Read Yimchungru Naga Isa 54 Bible Online

Isa 54 - Yimchungru Naga bible

Isa 54

¹Khün thsang, O bünkeang-berü; khün thsang, tüsho zhiang, nü khungarü müzübebe! Tümüde arhangrü tsührü kheaknü bahyuka lakhi tsührü ahihbe labah, ATUNGPUHNÜ thachoh.

²Nü khimyam lopung jashang tüsho nü lapung zhindokhibo thoshangang; düzünglo; nü liu shangshang tüsho ashungdung düküngshang.

³Tümüde nü tsülim tüsho huzulim bude ayübah, tüsho nü tsühsoniusobonü trükshihbo lubah tüsho abahkhitkhi kiutobo ching labah.

⁴Dütre, tümüde nü achih müngü; mulong dünini, tümüde nü achih ngüde müküpkhuk; nü athunu achihahean nünü amihbah, tüsho nü khimokhi achihahean nünü mülümkhitlo.

⁵Tümüde nü Thrünrü ju nü yamkhünbuh lah, Wuto ATUNGPUH ju api mung lah; Israel Amüsüh Thrünpuh ju nü Rhokhitrü, api alomi athrünkhi Thrünpuh de jichoh.

⁶Tümüde ATUNGPUHNÜ nü abahyukkhi tüsho me ching tüzhokhi liberü nangde jikheah, athunu mihtsürü niuberü bahyukkhi nangde, nü Thrünpuhnü thachoh.

⁷Kim anükhüh thsungkheak inü nü bahyuk, tüshe amuzhokhi atonü inü nü bea lubah.

⁸Kim khülang thsungkheak bukakhiukkhinü I miro nü kheaknü jik tüshe akheam mülakhi amuzhonü inü nü kheak amuzho labah, ATUNGPUH , nü Rhokhitbuhnü thachoh.

⁹Ha I ki Noa nimungbo nangde lah: Inü thiyuchihchimkhi nangde Noa kebo küyimkishe alomi kheak müyü, junangde nü kheak bukmakhiuk tüsho nü müthürüh de inü thiyuchihchim.

¹⁰Tümüde awungbo tsopü tüsho awung mujukbo lah-a bahpü kuklah, tüshe I muzhodakkhi nü kheaknü müchamachih, tüsho I mungtsü tangzüngkhi makhin, nü kheak muzhokhi ATUNGPUHNÜ thachoh.

¹¹O thsünükhi, chinthrüm-yünkhi, tüsho mushukheamkhi, inü nü khimtanbo shotolungbonü akhimbah,

¹²inü aheangsadam amo-achaknü, chipiripitbo mürelungnü tüsho nü rhübo alala shotolungbonü athsüjihbah.

¹³Nü tsührü alala ATUNGPUHNÜ thsangyubah, tüsho nü tsührü mungtsü tüsho latsühlayung labah.

¹⁴Thiyuro-lungki ching nü rünkihbah; nü junopü chingnü limshude alabah, tümüde nü mütrede alabah, tüsho atrebe müla, tümüde ju nü phünide marü.

¹⁵Khürünü nü zündosho, ju I kilimnü yung; sherünü nü zündobanü nü hode alungbah.

¹⁶Kheahang, yingkingrü inü athrünkheah, shepünü mokhih yüntrucho tüsho yihnüpü thsüde thsühnuk kingkhitcho; alaksahpü thsüde athsümünimrü she inü thrün.

¹⁷Nü azhihde athsükhi thsühnuk tümü she mütsüp, tüsho mahkhap ching nü azhihde athakhi yubo alala nünü alokhukbah. Ha ATUNGPUH yamlarü yamrüplurüp tüsho I kilimnü arü thiyuro-mütsan lah, ATUNGPUHNÜ thachoh.