Read Yimchungru Naga Isa 5 Bible Online

Isa 5 - Yimchungru Naga bible

Isa 5

¹Inü I tsübuh thsungkheak api kurungasolu dünkheak I amuzho khün thsanü: I tsübuh a alomüdang wung kheak kurungasolu khülang lah.

²Apinü alo kiu tüsho lungbo moa bah tüsho amokhitkhi kurungasobo khim; apinü ju ching aheangsadam khülang thsü tüsho yukhu zopung kiu; apinü kurungaso asoshihpü mükkin thsü tüshe kurungaso ju asan aso.

³Tüsho kheakü, Jirusalem ching larübo tüsho Juda mihtsürübo I tüsho I yo kurungasolu dükeak mahkhapang.

⁴Inü I yo kurungasolu ching mürhimokhi tümükhüh la shi? Inü kurungaso asopü mükkin thsüchoki, küde thsah kurungaso asan asokhea?

⁵Tüsho kheakü I yo kurungaso kheak tümü rhimobanü inü nü ki thaanü. Inü sangrung sündokhi yihkhita bahbah tüsho thsümünimbah; inü rhü lukkheambah, tüsho jungkheambah.

⁶Inü ju akeangkeang kamshihbah; ju mümupung yungsho müphünnak, tüsho khingphu le ayangrungnü achindobah; inü amo ki she ju kheak tsüng marüpü thiyukhüm jihbah.

⁷Tümüde Wuto ATUNGPUH yo kurungasolu ju Israel yamkhün, tüsho Juda mihtsürü ju apinü asühde akhimkhi; apinü thiyuro mükkin thsü tüshe thiyih bukkhi ngü; thiyuro lakhi mükkin thsü tüshe atripkhi so!

⁸Nüsa shepünü thüyam kheaknü thüyam müchinkihcho, shepünü thulu kheaknü thulu lukihchonü are, she thsungkheak she khiungshak mülakhi khiungde tüshe nü lang, tüsho nü alomi bolung ching nü langzü lapü aninga lah!

⁹Wuto ATUNGPUHNÜ inü sode thiyuchihchim: Tsükjide thüyam ahihdo zhikabahbah; thüyam atoto tüsho akheahakham mihtsürü mülade akambah.

¹⁰Tümüde kurungasolu lushih 10nü pungdüchi 8 lang akhiukbah tüsho müjih tramduhkhühnü keluhkhüh lang akhiukbah.

¹¹Nüsa sherü amüshangbe müshamde yapsu mükikde asürücho, shepü yukhunü amüshangpü thsüde are khiungde lachonü are.

¹²Shepü aniojikhi ching bingkhung tüsho bingshang, züpzüppü tüsho khungpi tüsho yukhu ahoricho, tüshe shepünü ATUNGPUH rhimobo akin müla yungsho api khah rhimo müngü!

¹³Jumonü I mihtsürübo mükheahmudu mülade ramtso ching yübah; arü limberübo akhümnü ashebah, tüsho arü boto kethürinü rungngahbah.

¹⁴Jumonü Ashe-lominü alü künde kamdo tüsho amün münchi hode khimshuhlah; Jirusalem mükheahmudurü, boto tüsho anihbe lung asühakorü alala yükichoh.

¹⁵Mihtsürübo khukninga lah, mihbüm aban abobe kamshihdo, tüsho mük müzhingrü aninibe kamdo.

¹⁶Tüshe Wuto ATUNGPUH a thiyuro hode shuhkih tüsho thiyuro lakhi hode Amüsüh Thrünpuh anihbuh langzünü amüsühkhi huhchoh.

¹⁷Judüki namfimihnunubo arü yimtsühpung ching nangde yimtsühbah, amüdangkhi tüsho anunubo athsümünimkhi bolung yimkipbah.

¹⁸Nüsa shepü akeangyu liubo yande amülim müshamcho, shepünü lolungbe liubo yande neak müshamchonü are,

¹⁹shepünü tha, “Api niokheamshang, api rhimo nahnahshang, junangde isanü ju ngübah; Israel Amüsühbuh Khülang lümkhi thüninde arüshang, junangde isanü ju mükheahbah!”

²⁰Nüsa shepünü amütsü ki atsü tüsho atsü ki amütsü jichonü, shepünü amiting ju ayin tüsho ayin ju amiting kamshihcho, shepünü akhüh ju aniung tüsho aniung ju akhüh kamshihchonü are!

²¹Nüsa shepü nihbuh küdah lümlung lah tüsho rükri lah de lümchonü are!

²²Nüsa shepü phapke yungkhi ching athrungrü la tüsho yukhu rhupü ching mulong torü lanü are,

²³shepü buknim khülang thsungkheaknü amülim ngücho, tüsho amülim mülarü ki arü alimbo junocho!

²⁴Jumonü mo mulonü müneang muliukhi nangde, tüsho sangrung akung motru ching keamyukkhi nangde, arü ying shuhabahbah tüsho apungkhi asungthulung nangde keamkhia bahbah; tümüde arünü Wuto ATUNGPUHNÜ thsangdankhi bahyukdo, tüsho Israel Amüsühbuh Khülang yu mükhemükimdo.

²⁵Jumonü ATUNGPUHNÜ api mihtsürü azhihde bukakhiukkheah, tüsho arü azhihde api khah chungkhit tüsho arü shik; müzüngbo aniung tüsho arü ashemibo kiudunglimro ching müneanmuru-mujung nangde la. Ha alala thsungkheak api bukakhiukkhi rholode mutso, tüsho api khah kheakü khiungde chungkih-a lah.

²⁶Apinü limshu ching larü trükshih jipü amütsan jihbah, tüsho alomi akheam ching larü mihtsürübo thsungkheak mütbah; ha ching arü arüchoh, athride, nahnahde!

²⁷Arü shepü she mükeak, sheshe mümükhe, sheshe mane yungsho müyap, pangrümbe müniukniuk, jingkhümpü-zhi khülang she müzhak;

²⁸arü hühzobo züpzüplah, arü sanglühbo alala hündübümlah, arü khora biuobo molaklung nangde lah, tüsho arü lolungbe-jingbo chitmühean nangde lah.

²⁹Arü arungkhi kekhüzü nangde arungchoh; arünü ahukchoh tüsho shih ramchoh, arünü lude tsochoh, tüsho shenü müyankhikhuk.

³⁰Ju nimung arünü keto ahukkhi nangde ju kheak ahukbah. Tüsho khürünü lomi kheak kheahsho amiting tüsho lümthsünü lang alabah; tüsho ayin ju amonü mitingdo kamshihchoh.