Read Yimchungru Naga Isa 34 Bible Online

Isa 34 - Yimchungru Naga bible

Isa 34

¹Phünide arang, O trükshihbo, tüsho aniang; O mihtsürübo, nükhün muphoang! Alomi tüsho ju ching lakhi alalanü soshang; alomiküp tüsho ju chingnü arükhi alala.

²Tümüde trükshih alala azhihde ATUNGPUH bukakhiukchoh, tüsho arü bonungrü alala azhihde mulong zhipzhipchoh; apinü arü shahde dükheakshihdo, apinü arü alaksahpü shuh-a jihdo.

³Arü laksahkhi jipkhita bahbah tüsho arü ashemibonü shuhrhüm münimde yükihshihbah; arü thiyih awungbo kheak bukbah.

⁴Thüning kheak chiningbo alala niukrubah, tüsho thüningbo pheak nangde qiuabahbah. Chiningbo alala kurungaso yü yungsho khubaso aso nangde akeamkhibah.

⁵Yinmi ching I nukshang müsühbah, kheahang, ju Edom kheak inü mahkhappü akhukhi mihtsürü kheak akibah.

⁶ATUNGPUH nukshang khülang lah; ha thiyih shitkih-a lah, namfimihnu tüsho mihnu thiyihbonü, namfimihnupung mügei müdangnü mujukihlah. Tümüde ATUNGPUHNÜ Bozra ching shuhmülanga jihkhi lah, Edom lomi ching alaksahkhi ato lah.

⁷Tüsho mütüm moshipungbo, moshi anunu tüsho moshi atoto arü lung keambah. Arü lomi thiyihnü apangkhitbah, tüsho arü lo amüdangnü alüpdobah.

⁸Tümüde ATUNGPUHNÜ royimpü nimung khülang lah, Zion dünkheaknü thsümüchipü kam khülang lah.

⁹Tüsho Edom yungzübo ju shingkung kambah, tüsho anihbe lo kelülülung kambah; anihbe lo motakkhi shingkung kambah.

¹⁰Azhing tüsho animung kethürimüride alabah; lünnü mokhüh yükihbah. Lün chingnü lün thsümünima yapbah; shenü she lünnü mütsahho.

¹¹Loshelo lungru tüsho athürapbe lungrunü ju müküh-a lubah; lungru ato tüsho khüyaknü ju ching asap shubah. Thrünpuhnü Edom kurungkheak neamneamruru liu tüsho thsümünimbe akeliu thoshangbah.

¹²Arünü ju ching tümü kiulongthsü mung müji, tüsho yakzanshuhrü alala tümü mülade alabah.

¹³Chipibo kheak ayang mukhuhbah, tüsho khingphu le thurukmüthsübo chipibo ching labah. Ju shirungbo mungpung tüsho kewühtopü lapung kambah.

¹⁴Wuyihbonü rimre shorubah, arimri-mihnubonü jiachihbah; ju ching azhing-rimri she lah tüsho sühakhimpü dangpung yimchoh.

¹⁵Ju ching lungru sap labah tüsho akebah ahüpbah tüsho aghidükeang khüpnü akümbah; ju ching merhambo she drepung thsübah shomukhungbah.

¹⁶Yimang tüsho ATUNGPUH hüm chingnü kheang: Harü bolung khülang she mülakphah; sheshe drepung mabande müla. Tümüde ATUNGPUH münnü thiyukhüm jihdo, tüsho api menü arü bemukhungdo.

¹⁷Apinü arü thsungkheak azan thsü, api khahnü arü kilim akhude chama jih; arünü ju lünnü amükühbah, lün chingnü lün ju ching arü labah.