Read Yimchungru Naga Isa 51 Bible Online

Isa 51 - Yimchungru Naga bible

Isa 51

¹I ki aniang, nüsa thiyuro-lungki müshamrübo, nüsa ATUNGPUH yimrübo. Nü phukkhipung lung kheak tüsho nü kiupung alokhün kheahang.

²Nü buh Abraham tüsho nü zübebe Sara kilim kheahang; tümüde inü api zangrü jikheah, tüshe inü api müngühjih tüsho api hihde kamshih.

³Tümüde ATUNGPUHNÜ Zion mulong shukheambah; apinü anihbe yo thsümünimkhi dangpungbo alala shukheambah, tüsho anihbe sunglo ju Eden nangde kamshihbah, anihbe loshelo ju ATUNGPUH shahwün nangde kamshihbah; asühachih tüsho asühkhi anihbe kheak labah, makshe jihkhi tüsho khün düsheak labah.

⁴I ki aniang, I mihtsürü tüsho I ki anguhang, I trükshih; tümüde I kheaknü thsangyukhi khülang wukhiukbah, tüsho ayin khülang thsungkheaknü I yakzan ju mihtsürübo kilim labah.

⁵I yo thiyuro-lungki phünide lah, I yo akhümkhit wukhiukdo tüsho I khahbonü mihtsürübo yakzan shuhbah; keyean lomibonü I aleangchoh tüsho I khah kheak arünü mulonglamchoh.

⁶Nü mükbo thüning lim züngkihang tüsho abolim alomi kheak kheahang; tümüde mokhüh nangde thüningbo dükheakbah, khim khülang ruk alomi mürhütbah, tüsho ju ching larü somünakbo nangde ashebah; tüshe I akhümkhit lünnü alabah, tüsho I yo thiyuro-lungki küyimkishe mükheam.

⁷Nüsa sherü thiyuro-lungki mükheahlanü, nüsa mihtsürü sherü mulong ching I thsangyukhi lanü I ki aniang; püpürünü mükhemürangkhi dütre, tüsho arünü nü mükthsüchoki mulong dünini.

⁸Tümüde khim khülang ruk arinü arü tsühabahbah, tüsho shihnamkhim nangde arinü arü tsühbah; tüshe inü abekhitpü lünnü alabah, tüsho I akhümkhit lünnü lün labah.

⁹Asürang, asürang, sühmüh zahang, O ATUNGPUH khah! Asürang, awün nimungbo, adüso lünbo nangde! Rahab adütre kamde khapthünakkhi, ke-rimri chinkhitbuh nü yung de?

¹⁰Keto ato asükbo ngahshihkhi nü yung de; rhokhita larü hopü thsüde shenü keto asük limro thrünkhea?

¹¹Jumonü ATUNGPUHNÜ rhokhitrü rholobah tüsho khün thsüde Zion lim arübah; akheam müla asühachihkhi arü ku kheak labah; arünü asühachih tüsho asühakokhi labah, tüsho mulong rozhak le masühkhi tsoabahbah.

¹²I, shepünü shukheamchonü api ah; dale tümüde ashepü lakhi mihtsürü trecho, mihtsürü khülang shepü rim nangde yiuhabahcho?

¹³Nünü nü Thrünrü, thüningbo jashihkhi tüsho alomi khimtanbuh ATUNGPUH mihdo. Nü mutuklode nimungroro ajunorü bukakhiukkhi hode trechoh, shepü athsümünimpü mükhüma la. Tüshe ajunorü bukakhiukkhi kükheak la?

¹⁴Junoa larü nahde adükhebah; arü müshe tüsho alokhün ching müyüzah, yungsho arü yikhap mümükheak.

¹⁵Tümüde I ATUNGPUH nü Thrünpuh, shepünü keto chamnakcho, junangde ahukde abükcho — Wuto ATUNGPUH ju api mung lah.

¹⁶Inü nü mün ching I yubo yukjihdo, tüsho I khah me khüp nü jikshihdo, thüningbo jashihde tüsho alomi khimtande, tüsho Zion ki tha, “ Nü I mihtsürü ah.”

¹⁷Nü asürang, nü asürang! zhipang, O Jirusalem, nü shepü ATUNGPUH khah kheaknü api bukakhiukkhi pung yungkhea,

¹⁸Anihbenü zübekhi tsührü alala bolung shenü anihbe limmübe; anihbenü mütrümusukhi tsührü alala bolung shenü anihbe khah kheak mutho.

¹⁹Thsümütsü mahne nü kheak yükihdo — shenü nü lung mulong rozhakba? — thsümünima yapkhi tüsho athsümünimkhi khümzung tüsho nukshang — shenü nü shukheamba?

²⁰Nü tsührübo lungdo, arübo kiudunglimro ku koyubah yaplah, azheang ching shihmüchi nangde arübo ATUNGPUH bukakhiukkhinü, Thrünpuhnü athürühkhinü mide lah.

²¹Jumonü ha aniang, nüsa sherü yuria la, sherü müshanga la, tüshe yukhunü yung:

²²Wuto ATUNGPUHNÜ ha thachoh, nü Thrünpuh shepünü api mihtsürü dünkheak mushujihcho: Kheahang, nü khah chingnü amüshangbe pung inü ludo; nünü kheaküa I bukakhiukkhi lakuk chingnü mütründe muyung.

²³Tüsho inü ju nü thsümüchirü khah ching yukjihbah, shepünü nü ki tha, “Mükhümang, junangde isanü nü kheak tsahanü;” tüsho nünü nü düthsün ju atsahpung lo nangde tüsho arü thsungkheak kiudunglimro nangde kamshih.