Read Yimchungru Naga Isa 45 Bible Online

Isa 45 - Yimchungru Naga bible

Isa 45

¹Ha ATUNGPUHNÜ apinü mujude-mokhitkhi ki thachoh, shepü khah tsülim inü ramlola, api müngüh trükshihbo kukshihpü tüsho kiulongthsürübo zülu thokhipü, api müngüh khimdopü khimshuhpü — tüsho chipiripitbo mürih:

²I nü müngüh yübah tüsho awungbo keamarihshihbah, inü müwayinchi khimdopübo lakthünakbah tüsho yinchi-khrihbo yihshakbah,

³Inü amiting chingnü rahpungbo tüsho rama lakhi dangpungbo chingnü lakhitbo nü jihbah, junangde I ATUNGPUH de nünü mükheahbah, Israel Thrünpuh, shepünü nü mungnü jicho.

⁴I yamlarü Jakob tüsho inü mokhitkhi Israel mung chingnü, inü nü mungnü jichoh; nünü I mümükheahkheah she inü nü mungnü jichoh.

⁵I ATUNGPUH tüsho püpü müla; I hobah thrünpuh müla. Nünü I mümükheahkheah she inü nü düjitlobah,

⁶junangde I hobah she müla de aniakhiuklimnü aniyüzahlim khiungde mihbüm abannü amükheahbah; I ATUNGPUH tüsho püpü müla.

⁷Inü ayinatrüm kamshih tüsho amiting thrünchoh, inü müngühmühi tüsho thsümütsü thrünchoh; I ATUNGPUHNÜ ha alala thsüchoh.

⁸Tsüng arang, O yinmibo, akulimnü, tüsho thüningbonü thiyuro-lungki tsüng akishang; alominü khimshuhang, junangde akhümkhit mukhuhde akhiukbah, tüsho hanü thiyuro-lungki she pungkhitshang; I ATUNGPUHNÜ ha thrünkheah.

⁹Nüsa sherünü nü Thrünrü kheak shochihchonü are! Api ki anihbuh ju alo kheak phühkheambo lung phühkheam khülang ah. Alonü athsübuh ki thaba de, “ Nü tümü thsücho?” Yungsho “Api khahbo müla?”

¹⁰Shenü buhrü ki ha thachonü are, “ Nü tümü ngükhea?” yungsho berü ki, “ Nü tümü zübekhea?”

¹¹ATUNGPUHNÜ ha thachoh, Israel Amüsüh Thrünpuh, tüsho Athrünrü: I tsührü yungsho I khah rhimo dünkheak nünü I ki keokhiba de?

¹²Inü alomi thrün, tüsho ju kheak mihtsürü thrün; I khahnü thüningbo thoshang tüsho chiningbo ki thiyukhüm jih.

¹³Inü thiyuro-lungki ching Sairus asürüshihdo, tüsho inü api limro alala mukhiungshihbah; apinü I kiuto thsübah tüsho I yo ramtsorübo zuzu thsüde dükhebah, adün yungsho thsambah thsungkheak yung, Wuto ATUNGPUHNÜ thachoh.

¹⁴ATUNGPUHNÜ ha thachoh: Ijip lakhit tüsho Ethiopia yinzüyindo, Seba atoashangbonü nü kilim arübah tüsho nü yo thsübah, arünü nü yanbah; arübo wuhrünliu yukbah arübah tüsho nü ki khukningbah. Arünü nü ki mushude athabah, “Thrünpuh nü lung lang lah, tüsho püpü müla; api hobah püpü thrünpuh müla.”

¹⁵Tsükjide, nü a Thrünpuh, shepü jikla, O Israel Thrünpuh, Akhümkhitrü.

¹⁶Arü alala achih ngüshih tüsho yingyingshih, sangthsü thsürübo rukhühnü yingyinglah.

¹⁷Tüshe Israel a ATUNGPUHNÜ akheam müla akhümkhit hode khümkhita lah; nü a küyimkishe achih müngüshih yungsho müyingyingshih.

¹⁸Tümüde ATUNGPUHNÜ ha thachoh, shepünü thüningbo thrünkhea, api Thrünpuh ah; shepünü alomi kamshihkhea tüsho athsükhea, apinü thrünkihdo; apinü akeangkeang zopü müthrün, apinü alashihpü kamshih: I ATUNGPUH tüsho püpürü müla.

¹⁹Inü amiting lomi ching ramde masuk, inü Jakob tsührü ki mütha, “Akeangkeang ching I yimang.” I ATUNGPUHNÜ thiyuro asukchoh, inü alungki thachoh.

²⁰Nüsa shomukhungang tüsho rukhüh arang, phünide arang, nüsa trükshih chingnü tsokhita larübo! Arübo mükheahmudu müla — sherünü arü sangthsübo hancho, tüsho mükhümkhitkhukbe thrünpuh ki tamkhüntamnücho.

²¹Thaang tüsho nü lümkhi handarang; arünü rukhüh keokhikeorashang! Ha adüsonü shenü akhipkhitkhea? Ha müngühlimnü shenü athakhea? I ATUNGPUHNÜ yung de? I hobah püpü thrünpuh müla, thiyuro-lungki tüsho Akhümkhitbuh; I hobah she müla.

²²I kilim rholoang tüsho khümkhitang, alomi alala akheambo! Tümüde I Thrünpuh ah, tüsho püpü müla.

²³Inü thiyuchihchimdo, I mün chingnü thiyuro-lungki yu khülang malodarüpü thsüde wukhiukdo: “ I ki mukhuk alalanü khukningbah, mulo alalanü thiyuchihchimbah.”

²⁴ATUNGPUH kheak lang thiyuro-lungki tüsho sühmüh lah de arünü I dünkheak thabah; bukakhiukde api azhihrü alala api ki arübah tüsho achih ngübah.

²⁵ATUNGPUH kheak Israel tsührü alala alim kambah tüsho müretahbah.