Read Yimchungru Naga Isa 37 Bible Online

Isa 37 - Yimchungru Naga bible

Isa 37

¹Küyimki kiulongthsüpuh Hezekianü ha sokhea, apinü akhim thorüpbah anihbuh shungliukhimnü hingdo, tüsho ATUNGPUH yam ching yüzah.

²Tüsho apinü Eliakim, kiulongthsürü yam abebuh, tüsho athrütbuh Shebna, tüsho awün amükeamrübo shungliukhim phuyubah Amoz tsührü wukihbuh Isaia kilim yüshih.

³Arünü api ki tha, “Hezekia nü ha thachoh, ha nimung lümthsünü, athürühkhi tüsho mümuzhokhi nimung khülang; tsührübo zübedo, tüsho arü mütrümusupü sühmüh müla.

⁴Rabshake yubo ATUNGPUH nü Thrünpuhnü soa labah, shepü ki api putungrü Asiria kiulongthsüpuhnü arhang Thrünpuh keangrüpü, tüsho ATUNGPUH nü Thrünpuhnü asokhi yubo mükhemürangpü thiyikhea; jumonü aninga larü thsungkheaknü tamkhüntamnü zhiang.”

⁵Küyimki kiulongthsüpuh Hezekia yamlarübo Isaia kilim arükhea,

⁶Isaia nü arü ki tha, “ Nüsa putungrü ki thaang, ATUNGPUHNÜ ha thachoh: Nünü asokhi Asiria kiulongthsüpuh yamlarübonü I luhmünekhi yubo dünkheaknü tre.

⁷Inü api kheak me yukjihbah, junangde apinü kiubuyu khülang sobah, tüsho anihbuh lomi lim rholobah; inü anihbuh khah ching yo nukshangnü api lungshihbah.”

⁸Rabshake alode yü, tüsho Asiria kiulongthsüpuhnü Libna bede keochihkhi ngü; tümüde kiulongthsüpuh Lakish chingnü akhindo de apinü so.

⁹Kheakü kiulongthsüpuhnü Ethiopia kiulongthsüpuh dünkheak, “Apinü bede keochihpü tsahmusudo” de so. Küyimki apinü ha sokhea, apinü Hezekia kilim yunithsürü yüshihde tha,

¹⁰“ Nüsanü Juda kiulongthsüpuh Hezekia ki ha thaang: Nünü düthsün angükhi Thrünpuh nü, Jirusalem ju Asiria kiulongthsüpuh khah ching müjihpü thiyuchihchimde nü dümülapyukshih.

¹¹Kheahang, Asiria kiulongthsürübonü lomi alala dükheakshihde arhimokhi nünü sodo. Nü abekhitba de?

¹²I müngührünü athsümünimkhi trükshihbo, Gozan, Haran, Rezeph, tüsho Telassar ching lakhi Eden mihtsürübo, arü thrünpuhbonü bekhitdo de?

¹³Hamath, Arpad, Sepharvaim kiuto, Hena yungsho Ivva kiulongthsürübo küching la?”

¹⁴Hezekianü yunithsürü khah chingnü kihüm leangkhi tüsho khe; judüki Hezekianü ATUNGPUH yam ching wutu tüsho ATUNGPUH miki lokhita zo.

¹⁵Tüsho Hezekianü ATUNGPUH ki tamkhüntamnüde tha:

¹⁶“ O Wuto ATUNGPUH , Israel Thrünpuh, shepü cherubim kumung binla, nü lang alomi kiulongthsü alala Thrünpuh; nünü yinmi tüsho alomi thrün.

¹⁷Nü nükhün muphoang, O ATUNGPUH , tüsho soang; nü mük khimshuhang, O ATUNGPUH , tüsho kheahang; Sennakerib yubo alala sojang, küpü apinü arhang Thrünpuh mükhemükimde arüshihkhi la.

¹⁸Tsükjide, O ATUNGPUH , Asiria kiulongthsüpuhnü trükshih alala tüsho arü lomibo thsümünima yapshihlah,

¹⁹tüsho arü thrünpuhbo mo ching takdo, arübo ju thrünpuhbo yunga lalashe mihtsürü khahnü athsükhi — sang tüsho lung — junangde arübo thsümünimdo.

