Read Yimchungru Naga Isa 32 Bible Online

Isa 32 - Yimchungru Naga bible

Isa 32

¹Kheahang, kiulongthsürü khülangnü thiyuro-lungki ching kiulongthsübah, tüsho yakzanshuhrübonü thiyuro ching yakzan shuhbah.

²Mihtsürü abannü apung chingnü ajikpü dangpung nangde, chinthrüm chingnü alampung, akung lo ching ke yungbo nangde, kethüri lo ching lungto ato alamme nangde alabah.

³Judüki mük larübo müyihdo, tüsho nükhün kihrübonü anibah.

⁴Makharü lümkhinü tsüde anikhitbah tüsho mulo kudukrünü nahnahde tüsho mütsande athabah.

⁵Makharü khürükhüh ki mükheahmudurü de müji, yungsho amütsü mihtsürü ju wüntre larü müthsü.

⁶Tümüde makharünü mudukmüke yu asukchoh, tüsho arü lümkhi ju amütsünü makeangde lah: Thrünpuh mümükheahkhi rhimopü, ATUNGPUH dünkheak lakshi thapü, akhümrü bukmüthsüde zojihpü tüsho kethürirü yungpü tukloshihpü lah.

⁷Amütsü mihtsürü lümkhi amütsübo ju rhimo amütsü lah; küpkhukrünü amushuchoki alungki lachoki thsüthsü she arünü akeangyubo thade zhochihrü thsümünimpü lümkhi thsüchoh,

⁸Tüshe sherü mükheahmudurü lanü mükheahmudu lümkhi thsüchoh, tüsho mükheahmudu hode arü zhipchoh.

⁹Asürang, nüsa keamramde alakhi liberübo, I düsheak aniang; nüsa reangkeamde alakhi tsührübebo, inü asukkhi aniang.

¹⁰Kam khülang anükhüh hobah nüsa reangkeamde larübo ajanbah; tümüde kurungaso murho, sangaso yimlukhi mülade alabah.

¹¹Niukang, nüsa keamramde lakhi liberübo, ajanang, nüsa reangkeamde larübo; nüsa khimmih yihkhitang, tüsho nüsa chim kheak shungliukhim yihang.

¹²Thulu atsübo, aso-asokhi kurungaso thsungkheak nüsa khüh yümang,

¹³Tümüde I mihtsürü lo ching ayangbo tüsho khingphubo mukhuhbah; asühachihkhi kiuto ching asühkhi yamkhün alala thsungkheak tripang.

¹⁴Tümüde kiulongthsürüyambo mihabahbah, sünthülanga lakhi kiuto bahkhitbah, awung tüsho aheangpungbo lünnü shiwüh lapung, mütüm donki asühachihpung, mihnu boto yimtsühpung kambah;

¹⁵achang kheaknü me khülang isa kheak mudungkihyi khiungde tüsho sunglo ju aso-asokhi lu mükamyi khiungde, tüsho alo atsü lu murung nangde mükamyi khiungde alabah.

¹⁶Judüki thiyuro ju sunglo ching labah, tüsho thiyuro-lungki ju alo atsü lu ching labah.

¹⁷Thiyurolungki rhimokhi ching mungtsü labah, tüsho thiyuro-lungki hode akhiukkhi ju lünnü keamram tüsho akinashu labah.

¹⁸I mihtsürübo mungtsü lapung ching kurampung tüsho keamramde sühakhimpung ching labah.

¹⁹Aru akibah murung ju shahde kheamkheam she tüsho kiuto shahde kingkheamkheam she,

²⁰nüsa sherü ayung yean mükheanbanü tüsho moshipung le donki thsungkheak rimlopung labanü asühpü.