Read Yimchungru Naga Isa 31 Bible Online

Isa 31 - Yimchungru Naga bible

Isa 31

¹Aha, sherünü arung thsungkheak Ijip ching yükicho tüsho shenü khorabo kheak düthsün angücho, shenü khora-lolungbe kheak kincho tümütüsho arü ahihdo lah tüsho khoraberü kheak kincho tümütüsho arü khide sühmüh lah, tüshe Israel Amüsüh Thrünpuh kheak mükheah yungsho ATUNGPUH ki mükeokhi!

²Tütüshe api she lümlung lah tüsho thsümütsü handarüchoh; apinü anihbuh yubo matrütchoh, tüshe amütsü rhimorü yamkhün azhihde wusubah tüsho amülim rhimorü rungrü azhihbah.

³Ijiprübo ju mihtsürü ah tüsho Thrünpuh yung; arü khorabo shih, tüsho me yung. Küyimki ATUNGPUHNÜ api khah chungkihbanü, arungrü jing mükhebah, tüsho arungbuh alungbah, tüsho ane chido rukhüh dükheakbah.

⁴Tümüde ATUNGPUHNÜ I ki ha thado, Kekhüzü yungsho kekhüzü nununü shih kheak arungkhi nangde, tüsho — mihnu neakrü botonü ayankhipü zhibanü — arü zhikhinü mümüyinsah yungsho arü alankhinü mutuklo, junangde Wuto ATUNGPUH Zion Müzüng tüsho awungbo kheak thirithsüpü akibah.

⁵Wuhnubonü akumung phinkhi nangde, Wuto ATUNGPUHNÜ Jirusalem kümdobah; apinü kümdobah tüsho bekhitbah, apinü phunghobah tüsho kümkhitbah.

⁶Nüsanü tode azhihbuh kilim rholoang, O Israel mihtsürü.

⁷Tümüde ju nimung nüsa khahnü neak yihbeakde athsükhi shotoyinchi tüsho suna sangthsübo nüsa alalanü jiba bahbah.

⁸Judüki Asiria ju nukshangnü alungbah, mihtsürü nuknü yung; tüsho mihtsürü nukshangnü yungde api muyubah; api nukshang kheaknü atsobah, tüsho api mihtsürü athunubo azhorü kambah.

⁹Atrekhinü apinü nihbuh chipi bahbah atsobah, tüsho api torübonü riphin ngübah ajande atsobah, ATUNGPUHNÜ thachoh, shepü mo Zion ching la, tüsho shepü motru Jirusalem ching la.