Read Yimchungru Naga Isa 46 Bible Online

Isa 46 - Yimchungru Naga bible

Isa 46

¹Belnü khukningchoh, Nebonü mükhümchoh, arü sangthsübo shiwüh tüsho moshibo kheak lah; nüsanü ahankhibo ha akeakpü lakhi shiwühbo kheak hahmülang lah.

²Arünü mükhümchoh, arü rukhühnü khukningchoh; arünü hahmülangkhi chingnü mükhümkhitkhuk, tüshe arübo rama lubah tsochoh.

³I ki aniang, O Jakob yamkhün, Israel yamkhün aningkhi alala, shepü zübechokinü inü akümkhea, nuyam chingnü abuhkhea;

⁴nü ashin khiungde I api ah, nü ku buyiuk khiungde inü nü buhbah. Inü nü thründo, tüsho inü akümbah; inü nü buhbah tüsho khümkhitbah.

⁵Nünü I she kheak jak akeba tüsho arihshihba, tüsho isa rukhüh nangde akeakheahba?

⁶Sherünü qiuqiununu chingnü suna yihkhita jihcho, tüsho wuhzhin kheaknü shotoyinchi adüncho — arünü thrünpuh thsürü sunakingrü mulochoh; jushu arünü khukningchoh tüsho kingaünchoh!

⁷Arünü ju dubuh kheak shuhkih-a hanchoh, arünü azopung ching zochoh, tüsho ju ching zhipchoh; ha ju chingnü matrütkhuk. Khürünü ju ki zhisho, malojih yungsho sheshe küpkhuk chingnü mükhümkhit.

⁸Ha lümkhitang tüsho lümakheahang, lüm ching lümloa kheahang, nüsa alakmihrübo.

⁹Adüso dünjikhibo lümkhitang; tümüde I Thrünpuh ah, tüsho püpürü müla; I Thrünpuh ah, tüsho I nangde she müla,

¹⁰atankih chingnü akheam khipkhitde tüsho jipü kim chingnü mürhimoyikhibo thade, “ I lümkhi zhipbah, tüsho inü alümkhi akuk ngübah,”

¹¹aniakhiuklimnü shihtsüh wuhnu khülang, I lümkhi thsungkheak limshu lomi chingnü mihtsürü khülang jichoh. Inü asukdo, tüsho ha dünjibah; inü lümkhi thsüdo, tüsho ju arhimobah.

¹²I ki aniang, nüsa mulong müküprü, nüsa sherü abekhitpü chingnü limshude la:

¹³Inü abekhitpü phünide handarüchoh, limshude yung, tüsho I akhümkhit mülakma; inü Zion ching akhümkhit yukbah, Israel thsungkheak müretahkhi labah.