Read Yimchungru Naga Isa 57 Bible Online

Isa 57 - Yimchungru Naga bible

Isa 57

¹Thiyuro-lungkirü dükheakchoh, tüsho shenü mulong ching muzo; shenü manikhitchoki shuhmülanga jihrü bede tsochoh. Tümüde thiyuro-lungkirü ju thsümütsü chingnü bede tsochoh,

²tüsho arü mungtsü ching yüzahchoh; sherünü lungkide tsahchonü arü binkiu kheak sühakhimbah.

³Tüshe nüsa thsungkheaknü a, nüsa thümüthiyirü tsührübo, nüsa müzammüram tüsho pang yinrü tsührübo ha ching arang.

⁴She kheak nüsanü keangrücho? She kheak azhihde nüsa mün mülihde khimshuhcho tüsho nüsa mulo chungkhitcho? Nüsa alakmihrü tsührü, akeangyu tharü tsührübo yung de —

⁵nüsa thülamsang khüp, sangdung phüyak aban khüp müzammüramrübo; nüsa tsührübo jindükhün ching, lunghü khün ching laksahrübo?

⁶Yungzü kelungbo bolung nü shihcham lah; arübo nü shihcham; arü kheak nünü yukhu dungkih, nünü hi kingaün handarü. Harü kheak inü asühba de?

⁷Khide achang awungbo kheak nünü nü yapkiu kheanga zolah, tüsho ju ching nünü laksah-a kingaünpü wutudo.

⁸Khimdopü tüsho khimdopü-dungjing dunglim nünü nü amütsan khima zolah; tümüde, I bahyukde, nünü nü yapkiu lokhitdo, nünü ju kheak yükihdo, nünü ju mülihde kamshih; tüsho nünü arü kheak nü alü thsüa lu, nünü arü yapkiu muzho, nünü arü bünkeang kheak kheah.

⁹Nünü müdangke hanbah Molek kilim yü, tüsho nü yo rhümthüneabebo hihde muju; nünü nü yunithsürübo limshude yüshih tüsho Ashe-lomi ching she yüzahshih.

¹⁰Hihde arümkhinü nü keakabah, tüshe nünü, “Ha akeangkeang” de mütha. Nünü nü shihkünkhi alü kamdo de ngü, tüsho junangde nünü muyiuhyiuh.

¹¹Nünü she ki trekhea, junangde nünü akeangyu thakhea tüsho I mülümkhit yungsho I kilim lümkhi müjihkhea? Inü kim ashangkhüh zhikde alamo nünü I mütrekhea de?

¹²Inü nü thiyuro-lungki tüsho nü rhimobo lahkhita huhbah, tüshe arünü nü murung.

¹³Küyimki nünü azhibanü, nünü akümukhungkhi sangthsübonü nü bekhitshang! Apungnü arü yünde atsobah, sheak khülangnü arü yünde atsobah. Tüshe sherünü I kheak tsoyukbanü alomi lubah tüsho I yo amüsüh awung yamrüplurüp lubah.

¹⁴Hade athabah, “ Rünkihang, rünkihang, limro thsakhamang, I mihtsürübo limro chingnü jing mükhebe alala lah-a bahang.”

¹⁵Tümüde Khide Achangbuhnü ha thachoh, shepü akheam mülade la, shepü mung Amüsüh la: mulong müthrirü tüsho me ching azhihayihrü lung, me ching azhihayihrü müthriloshihpü, tüsho mulong müthrirü müthriloshihpü I achang tüsho amüsüh dangpung ching lah.

¹⁶Tümüde inü mutukzhakde mümüdam, yungsho kamruhroro bukmakhiuk; junangde inü athrünkhi mebo I miki lungbah.

¹⁷Arü mihbukmuyuk yihnelunekhi hode inü bukakhiuk; inü arü shik, inü lak tüsho bukakhiuk; tüshe arünü nihbuh limro ching rholode tso.

¹⁸Inü arü limrobo ngüdo, tüshe inü arü thsüngubah; inü arü bebah tüsho mulong shukheam jihlobah, Israel ching mihtsürü mün kheak mungshi lashihbah:

¹⁹Limshu tüsho aphüni ching, mungtsü, mungtsü, ATUNGPUHNÜ thachoh; tüsho inü arü thsüngubah.

²⁰Tüshe mihbukmuyuk ju keto bukkhi nangde zhikde mülakhuk; ke bukkhinü aneak tüsho akhimniuhniuh rhukihchoh.

²¹Ju ching mihbukmuyuk thsungkheak mungtsü müla, I Thrünpuhnü thachoh.