Read Yimchungru Naga Isa 56 Bible Online

Isa 56 - Yimchungru Naga bible

Isa 56

¹ATUNGPUHNÜ ha thachoh: Thiyuro zoang, tüsho alungki rhimoang, tümüde I akhümkhit nahde arübah, tüsho inü thiyurolungki akhiuka huhbah.

²Ha rhimokhi mihtsürü, shepünü ha düngde ramrihcho, shepünü amuni mungcho, ju mümüneancho, tüsho amütsü rhimopü chingnü akhah tuklochonü asühpü.

³Khiungkerünü ha thade A TU N GPU H lung darüshih, “Tsükjide ATUNGPUHNÜ I api mihtsürü kheaknü akhinshihbah”; tüsho dukhanü düthashih, “ I a akung sangdung khülang lang ah.”

⁴Tümüde ATUNGPUHNÜ ha thachoh: I yo amuni mungkhi dukha kilim, shepünü I asühbe mokhitcho tüsho I yo tangzüng düküngde ramlocho,

⁵inü I yam tüsho I chipibo ching tsührübo tüsho tsührübebo kheaknü mung atsüdakbe zojihbah; inü arü kilim akheam mülakhi mung jihbah, ju kheamamübah.

⁶Tüsho khiungkerübo sherünü ATUNGPUH lung arihcho, api tankihpü, ATUNGPUH mung muzhopü, tüsho api yamlarü thsüpü, amuni mungrü alala tüsho ju mümüneanjihcho, tüsho I yo tangzüng dükde ramlocho —

⁷harü inü I yo amüsüh wung ching bedarübah, tüsho I tamkhüntamnü yam ching arü asühde kamshihbah; arünü taka kingaünkhi tüsho arünü shuhmülanga jihkhibo I kingaün sadam kheak leangkhibah; tümüde I yam ju trükshih mihtsürü alala thsungkheak tamkhüntamnü yam de ajibah.

⁸ATUNGPUH Thrünpuhnü ha thachoh, shepünü yankhita lakhi Israelrü bemukhungcho, inü bemukhunga larü lung püpürü bedarübah.

⁹Nüsa mütüm shiwüh alala, murung ching mütüm shiwüh alala, amuyupü arang!

¹⁰Israel aheangrübo mük tuka lah, arü alala amükheah müla; arü alala müchikhukbe aduh yihnubo ah; milim mide awuh-a yapde, yapnekudopü muzhochoh.

¹¹Arübo bukmükhüt yihnubo ah; arü küyimkishe suhdahdo de müla. Mihnu neakrübo she anikhitkhi müla; arü alala nihbuh limro ching arü nihbuh alü thsüpü, alala tsodo.

¹²“Arang” arünü thachoh, “ Isanü yukhu handaranü; isanü phapke yunganü. Tüsho shido a ha kheaknü she atsüdak labah.”