyuro larü ki arü kuhi lakhi thaang, tümüde arünü arü rhimokhi sangaso tsühbah.

¹¹Amülimrü ayokhe! Küdükhüh she arü kuhi amütsü la, tümüde arü khahnü tümü rhimodünü arü kheak rhimobah.

¹²I mihtsürübo — azürübo arü junorü ah, tüsho azoberünü arü kurungkheak yakzan shuhchoh. O I mihtsürübo, nüsa limberübonü nüsa bemüchihchoh, tüsho nüsa limro yingyingshihchoh.

¹³ATUNGPUHNÜ api dünkheak atsangpü asürüchoh; apinü mihtsürü mahkhappü zhipchoh.

¹⁴ATUNGPUHNÜ azothsürü tüsho api mihtsürü yakzanshuhrü ki mahkhappü ching yüzahchoh: Nüsanü kurungasolu thsümünima bahkheah; zhochihrü thsümüchipü nüsa yambo ching lah.

¹⁵Nüsanü zhochihrü miro shungthünakde I mihtsürü zünakkhi ha tümü amütsan a? Wuto A TU N GPU H THRÜNPUHNÜ thachoh.

¹⁶ATUNGPUHNÜ tha: Tümütüsho Zion tsührübebo kükheangküyang lah tüsho hungbo züngkihbah tsahchoh, arü mükji müzhingbah kheahchoh, arü yüchoki kakkakde, arü jing tsüngtsüngchoh;

¹⁷ATUNGPUHNÜ Zion tsührübebo kubo müshaknü athsünüshihbah, tüsho ATUNGPUHNÜ arübo bünkeang kamshihbah.

¹⁸Ju nimung ATUNGPUHNÜ atsübe lakbo, kutsümbe, tüsho khinulakbo lude atsobah;

¹⁹thümühro-lak, bingkhüm, yüri;

²⁰kuthran-züt, khu, pangrümbe, arhümkebe tsümbo, tüsho wurükzüt;

²¹mütsanyümbe yingkhüm tüsho nupung nüpübo;

²²anioji-shulünkhim, aniuniu-khimmih, khimmihbo tüsho qiuqiunini;

²³ayinatrüm-khimbo, azhingzhingkhim, kuhingbe, tüsho kudukiubebo.

²⁴Arhümkebe müthri arhümmükebe; tüsho pangrümbe müthri shungliu; tüsho kuyü-jangpü müthri kurakrak; tüsho suhdahkhi shulünkhim müthri shungliukhim rümkhi; akheahakham müthri achih labah.

²⁵Nüsa mihtsürübo tüsho athrungrübo keochih ching nukshangnü akeambah.

²⁶Tüsho Zion chipiripitbonü tüzhode mitripbah; zhikrangkhündo, anihbe alo kheak binbah.