Read Yimchungru Naga Isa 47 Bible Online

Isa 47 - Yimchungru Naga bible

Isa 47

¹Akiang tüsho asungthulung ching binang, atsangkhit tsührübe Babilon! Kiulongthsü-binkiu kheak yungde alo kheak binang, tsührübe Kaldea! Tümüde nü kheaküa athünak tüsho aliuhliuh de müji.

²Thsam luang tüsho hi chuang, nü dukiube lokhiang, khimnunupü yihkhiang, nü jingbo lokhitang, ayungbo hode yüang.

³Nü bünkeang labah, tüsho achih ngübah. Inü royimbah, tüsho inü she maningshih.

⁴Isa Rhokhitrü — Wuto ATUNGPUH ju api mung — Israel Amüsüh Thrünpuh.

⁵Zhikde binang, tüsho amiting ching yüzahang, tsührübe Kaldea! Tümüde nü kheaküa kiulongthsüberü de müji.

⁶Inü I mihtsürü kheak bukakhiuk, inü I yamrüplurüp müneanjih; inü arübo nü khah ching jih, nünü arü ki mihmüthsüm muhuh; ashinbuhrü kheak nünü khide hah mülangshih.

⁷Nünü tha, “ I lünnü kiulongthsüberü thsübah,” jumonü nünü harü mulong ching muzo yungsho akheampü mülümkhit.

⁸Kheakü jumonü ha aniang, nüsa shih muzhorübo, shepü keamramde la, shepünü mulong ching thacho, “ I ah, tüsho I hobah she müla; I khimoberü kama mübin yungsho tsührü dükheakkhi mümükheah.”

⁹Harü chido kim khülang, nimung khülang chingnü nü kheak arübah: nünü wurük ahihdo tüsho müchit-wu ato huhhuh she, tsührü dükheakpü tüsho khimoberü kampü kim dükde ching nü kheak arübah.

¹⁰Tümüde mihbukmuyuk ching nünü kindo; nünü tha, “Shenü I müngü.” Nü lümlung tüsho nü mükheahnü nü bephülapdo, tüsho nünü mulong ching tha, “ I ah tüsho I hobah she müla.”

¹¹Tüshe amütsü rhimo nünü wurüknü müthsükhikhukkhi nü kheak arübah; nünü müyanlokhukde thsümütsü nü kheak keambah; tüsho nünü tümü she mümükheahkhi zukleangnü nü kheak athsümünim arübah.

¹²Nü athunuchokinü rhimode arükhi nü müchit-rükbo tüsho nü wurükbo ahihdo ching düküngde zhipang; khükia nünü akukpü labah, khükia nünü amüzünkhukpü labah.

¹³Lümlung-jihrü ahihdo kheak nü khia lah; sherünü thüningbo tüsho chiningbo khecho, tüsho khinu aso aban nü kheak dünjipü müchitchonü asürüshang tüsho nü khümkhitshang.

¹⁴Kheahang, arübo sünit nangde lah, monü arübo aniuchoh; arünü motru wu chingnü arü nihbuh mükhümkhitkhuk. Ha arü thüyüpbe mokhih yung, amiki binbe mo yung!

¹⁵Hadürü kheak nünü rhimodo, shepü athunuchokinü nü lung tsahkhea; arü alala nihbuh limro ching rümde tsahchoh; nü khümkhitpü she müla.