Read Yimchungru Naga Isa 59 Bible Online

Isa 59 - Yimchungru Naga bible

Isa 59

¹Kheahang, akhümkhitpü thsüde ATUNGPUH khah khide mükhih, yungsho asopü thsüde api nükhün müpeang.

²Ju yungde, nü neakbonü nü le nü Thrünpuh dükeak rhübo lah, tüsho nü neakbonü api miro nü kheaknü jikshihlah, junangde apinü muso.

³Tümüde nüsa khahbo thiyihnü tüsho nüsa yingkhingbo amülimnü müneana lah; nüsa münküpnü akeangyu asukdo, nüsa mulonü mihbukmuyuk kolahdo.

⁴Shenü she thiyuro thsungkheak müji, yungsho thiyuro thsungkheak mumushu; arünü akeangkeang atsangachihkhi kheak düthsün angüchoh, arünü akeangyu thachoh, küpkhuk mihlashihchoh tüsho amülim zübechoh.

⁵Arünü phuruto ke hüpchoh, tüsho mutruktrukbe zheang keakchoh; sherünü arü ke tsühbanü shechoh, ake trükhi chingnü phuruto hüpkhitchoh.

⁶Arü azheangliubonü khim nangde müthsükhuk; arünü athsükhinü arü muphudori. Arü rhimobo ju amülim rhimobo lah, tüsho thiyih bukkhi rhimobo arü khah ching lah.

⁷Arü jing amütsü lim alihchoh, tüsho arünü amülim mülarü thiyih bukshihpü nanachihchoh; arü lümkhibo ju amülim lümkhibo lah, azhikkhi tüsho athsümünim arü limrobo ching lah.

⁸Arünü mungtsü limro mümükheah, tüsho arü limro ching thiyuro müla. Arünü akiukhi limrobo khürangdo lah; ju ching tsahrü shenü she mungtsü mümükheah.

⁹Jumonü thiyuro isa kheaknü limshude lah, tüsho thiyurolungkinü isa mukhiung; isanü ayin aleangchoh, tüsho kheahang! ju ching amiting lah; tüsho ayinatrüm aleangchoh, tüshe amiting ching isa tsahchoh.

¹⁰Isa müktukrü nangde rhü yande ajamchoh, mük mülarü nangde ajamchoh; shuhyini ching nangde animuro isa jing mükhechoh, sühmüh larü bolung isa asherü nangde lah.

¹¹Isa alala kuto nangde ahukchoh; müthrithrümpü nangde isanü ashede tüzhochoh. Isanü thiyuro aleangchoh, tüshe ju ching tümü müla; akhümkhit aleangchoh, tüshe isa kheaknü limshude lah.

¹²Tümüde isanü athsümünimkhibo nü miki hihde lah, tüsho isa neakbonü isa azhihde thiyumütsan jihchoh. Isanü athsümünimkhibo atsütsü isa kheak lah, tüsho isanü isa mülimkhibo mükheahlah:

¹³thsümünimde, tüsho ATUNGPUH reanglode, tüsho isa Thrünpuh yankhi chingnü tsoabahde, junode tüsho azhihkhirhimo akeangyubo hankhi tüsho jurü mulong chingnü akhiukkhi lah.

¹⁴Thiyuro rholode tsodo, tüsho thiyuro-lungki limshu ching zhiplah; tümüde thiyuro ju kiudunglimro ching lunga lah, tüsho alungkikhi mazahkhuk.

¹⁵Thiyuro mülatsan, tüsho amütsü chingnü rholorü thsümünima lah. ATUNGPUHNÜ ha ngüdo, tüsho api masühde kamshih, junangde thiyuro mülakheah.

¹⁶Apinü ju ching sheshe mülakhi ngü, tüsho arungkhirü mülakhi müyinsah; jumonü anihbuh khahnü api kilim akuk ngükhi handarü, tüsho api thiyuro-lungkinü api tholo.

¹⁷Treangkhümbe nangde apinü thiyuro-lungki yih, tüsho api ku kheak akhümkhit kuthran thran; apinü khimmih thsungkheak royimkhi khimmih phuyu, tüsho khimniuniu ching nangde bukakhiukkhi ching hingthülang.

¹⁸Arü rhimobo yande apinü ju ruk jihlobah; api azhihrübo kilim bukakhiukbah, api riribo kilim athrihlobah; keyean lomibo ching apinü athrihlobah.

¹⁹Jumonü aniyüzahlim ATUNGPUH mung trebah, tüsho aniakhiuklimrünü api müretahkhi trebah; tümüde ke bukkhi nangde api arübah, junangde ATUNGPUH pung yünbah.

²⁰Rhokhitrü Zion ching, tüsho Jakob ching arü neak chingnü rholorü kilim api arübah, ATUNGPUHNÜ thachoh.

²¹Tüsho I thsungkheak a, ha arü ki inü tangzüngkhi lah, ATUNGPUHNÜ thachoh: nü kheak lakhi I me, tüsho inü nü mün ching yukjihkhi I yubo nü mün chingnü, yungsho nüsa tsührübo mün chingnü, yungsho nüsa tsührü tsührübo mün chingnü kheakünü ründe tüsho lünnü müchamachih, ATUNGPUHNÜ thachoh.