Read Yimchungru Naga Isa 33 Bible Online

Isa 33 - Yimchungru Naga bible

Isa 33

¹Nü are, O athsümünimrü, nü müthsümünimyi! Nü are, O thsungyukjihrü, nü muthsungyukyi! Küyimki nünü athsümünimpü tuklobanü, nü thsümünimbah; küyimki nünü athsungyukpü tuklobanü, nü thsungyukbah.

²O ATUNGPUH isa ki müthsümang; isanü nü aleanglah. Yapsu aban isa sühmüh thsang, Küpkhuk kim ching isa khümkhitang.

³Nü düsheak tsüngmuk sobah mihtsürübo tsochoh; nü asürüchoki trükshihbo tsomüzütchoh.

⁴Lungbünnü hanmukhungkhi nangde ayankhikhi kukrukbo hanmukhungdo; tangkhobonü ajukkhi nangde, arünü ju kheak jukchoh.

⁵ATUNGPUH shuhkih-a lah, api achang kheak lah; apinü thiyuro tüsho thiyuro-lungkinü Zion mishihdo;

⁶api nüsa kim ching khimtan labah, akhümkhit, lümlung tüsho amükheah muzhomopungde lah; ATUNGPUH wüntrekhi ju Zion rahpung lah.

⁷Aniang! Wungdo phulung ching mulong torünü azhikhi; mungtsü yusheak hanrü khühde tripchoh.

⁸Limto bahkhitdo, hantsahrünü limro zhikshihdo. Binthrüm thsümünimdo, thiyuchihchimkhi lakmünimdo, she kheak she akin müjih.

⁹Alonü mitripchoh tüsho thsünüde lah; Lebanon achihdo tüsho yiuhabahchoh; Sharon ju loshelo nangde lah; tüsho Bashan le Karmel kheak sangyübo aniungkhichoh.

¹⁰ATUNGPUHNÜ thachoh, kheakü I shuhkihbah, kheakü I wusubah;

¹¹Nünü hitsüt zahshihchoh, nünü müneang zübechoh; nü sheak ju nü aniuabahbe mo lah.

¹²Tüsho mihtsürübo ju lungmüye takkhi nangde, ayang kiushakbah mo ching takkhi nangde alabah.

¹³Nüsa limshude larübo, inü tümü rhimoa lanü aniang; tüsho nüsa aphüni larübo, I wu-sühmüh mütsankhitang.

¹⁴Zion ching aneakrübo trede lah; Thrünpuh mümükheahrü ajande lah; “ Isa bolung shepünü aniuabahbe mo ching laba? Isa bolung shepünü akheam müla motru ching laba?”

¹⁵Shepünü thiyuro-lungki ching tsahcho tüsho lungkide asukcho, shenü junode alü thsükhi khenocho, shenü buknim leangkhipü ching khah tuklocho, shenü thiyih bukkhi sopü chingnü nükhün tuklocho, tüsho amütsü rhimo kheahkhi chingnü arü mükbo tukcho,

¹⁶arübo achangbo kheak labah; arü tsoyukpung ju lung-chipi labah; arü tsühyungpü ahiuhbah, arü ke yungpü ngübah.

¹⁷Nüsa mükbonü kiulongthsüpuh api akhamkhi ching ngübah; arünü limshude alakhi lomi chinzhinbah.

¹⁸Nü lümkhi atrebe kheak mangmangyaya-a alabah: “Atobuh thsü küching la? Ruk-threbuh thsü küching la? Aheangsadam atobuh thsü küching la?”

¹⁹Nünü kheaküa mulong zhipzhip mihtsürü, mümütsanmükhi yu tharü mihtsürü, manikhitkhukpü lakhi aduhduh yu thakhibo müngü.

²⁰Zion kheak kheahang, thüniopü mokhitkhi isa kiuto! Nüsa müknü Jirusalem ngübah, keamramkhi lapung, makhinkhi khimyam, küpü dungjingbo küyimki she muthokhitbe la, tüsho müyihshakpü la.

²¹Tüshe ju ching ATUNGPUH ju wüntre-müretah ching, ayungbo ato tüsho yungzübo lakhi dangpungbo, sangkung-tso mülade sangkung müyükhuk, yungsho sangkung amülak muhokhukpü lakhi ching isa thsungkheak labah.

²²Tümüde ATUNGPUH ju isa mahkhapbuh, ATUNGPUH ju isa yakzanshuhrü, ATUNGPUH ju isa kiulongthsüpuh; apinü isa khümkhitbah.

²³Nüsa shungliubo niukniuklah; arhükkhi kukruk düngdüng mutholo, yungsho abekhi mütsah. Judüki suhdahde ayankhikhi kukrukbo chama lubah tüsho jingkikrünü she kukruk hana lubah.

²⁴Tüsho lomi ching larü shenü, “ I tukthsülah” de mütha; ju ching larü mihtsürübo arü mülimkhi neak bahjihbah.