Read Yimchungru Naga Isa 52 Bible Online

Isa 52 - Yimchungru Naga bible

Isa 52

¹Asürang, asürang, nü sühmüh zahang, O Zion! Akheahakhamkhi nü khimmihbo yihang, O Jirusalem, amüsüh kiuto, tümüde tsütamübahkhi tüsho mümüsühkhi kheaküa nü lung mazah.

²Asungthulung chingnü nü dütrünang, asürang, O aramkhi Jirusalem; arhükkhibo nü hung chingnü trünang, O aramkhi Zion tsührübe!

³Tümüde ATUNGPUHNÜ ha thachoh: Nü akeangkeang mo yinkheah, tüsho sho müjihde nü rhokhitbah.

⁴Tümüde Atungpuh THRÜNPUHNÜ ha thachoh: Adüso, I mihtsürü khiungkerü thsüde Ijip ching lapü yüzah; Asiriarünü she amütsan mülade arü junokheah.

⁵Kheakü jumonü I ha ching tümü la, ATUNGPUHNÜ tha, amütsan mülade I mihtsürü bede atsokhea? Arü yakzanshuhrübonü keangrümünechoh, tüsho mutukzhakde nimungroro I mung mükhemükim thsüchoh.

⁶Jumonü I mihtsürünü I mung mükheahbah; jumonü ju nimung ching asukbuh ju I ah de arünü mükheahbah: Kheahang, ha I ah.

⁷Awungbo kheak mungtsü zhiyukrü jing küdükhüh she akhamla, shepünü thiyusheak atsü handarücho, shepünü akhümkhit zhiyukcho, shepünü Zion ki thacho, “ Nü Thrünpuhnü kiulongthsüchoh.”

⁸Aniang! Nü chipi aheangrübonü arü düsheak shuhkihchoh, arü rukhühnü khün thsüde asühachihchoh; tümüde arü müknü ATUNGPUH Zion ching alodarükhi ngülah.

⁹Rukhühnü khün thsüde zhiang, nü athsümünimkhi Jirusalem; tümüde ATUNGPUHNÜ api mihtsürü shukheamdo, apinü Jirusalem rhokhitdo.

¹⁰ATUNGPUH amüsüh khah trükshih alala miki akhiuka lah; tüsho alomi alalanü isa Thrünpuh akhümkhit ngübah.

¹¹Tsoang, tsoang, ha chingnü wukhiukang! mümüsühkhi tümü düqiu; nüsa sherünü ATUNGPUH pungphuru hanla, ha bolung chingnü wukhiukang, nüsa tsangkhitang.

¹²Tümüde nüsa niokheamde muwukhiuk, tüsho nüsa shande müyüzah; tümüde ATUNGPUH nüsa müngüh yübah tüsho Israel Thrünpuh nüsa dunglim aheangrü thsübah.

¹³Kheahang, I yamlarü kukzamde alabah; api shuhkihbah tüsho bekihbah tüsho khide achang labah.

¹⁴Mihtsürü ahihdonü api ngübah niuknim; api jakphü ju mihtsürü kheaknü büthsüde tüsho trungdung ju mihtsürü kihode alakheah.

¹⁵Junangde apinü trükshih ahihdo müyinnimshihbah; api dünkheaknü kiulongthsürübo arü mün yihdobah; tümütüsho arü ki müthakhi arünü angübah, tüsho arünü musokhi anikhitbah.