Read Yimchungru Naga Isa 58 Bible Online

Isa 58 - Yimchungru Naga bible

Isa 58

¹Zhiang, dütuklo! Hulipungpung nangde nü düsheak shuhkihang! I mihtsürübo ki arü azhihkhi dünkheak zhiyukjang, Jakob yamkhün ching arü neakbo dünkheak zhiyukjang.

²Tütüshe nimung abande arünü I yimchoh tüsho I limrobo mükheahpü asühchoh, arü ju thiyuro-lungki lakhi trükshih tüsho arü Thrünpuh yuzüng mübahyukkhi nangde; arünü I ki thiyuro-lungki mahkhapbo keokhichoh, arünü Thrünpuh kilim thüninpü asühchoh.

³“Tümü thsükhi isanü khümkeak thsücho, tüshe nünü müngü? Tümü thsükhi isanü azhihayihcho, tüshe nünü mükheahkhit?” Kheahang, nü khümkeak nimung nü künkhi nünü rhimochoh, tüsho nü rhimobo alala junochoh.

⁴Kheahang, nünü rukachihpü tüsho shochihpü tüsho mihbukmuyuk khah-zhimpungkhi kheak shangpü lang khümkeak thsüchoh. Khihni ha ruk khümkeak thsükhinü nü düsheak achang kheak musoshih.

⁵Inü mokhitkhi khümkeak ha, nihbuh azhihayihpü nimung yung de? Sangrung nangde aku koyupü, tüsho shungliukhim le awah ching yapbea de? Nünü ha ATUNGPUHNÜ leangkhikhukbe nimung, khümkeak ah de ajiba de?

⁶Inü mokhitkhi khümkeak ha, thiyuro mülakhi liu trünpü, sangkap liu trünpü, junoa larü zuzude yüshihpü, tüsho sangkap alala yihshakpü yung de?

⁷Nü yikhap ju akhümrü kippü tüsho thüyam mülarü zhochihrü nü yam ching bedarüpü yung de; küyimki nünü bünkeang ngübanü, arü yihdojihpü tüsho nü keoniorü kheaknü nü müjikpü yung de?

⁸Judüki nü yo ayin yapsu nangde atahbah, tüsho nahde nü thsüngubah; nü thiyuro-lungki nü müngüh yübah, ATUNGPUH müretahkhinü nü dunglim aheangbah.

⁹Judüki nünü ajibah, tüsho ATUNGPUHNÜ alojihbah; nünü arung thsungkheak zhibah, tüsho apinü athabah, Ha kheak I lah. Nünü nüsa bolungnü sangkap, yingkhing athsokhi, amütsü yihkhita bahsho,

¹⁰nünü tsühyungpü akhümrü kilim jihsho tüsho thsünürü yihnüpü reangkeamshihsho, nü yo ayin amiting ching tahbah tüsho nü yo amiting ju animuro nangde alabah.

¹¹ATUNGPUHNÜ mutuklode nü bebah, tüsho atak dangpungbo ching nü yihnübebo reangkeamshihbah, tüsho nü robo düküngshihbah; tüsho nü a keduhkhi ayündo nangde, küyimkishe mubukde mülakhi kenü nangde alabah.

¹²Nü yo adüso thsümünimkhibo thsülobah; nünü lün ahihdo yo khimtanbo khimbah; nü ju azhakkhi thsülorü de ajibah, lapung kiudunglimrobo thsülorü labah.

¹³Nünü amuni junokhi chingnü I yo amüsüh nimung ching nü künkhi müshamkhi chingnü chamkhisho; nünü ha asühpü tüsho ATUNGPUH nimung wüntrebe amüsüh nimung de jisho; nünü ju akin jihsho, nü limrobo ching müyüde, nü künkhi mürhimode, yungsho nü yubo masuksho;

¹⁴judüki ATUNGPUH lung nünü asühbah, tüsho inü nü alomi achangbo kheak tsahshihbah; inü nüsa jipürü Jakob yamrüplurüpnü nü kipduhbah, tümüde ATUNGPUH münnü asukdo.