Read Yimchungru Naga Isa 36 Bible Online

Isa 36 - Yimchungru Naga bible

Isa 36

¹Kiulongthsüpuh Hezekia kam thürükheak phüyipü ching, Asiria Kiulongthsüpuh Sennakeribnü chipi ayünkhi Juda kiuto alala yanpü atu tüsho yankhit.

²Asiria kiulongthsüpuhnü Lakish chingnü Rabshake lung bonungrü hihde bebah Jirusalem ching kiulongthsüpuh Hezekia kilim yüshih. Apinü achangbe kekhip keru Müsühmürarü Lu limto kheak zhip.

³Tüsho ju ching kiulongthsüpuh yam ching abebuh, Hilkia tsührü Eliakim, athrütbuh Shebna, tüsho Asaph tsührü athrütyukbuh Joa api kilim arü.

⁴Rabshakenü arü ki tha: “Hezekia ki thaang: Ha Asiria ato kiulongthsüpuhnü thachoh: Nü mulong tokhi ha tümü kheak düthsün angükihla?

⁵Thiyubo lang thirithsü thsungkheaknü lümkhi tüsho sühmüh de nünü lümcho shi? Kheakü nü she kheak angübah I kheak azhihkhea?

⁶Kheahang, nü Ijip kheak angükihlah, azhakkhi kiupung tso, küpünü ju kheak angükihrü khah chinkhitpü la. Ha ruk alalanü angükihbuh ju Ijip kiulongthsüpuh Pharao lah.

⁷Tüshe nünü I ki, ‘ Isanü ATUNGPUH isa Thrünpuh kheak angükihlah’ de thasho, ha Hezekianü achang dangpungbo tüsho kingaün sadambo, Juda tüsho Jirusalem ki, ‘ Nüsanü ha kingaün sadam miki kingaünbah’ de thade abahjihbuh yung de?

⁸Kheakü arang, I putungrü Asiria kiulongthsüpuh ki thiyuchihchimang: Inü nü kilim khora 2000, nünü jurü bepü yimkhuksho ajihbah.

⁹Dale küde thsah nünü I putungrü yamlarü bolung aninibe wühkenobuh yanlokhukpü, tüsho khora-lolungbe le khoraberü thsungkheak Ijip kheak düthsün angüba?

¹⁰Kheaküshe, inü ATUNGPUH mübede ha lomi thsümünimpü atukhea de? ATUNGPUHNÜ I ki tha, Ha lomi azhihde wutuang, tüsho thsümünimang.”

¹¹Judüki Eliakim, Shebna, tüsho Joanü Rabshake ki tha, “Muzhobah nü yamlarübo ki Aramik chingnü asukang, tümüde isanü ju anikhitlah; rhü ki larü mihtsürünü sode Ibri yutha chingnü isa ki dasuk.”

¹²Tüshe Rabshakenü tha, “ I putungrünü harü yubo nüsa putungrü tüsho nüsa ki asukpü I arüshihkhea de, tüsho rhü ki binrü mihtsürübo ki a yungde, sherübo nüsa lung nihbuh khih tsühpü tüsho phüyanke yungpü akhukhita la?”

¹³Judüki Rabshakenü zhip tüsho Ibri yutha chingnü düsheak achangnü jikhit, “Asiria ato kiulongthsüpuh yubo aniang!

¹⁴Kiulongthsüpuhnü ha thachoh: ‘ Hezekianü nüsa dümülapyukshih, tümüde apinü nüsa mübekhitkukde alabah.

¹⁵Hezekianü ha ruk thade nüsa ATUNGPUH kheak düthsün dangüshih, ATUNGPUHNÜ tsükjide isa bekhitbah; kiuto ha Asiria kiulongthsüpuh khah ching müjih.’

¹⁶Hezekia ki dani; tümüde Asiria kiulongthsüpuhnü ha thachoh: ‘ Nüsanü I kheak mungtsüang tüsho I kilim akhiukang; junangde nüsa mihbüm abannü nihbuh kurungaso tüsho nihbuh khubasodung chingnü atsühbah tüsho nihbuh kekhip chingnü ayungbah,

¹⁷I arübah nüsa lo nangde alakhi hi tüsho yukhu lo, yikhap tüsho kurungasolu lo ching bede müyüyi khiungde.

¹⁸ATUNGPUHNÜ isa bekhitbah de Hezekianü thade nüsa dübemüchihshih. Trükshih thrünpuhbo khürünü arü lomi Asiria kiulongthsüpuh khah chingnü bekhitdo de?

¹⁹Hamath tüsho Arpad thrünpuhbo küching la? Sepharvaim thrünpuhbo küching la? Arünü Samaria I khah chingnü bekhitdo de?

²⁰ATUNGPUHNÜ I khah chingnü Jirusalem bekhitpü thsüde, harü lomi thrünpuhbo alala bolung ching shenü arü lomi I khah chingnü khümkhit de?’ ”

²¹Tüshe arünü malan tüsho api ki thiyu khülang she malo, tümüde kiulongthsüpuh yukhüm ju, “Api ki dalo” de alakheah.

²²Judüki Hilkia tsührü Eliakim, shepü kiulongthsüpuh yam abebuh lakhea, tüsho athrütyukbuh Shebna, tüsho Asaph tsührü athrütbuh Joa, arü khim thorüpbahle Hezekia kilim arü, tüsho Rabshake yubo api ki thaa huh.