Read Yimchungru Naga Isa 40 Bible Online

Isa 40 - Yimchungru Naga bible

Isa 40

¹Shukheamang, O I mihtsürü shukheamang, nü Thrünpuhnü thachoh.

²Jirusalem ki shukheamde asukang tüsho anihbe ki zhiang, junangde anihbe thirithsü kheamdo, anihbe mülimkhi shakdo, anihbe neak dünkheak mahne kinü ATUNGPUH khah chingnü leangkhido.

³Düsheak khülangnü zhichoh: “Sunglo ching ATUNGPUH limro thsakhamang, Loshelo ching ATUNGPUH isa Thrünpuh thsungkheak limto arihde thsakhamang!

⁴Jindükhün aban shuhkihbah tüsho awung le amujuk aban keamkhishihbah; mutromutruk lo arihde akambah, tüsho keamkhikeamyuk dangpungbo shahshah akambah.

⁵Judüki ATUNGPUH müretahkhi akhiukbah, tüsho mihtsürü alalanü rukhühnü angübah, tümüde ATUNGPUH münnü asukdo.”

⁶Düsheaknü tha, “Zhiang!” Tüsho inü tha, “ Inü tümü zhiba?” Mihtsürü alala sangrung ah, arü tsakamkhi ju thulu sangbün nangde lah.

⁷Küyimki ju kheak ATUNGPUH sheaknü amütbanü, sangrung yiuhchoh, sangbün keamkhichoh; tsükjide mihtsürübo a sangrung ah.

⁸Sangrung yiuhchoh, sangbün keamkhichoh; tüshe isa Thrünpuh yu lünnü azhipbah.

⁹Nü awung achang kheak yükihang, O Zion, thiyusheak atsü mükheahshang; nü düsheak sühmüh zahde shuhkihang, O Jirusalem, thiyusheak atsü mükheahshang, shuhkihang, dütre; Juda kiutobo ki thaang, “Ha ching nüsa Thrünpuh lah!”

¹⁰Kheahang, ATUNGPUH nüsa Thrünpuh wulade arüchoh, tüsho api binnü api thsungkheak yakzan shuhchoh; api thsambah api lung lah tüsho apinü bekhitkhi api müngüh lah.

¹¹Apinü api mihnubo ki mihnu neakrünü nangde yimkipbah; apinü namfimihnunubo api bin kheak bemukhungbah, tüsho arübo api khüh kheak hanbah, tüsho namfimihnu abebo mükhihde abebah.

¹²Shenü khah müyinü kebo adünakheah de tüsho yingkhingnü thüning akeakheah de, adünkhi ching alomi asungthulung hüpdonah, tüsho akesangnü awungbo le amujukbo akedo de?

¹³Shenü ATUNGPUH me ki de, yungsho api lümthiyan-jihrü nangde api ki limro huhde?

¹⁴Apinü amükheahpü thsüde apinü she ki keokhikhea, tüsho shenü api ki thiyuro limro thsangyukhea? Shenü api ki amükheah thsangyukhea tüsho anikhitpü limro huhkhea?

¹⁵Trükshihbo she kesopung ching atsamkhi khülang ruk lang ah, tüsho akesang kheak asungthulung nangde khejihchoh; kheahang, apinü kekung-lobo asungthulung dübün nangde düpütkihchoh.

¹⁶Lebanonnü mokhih suhdahde müjihkhuk, yungsho ju shiwühbonü taka kingaünpü musuhdah.

¹⁷Trükshihbo alala api miki tümü she müla; arübo ju apinü tümü mülakhi tüsho akeangkeang kheaknü anükbe khejihlah.

¹⁸Nünü Thrünpuh ju shepü kheak akeba? Tümü sangthsünü api akeba?

¹⁹Sangthsü khülang ju athsüsorünü zünchoh, tüsho sunakingrünü ju kheak suna yihkihchoh, tüsho shotoyinchinü wuhrünliu thsakhamchoh.

²⁰Hadürü kingaün müjihkhukrü khide zhochihrü mihtsürünü amushuhbe sang mokhitchoh. Apinü sangthsü khülang mulungde azhipshihpü thsüde ayeanzo-rhimosorü khülang kheahchoh.

²¹Nünü mümükheahkhea de? Nünü muso de? Ha atankih chingnü nü ki mütha de? Nünü alomi khimtanchokinü manikhitkhea de?

²²Api alomi mühean kumung kheak binlah tüsho ju ching larübo sangyü-tangkho nangde lah; Shepünü thüningbo zhindokhim nangde thoshangcho, tüsho lapung khimyam nangde zünglangcho;

²³Shepünü yakzanshuhrübo akeangkeang kamshihcho, tüsho alomi yakzanshuhrü tümü mülakhi kamshihcho.

²⁴Nükde arübo khimdo, nükde yangdo, nükde adungbonü alo ching aying chinyuk, küyimki apinü arü kheak yünkhea, arübo yiuhabah, tüsho chinthrümnü arübo lungjinim nangde hanbah tso.

²⁵Dale nünü I she kheak akeakheahba, yungsho I thülünkhi she a? Amüsühbuh Khülangnü thachoh.

²⁶Nü mükjibo achang kheak züngkihang tüsho kheahang: Shenü harü thrünkhea? Shepünü chining boto akhiukshih tüsho arübo khecho, arü alala mungnü jichoh; tümütüsho api sühmüh ching tolah, wu ching tolah, khülang she mükhemüdüm.

²⁷Tümüde nünü thacho, O Jakob, tüsho asukcho, O Israel, “ I limro ATUNGPUH kheaknü jika lah, tüsho I alim Thrünpuhnü mümükheahjih?”

²⁸Nünü mümükheah de? Nünü muso de? ATUNGPUH ju akheam mülakhi Thrünpuh, alomi akheambo Thrünrü. Api sühmükeakea yungsho mükeak; api anikhitkhi mümüyimkhukbe lah.

²⁹Apinü sühkeakearü kilim wu jihchoh, tüsho sühmüh mülarü reangzahshihchoh.

³⁰Athunurü she sühkeakeabah tüsho akeakbah, tüsho athunurü khiabahbah;

³¹tüshe sherünü ATUNGPUH aleangchonü arü sühmüh aso kambah, arünü müleangbo nangde ghibonü aphinbah, arünü alihbah tüsho mükeak, arünü atsahbah tüsho sühmükeakea.