Read Yimchungru Naga Isa 62 Bible Online

Isa 62 - Yimchungru Naga bible

Isa 62

¹Anihbe akuk ngükhi yapsu nangde mütahyi khiungde, tüsho anihbe akhümkhit tsün nangde mütahyi khiungde, Zion thsungkheaknü inü zhikde müla, tüsho Jirusalem thsungkheaknü inü sühakhim mulu.

²Trükshihbonü nü thiyuro-lungki tüsho kiulongthsürü alalanü nü müretahkhi ngübah; tüsho nü mung asonü ajibah, ju ATUNGPUH münnü ajibah.

³ATUNGPUH khah ching nü akheahakham kuthran labah, tüsho nü Thrünpuh khah ching kiulongthsü mürezhingzhing kuthran labah.

⁴Kheaküa nü Amihkhi de müji tüsho nü lomi Azhikkhi de müji; tüshe I Asühkhi Anihbe kheak lah de nü ki jibah, tüsho nü lomi rhangdo de ajibah; tümüde ATUNGPUHNÜ nü kheak asühchoh tüsho nü lomi arhangbah.

⁵Athrününgtsüng khülangnü anünürü kheak yamkhün kamkhi nangde nü thrünrünü nü ki rhangbah, tüsho yamkhün-kambuhnü yamkhün-kambe kheak asühachihkhi nangde, nü Thrünpuhnü nü kheak asühachihbah.

⁶Nü rhübo kheak, O Jirusalem, inü aheangrü zojihlah; nimungroro tüsho tsüngreroro arünü zhikde müla. Nüsa sherü ATUNGPUH ki lümkhitloshihbanü zhikde düla,

⁷tüsho Jirusalem mülaloyi khiungde tüsho alominü müshijihyi khiungde, api sühakhim müjihbeah.

⁸ATUNGPUHNÜ api khah tsülim tüsho Wuto khahnü thiyuchihchimdo: Inü kheaküa nü hi nüsa riri jim thsüpü müjih, tüsho nü khisahkhi chingnü khiungkerünü yukhu muyung;

⁹tüshe sherünü yimlubanü ju tsühbah tüsho ATUNGPUH mung shibah, tüsho sherünü hanmukhungbanü I yo amüsüh yam ching ju yungbah.

¹⁰Hode yüang, chipiripitbo hode yüang, mihtsürübo thsungkheak limro thsakhamang; zünang, limtobo zünang, lungbo moa bahang, mihtsürübo kurungkheak amütsan shuhkihang.

¹¹ATUNGPUHNÜ alomi akheam khiungde zhiyukdo: Zion tsührübe ki thaang, “ Kheahang, nü khümkhitbuh arado; api thsambah anihbuh lung lah tüsho apinü bekhitrü api müngüh belah.”

¹²Arübo ki “Amüsüh Mihtsürü, ATUNGPUHNÜ Rhokhitkhi” de ajibah; tüsho nü ki “Ayimkhitkhi, Mübahyukkhi Kiuto” de ajibah.