Read Yimchungru Naga Isa 41 Bible Online

Isa 41 - Yimchungru Naga bible

Isa 41

¹Malande I ki aniang, O keyean lomibo; mihtsürübo arü sühmüh aso kamshang; arü arüshang, tüsho arünü asukshang; mahkhappü thsungkheak isa rukhühnü phünide aranü.

²Shepünü aniakhiuklimnü khülang asürüshihkhea, api tankihpü thiyuro ching jikhea? Apinü trükshihbo api kilim jih tüsho kiulongthsübo müphü khüp thrüm; apinü arübo api nukshangnü asungthulung nangde, api sanglühnü yüna tsoshihkhi müneang nangde kamshih.

³Apinü arü müshamchoh tüsho tsüde shanchoh, api jingnü limro phütdü lang qiuchoh.

⁴Atankih chingnü lünbo lümkhitlode, shenü ha külüpkhea tüsho rhimokhea? I, ATUNGPUH , akhuhbuh tüsho akheam lung labah.

⁵Keyean lomibonü ngüdo tüsho trede lah, alomi akheambo ajanchoh; arü phünide arüdo.

⁶Khülangnü khülang ki rungde thaachihchoh, “Mulong toang!”

⁷Keaklahrünü sunakingrü ki tuthsukchoh, tüsho yümlungnü kingnakrünü yingkinglung kheak mütrütrü ki tuthsukchoh, yinchitakkihrünü thachoh, “Ha tsülah;” tüsho arünü mülaplappü thsüde yümruyinchinü yümruchoh.

⁸Tüshe nü, Israel, I yamlarü, Jakob, shepü inü mokhitkhea, I müyambuh Abraham tsührü;

⁹nü shepü inü alomi akheam chingnü alukhea, tüsho limshu amühit chingnü ajikhea, nü ki tha, “ Nü I yamlarü, inü nü mokhitdo tüsho nü mübahjih”;

¹⁰dütre, tümüde I nü lung lah, dütre, tümüde I nü Thrünpuh ah; inü nü reangzahshihbah, inü nü rungbah, inü nü I thiyuro khah tsülimnü tholobah.

¹¹Am, nü azhihde bukakhiukrü alala achih ngübah tüsho akinashu mülade akambah; sherünü nü azhihpü mürangchonü tümü mülade akambah tüsho adükheakbah.

¹²Nünü nü müneahrü yimbah tüshe nünü arü müngü; sherünü nü bede thirithsüchonü tümü mülakhi kambah.

¹³Tümüde, I, ATUNGPUH nü Thrünpuh, nü khah tsülim ramlolah; inü nü ki thachoh, “Dütre, inü nü rungbah.”

¹⁴Dütre, nü ari Jakob, nü loriloko Israel! Inü nü rungbah, ATUNGPUHNÜ thachoh; nü rhokhitbuh ju Amüsüh Israel Thrünpuh lah.

¹⁵Kheakü, inü nü hinitpung yinchibeak, ayiuk, aso, tüsho ahü kihde kamshihbah; nünü awungbo nitnakbah tüsho zünakbah, tüsho nünü awung mujukbo hitsüt nangde kamshihbah.

¹⁶Nünü arü yünbah tüsho apungnü hande atsobah, tüsho chinthrümnü arü yünmüzütbah. Judüki nünü ATUNGPUH lung asühachihbah; Amüsüh Israel Thrünpuh lung nü müretahbah.

¹⁷Küyimki zhochihrü tüsho müthsümülarünü ke yimba, tüshe ju ching mülaba, tüsho kethürinü arü mulo kungba, I ATUNGPUHNÜ arü ki alobah, I Israel Thrünpuh nü arü mübahyuk.

¹⁸Inü achangbo kheak ayungbo, tüsho jindükhünbo ching kenübo khimshuhbah; inü sunglo ju kekhip khülang kamshihbah tüsho akunglo kenübo kamshihbah.

¹⁹Inü sunglo ching cedar, akasia, martel, tüsho oliv yukbah; inü loshelo ching saipress, yütosang tüsho tsünsang rukhüh khimbah.

²⁰Junangde alalanü angübah tüsho mükheahbah, alalanü lümakheahbah tüsho anikhitbah, junangde ATUNGPUH khahnü ha rhimoa lah, Amüsüh Israel Thrünpuhnü ha thrüna lah.

²¹Nüsa lümkhi lubah arang, ATUNGPUHNÜ thachoh; nüsa mütsanyubo lubah arang, Jakob kiulongthsüpuhnü thachoh.

²²Arünü arübo bede arüshang tüsho tümü dünjibanü isa ki thaang. Ahokhi ching dünjikhi isa ki thaang, arü tümü lakhea, junangde isanü arü mükheahbah, tüsho arünü arhimokhi isanü amükheahbah; yungsho arüpü lakhi isa ki khipkhitbah.

²³Ha dunglim tümü arübanü isa ki thaang, junangde nüsa ju thrünpuhbo ah de isanü amükheahbah; atsü thsang, yungsho thsümünimang, junangde isanü atrebah tüsho müyinsahbah.

²⁴Nü, atsütsü, tümü müla tüsho nü rhimo kakde akeangkeang; sherünü nü mokhitchonü athraneanbe lah.

²⁵Inü khülang dukulim thurumusudo, tüsho api arüdo, aniakhiuklimnü I mung chingnü jido. Apinü yakzanshuhrübo kheak loyi kheak nangde, phühdamrünü alo damkhi nangde ajungbah.

²⁶Shepünü atankih chingnü ha müchita lakhea, junangde isanü mükheah-a labah, tüsho akhuhlimnü a, junangde isanü athabah, “Api alungki ah?” Ha khipkhitpü she mülakheah, azhiyukpü she mülakheah, nü yubo sorü she mülakheah.

²⁷Inü akhuhde Zion ki thakheah, Kheahang ju ching arü lah! tüsho Jirusalem ki thiyusheak atsü jihkheah.

²⁸Tüshe küyimki inü akheahkhea, she mülade alakheah; harü bolung lümthiyan-jihrü she mülade alakheah, inü akeokhikhi shenü malojih.

²⁹Yung, arü alala akeangkeang; arü rhimo tümü müla; harü sangthsübo ha akeangkeang pung tüsho ayingying lah.