Read Yimchungru Naga Isa 48 Bible Online

Isa 48 - Yimchungru Naga bible

Isa 48

¹Ha aniang, O Jakob yamkhün, sherü Israel mungnü jia la, tüsho shepü Juda tsühsoniuso chingnü arükhea; shepünü ATUNGPUH tamde thiyuchihchimkhea, tüsho Israel Thrünpuh jikhea, tüshe thiyuro yungsho alungki ching yung.

²Tümüde arünü amüsüh kiuto mihkhung ah de thachoh, tüsho Israel Thrünpuh kheak angükihchoh; shepü mung ju Wuto ATUNGPUH la.

³Adünjipü lakhi adüsonü inü müchitdo, arübo I mün chingnü wukhiuk tüsho inü arübo mükheahshih; jushu nahdü lang inü rhimo tüsho dünji.

⁴Tümütüsho nü anihnih ah de inü mükheahlah, nü hung ju yinchi-süh ah tüsho nü kingkang ju khahrih-yinchi,

⁵adüsonü inü jurübo nü ki thado, arü müdünjiyide inü nü ki mükheahshihdo, junangde nünü müthabah, “ I sangthsünü jurü rhimokheah, I yo asümkhi sangthsü tüsho anungkhi sangthsünü arübo thiyukhüm jihkheah.”

⁶Nünü sodo; kheakü ha alala kheahang tüsho nünü ha müleangkhiba de? Ha kimnü rünbah inü nü aso rhimobo, nünü mümükheahkhi rama lakhibo soshihbah.

⁷Arübo kheakü thrünkheah, adüsonü yung; khihni müngüh kheak nünü küyimkishe arü muso, junangde nünü müthakhuk, “ Inü arübo mükheah-a lakheah.”

⁸Nünü küyimkishe musoakheah, nünü küyimkishe mümükheahkheah, adüsonü nü nükhün mükhimshuh. Tümüde nünü khide akinashu mülade arhimobah de inü mükheah, tüsho nuyam chingnü nü a azhihrü de ajikheah.

⁹I mung chingnü inü I bukakhiukkhi ashuchoh, I mungshi mung chingnü inü nü thsungkheak tuklochoh, junangde nü müdükheak.

¹⁰Kheahang, inü nü tsangkhitdo tüshe shotoyinchi nangde yung; inü thsünü motru ching nü rükakido.

¹¹I mung chingnü inü ha rhimochoh, tümüde I mung müneanshihpü? I müretah inü püpü kilim müjih.

¹²I ki aniang, O Jakob, tüsho Israel, shepü inü ajikhea: I api ah; I akhuhbuh, tüsho I ashubuh.

¹³I khahnü alomi khimtan khim, tüsho I khah tsülimnü thüningbo thoshang; küpü inü arü ki jikhea, arü rukhühnü zhip.

¹⁴Nüsa alala mukhungang, tüsho aniang! küpü sangthsünü ha müchitkhea? ATUNGPUHNÜ api muzholah, apinü anihbuh lümkhi Babilon kheak rhimobah, tüsho api khahnü Kaldea azhihkhi labah.

¹⁵I, inü she asuk tüsho api jikheah, inü api bedarü, tüsho api limro ching akuk ngübah.

¹⁶I ki phünide arang, ha aniang! Atankih chingnü inü ramde masuk, ha dünjipü lachoki I lakheah. Tüsho kheakü Atungpuh THRÜNPUHNÜ api me bede I thiyikheah.

¹⁷I ATUNGPUHNÜ ha thachoh, nü Rhokhitrü, Amüsüh Israel Thrünpuh: shepünü nü tsüpü thsungkheak thsangyucho, shepünü nü yüpü lakhi limro ching nü becho, I ATUNGPUH nü Thrünpuh.

¹⁸O nünü I yukhümbo anido dükhülaa! junangde nü müngühmühi ju ayung nangde alabah, tüsho nü thiyuro-lungki ju keto abükkhi nangde alabah.

¹⁹Nü tsührü loyi nangde alabah, tüsho nü tsühsoniuso hibümbo nangde alabah; arü mung küyimkishe yihdoa mübah yungsho I mikinü müdükheakshih.

²⁰Babilon chingnü wukhiukang, Kaldea chingnü tsoang, ha asühkhinü zhide thaang, zhiyukang, ha alomi akheam ching yüshang; thaang, “ATUNGPUHNÜ api yamlarü Jakob rhokhitdo!”

²¹Apinü arübo loshelo behochoki arü kemüthüri; apinü arü thsungkheak lung chingnü ke bukshih; apinü lung peangrüp tüsho ke bukkhit.

²²ATUNGPUHNÜ thachoh, “Mihbukmuyuk thsungkheaknü mungtsü müla.”