Read Yimchungru Naga Isa 60 Bible Online

Isa 60 - Yimchungru Naga bible

Isa 60

¹Asürang, yinshang; tümüde nü yo ayin arüdo, tüsho ATUNGPUH müretahkhi nü kheak asürüdo.

²Kheahang, amitingnü alomi lüpdobah, tüsho kheahde amitingkhinü mihtsürübo yihdobah; tüshe ATUNGPUH nü kheak asürübah, tüshe api müretahkhi nü kheak labah.

³Trükshihbonü nü yo ayin lim arübah, tüsho khiungkerübonü nü yo yapsu ayinatrüm lim arübah.

⁴Nü mükbo züngkihang tüsho mükamde kheahang; arü alala rukhüh mukhungchoh, arübo nü kilim arüchoh; nü tsührübo limshu chingnü arübah, tüsho nü tsührübebo arü mütrürü bin kheak shuhbah.

⁵Judüki nünü akheahbah, tüsho zhingzhingde alabah; nü mulong ajanbah tüsho asühachihbah, tümütüsho müthangmüsünkhi keto nü kheak handarübah, trükshihbo lakhit nü kilim arübah.

⁶Mükhebinkhi kemelbonü nü lomi zündobah, Midia tüsho Epha kemel nunubo; Sheba ching yo alala arübah. Arünü suna tüsho jinjinlak handarübah, tüsho ATUNGPUH mung shikhi zhiyukjihbah.

⁷Kedar mihnu boto alala nü ki mukhungbah, Nebaioth namfimihnupungbonü nü tankihbah; arübo I kingaün sadam kheak aleangkhikhukbe labah. Tüsho inü I müretahkhi yam müretahshihbah.

⁸Amo nangde phincho ha tüsho müthrithrümpü arü sap lim phinde arükhi nangde la ha sherü a?

⁹Tümüde keyean lomibonü I aleangbah, Tarshish sangkungbo akhuhlah, nü tsührübo limshu chingnü bedarüpü, arü lung shotoyinchi tüsho suna, ATUNGPUH nü Thrünpuh tüsho Israel Amüsüh Thrünpuh mung thsungkheak, tümütüsho apinü nü müretahshihdo.

¹⁰Khiungkerübonü nü chipibo thsüjihbah, tüsho arü kiulongthsürübonü nü tankihbah; tümüde I bukakhiukkhi ching inü nü kingmülün, tüshe I mung chingnü nü kheak I amüthsüm lakheah.

¹¹Nü chipiripitbo kamruhroro khimshuh-a labah; animung tüsho are mürihde alabah, junangde trükshihbonü arü lakhit nü kilim handarübah, arü kiulongthsürübonü bebah dungde arübah.

¹²Tümüde nü mütankihpü lakhi trükshih tüsho kiulongthsü adükheakbah; jurü trükshihbo shahde thsümünima labah.

¹³Lebanon müretahkhi nü kilim arübah, saipress, juniper, tüsho tsünsang, I arüngyam jak tsüshihpü; tüsho I jing dubopung inü müretahbah.

¹⁴Nü junorü tsühsoniusobonü nü ki mükhümde arübah, tüsho nü mükhemükimrü alala nü jing ki khukningde arübah; arünü nü ki Israel Amüsüh Thrünpuh yo Zion, ATUNGPUH kiuto de ajibah.

¹⁵Nü bahyuka tüsho thraneana shenü mütsahhode lalashe, inü nü lünnü wüntre-müretah kamshihbah, lün alala ching asühachihshihbah.

¹⁶Nünü trükshihbo kheaknü niuhke dukbah, nünü kiulongthsürübo niuh dukbah; tüsho I ATUNGPUH , nü Khümkhitbuh tüsho nü Rhokhitrü, Jakob yo Wuto Khülang ah de nünü amükheahbah.

¹⁷Müwayinchi müthri inü suna handarübah, yinchi müthri shotoyinchi handarübah; sang müthri sunalung, lung müthri yinchi labah. Nü kheahrü thsüde inü Mungtsü lashihbah tüsho nü rhimo-putungrü thsüde thiyuro-lungki lashihbah.

¹⁸Thiyih bukkhi nüsa lomi ching kheaküa muso, thsünimthsüshi nüsa aredung ching müla; nünü nü chipibo ki Akhümkhit tüsho nü chipiripitbo ki Mungshi de ajibah.

¹⁹Kheaküa animuro ani ju nü yo ayin müthsü yungsho azhing ching khinunü nü kilim ayin mütah; tüshe ATUNGPUH lang akheam mülakhi nü yo ayin labah, nü Thrünpuh ju nü müretahkhi labah.

²⁰Nü yo ani kheaküa müyüzah, yungsho khinunü aküdahnü mutsolo; tümüde ATUNGPUH ju nü yo akheam müla ayin labah, tüsho nü tüzhokhi nimungbo arün thsübah.

²¹Nü mihtsürü alala thiyuro-lungki labah; arünü lünnü alomi lubah. Arübo inü akhimkhi dübit, I khah rhimo, junangde I müretahbah.

²²Yamkhün aninibenü guk khülang kambah, tüsho boto anikhühnü sühmüh lakhi trükshih kambah; I ATUNGPUH ; kim dükde ching inü ju nahde arhimobah.