²⁰Jumonü kheakü, O ATUNGPUH isa Thrünpuh, api khah chingnü isa khümkhitang, junangde alomi kiulongthsübo alalanü nü lang Thrünpuh ah de amükheahbah.”

²¹Judüki Amoz tsührü Isaianü Hezekia kilim yüshih: “ATUNGPUH , Israel Thrünpuhnü ha thachoh: Tümütüsho Asiria kiulongthsüpuh Sennakerib dünkheak nünü I ki tamkhüntamnü,

²²ATUNGPUHNÜ api dünkheak asukkhi yu ha lah: Atsangkhit Zion tsührübenü nü mükhemürangchoh, anihbenü nü luhmünechoh; nü dunglim Jirusalem tsührübenü ku lukchoh.

²³Nünü she kheak keangrümünekhea tüsho mükhemürangkhea? She azhihde nü düsheak zhikhea tüsho lülüshishide nü mük züngkihkhea? Amüsüh Israel Thrünpuh azhihde ah!

²⁴Nü yamlarübo hode nünü I ATUNGPUH keangrüdo, tüsho nünü tha, ‘ I yo khora-lolungbe ahihdo bebah inü awung achangbo kheak, Lebanon wung achangbe khiungde yükihdo; inü cedar ashangbe, amokhitkhi saipress sangbo kiushakdo; inü achangdakkhi, murungto ching arü.

²⁵Inü kekhipbo kiu tüsho ke yungkheah, I jinglungnü Ijip kenü alala kungabahshih.’

²⁶“ Inü adüsonü lümkihdo de nünü muso de? Kheakü inü tümü handarüchonü inü awün nimungbo chingnü lümkhi thsükheah, junangde nünü chipi ayünkhi kiutobo kingnaka müneanmuru mujung kamshihpü lakheah.

²⁷Küyimki ju ching larü sühmüh mülade mulong niniabahkhea tüsho neamneamde akamkhea, arübo ju thulu rim tüsho rim athünak, thüyam kumung kheak rim mütoyide thsümünimkhi nangde kam.

²⁸“ Inü nü asürükhi tüsho nü binkhi, nü wukhiukkhi tüsho yüzahkhi, tüsho I azhihde bukakhiukkhi mükheahlah.

²⁹Tümütüsho nünü I azhihde bukakhiuk tüsho nü mulong zhipzhipkhi I nükhün ching arü, inü yinchi-khoyang nü nupung ching yukjihbah tüsho yinchikaplak nü mün ching yukjihbah, inü nü arükhi limro ching rholoshihbah.

³⁰“Tüsho ha nü thsungkheak amütsan labah: Ha kam aküdah thsüde mukhuhkhi tsühang, tüsho mahnepü kam ju chingnü tümü akhiukbanü; jushu mahsampü kam ching mükheanang, yimluang, kurungasolubo thsang, tüsho asokhibo tsühang.

³¹Juda yamkhün aninga rhangdung lakhi kheaküshe aying chinyukbah, tüsho akulim aso asobah;

³²tümüde Jirusalem chingnü aningkhi wukhiukbah, tüsho Zion Müzüng chingnü atsokhitrü bokhüh labah. Wuto ATUNGPUH künkhinü ha thsübah.

³³“Jumonü Asiria kiulongthsüpuh dünkheak ATUNGPUHNÜ ha thachoh: Api ha kiuto ching marü, ju ching hühzo mükip, ju ki tsung lubah marü, yungsho ayanpü amujuk müthsü.

³⁴Api arükhi limronü api tsolobah; api ha kiuto ching mazah, ATUNGPUHNÜ thachoh.

³⁵Tümüde I tüsho I yamlarü David mung chingnü ha kiuto khümkhitpü inü atsunglobah.”

³⁶Judüki ATUNGPUH yunirü tsahmusu tüsho Asiriarü binkheampung ching 185,000 laksah; küyimki ayinkhikhea, arübo alala ashemibo lakheah.

³⁷Jushu a Asiria kiulongthsüpuh Sennakerib, thüyam lim yü, tüsho Nineve ching la.

³⁸Apinü anihbuh thrünpuh Nisrok yam ching kingaünchoki, api tsührübo Adrammelek tüsho Sharezernü nukshangnü api laksah, tüsho ane a Ararat lomi ching tsokhiabah. Api tsührü Esarhaddonnü api müthri.