Read Yimchungru Naga Isa 65 Bible Online

Isa 65 - Yimchungru Naga bible

Isa 65

¹I mükeokhirünü I yimde alakheah, I müyimrünü I ngükhit. I mung müjirü trükshih kilim inü tha, “ I ha ching lah, I ha ching lah.”

²Inü nimung amuyung mihtsürü azhihrü kilim I khah chungkih, shepü limro amütsü ching nihbuh lümkhi yande tsahcho;

³mihtsürü shepünü I bukakhiukshihde I miro neaneashihcho, shahwünbo ching laksah-a kingaünde tüsho lotaklungbo kheak arhümthüneabe kingaünde;

⁴shepü kiuyukbo lung bincho, tüsho azhing ching kiuyukbo ching lacho; shepünü kheaknu shih tsühcho, tüsho arü phühbo ching athraneanbe kelam la;

⁵shepünü thacho, “ Nü khanguhang, I thüninde darü, tümüde nü thsungkheak a I khide amüsüh lah.” Harübo I nupung ching mokhüh ah, nimung amuyung takkhi mo lah.

⁶Kheahang, I miki ha thrüta lah: Inü zhikde müla, tüshe inü athrihlobah; atsütsü inü nü ki samde athrihlobah,

⁷arü mülimkhibo tüsho arü jipürü mülimkhibo rukhühnü, ATUNGPUHNÜ thachoh; tümütüsho arünü awungbo kheak rhümthüneabe tak, tüsho awung mujukbo kheak I azhihde tha, jumonü ahokhi rhimobo thülünde inü arü thsümüchibah.

⁸ATUNGPUHNÜ ha thachoh: Kurungaso ching yukhu ngüchoh, tüsho arünü tha, “Ha düthsümünim, tümüde ju ching müngühmühi lah,” jumonü I yamlarü thsülimnü inü arhimobah, tüsho arü alala müthsümünim.

⁹Inü Jakob kheaknü tsühsoniuso, tüsho I wungbo yamrüplurüp lurü Juda chingnü handarübah; inü mokhitkhinü ju yamrüplurüp lubah, tüsho I yamlarübo ju ching labah.

¹⁰I yimrü I mihtsürübo thsungkheak Sharon ju mihnu boto yimtsühpung kambah, tüsho Akor jindükhün ju moshibo yappung kambah.

¹¹Tüshe nüsa sherünü ATUNGPUH bahyukcho, shepünü I wung amüsüh mihcho, shepünü kuhi thsungkheak dükhüm kheanga zocho tüsho kuhi-lalim thsungkheak pung ching yukhu yukcho;

¹²inü nukshang kilim nüsa sangkhik thsüjihbah, tüsho nüsa alalanü alaksahpü ki mükhümbah; tümütüsho, küyimki inü ajikhea, nüsanü malo, küyimki inü asukkhea, nüsanü mani, tüshe I miki amütsü tümüanü nüsanü rhimodo, tüsho inü tümü masühnü mokhitdo.

¹³Jumonü Atungpuh THRÜNPUHNÜ thachoh: I yamlarübo atsühbah, tüshe nüsa akhümbah; I yamlarübo ayungbah, tüshe nüsa kethüribah; I yamlarübo asühachihbah, tüshe nüsa achih ngüshihbah;

¹⁴I yamlarübo mulong asühkhinü khün thsübah, tüshe nüsa mulong rozhakkhinü atripbah, tüsho me thsünükhinü atüzhobah.

¹⁵Nüsa mung ju inü mokhitkhi kilim athruajipü zojihbah, tüsho Atungpuh THRÜNPUHNÜ nüsa a asheshihbah; tüshe api yamlarübo ki apinü mung püpünü ajibah.

¹⁶Judüki sherünü lomi ching müngühmühi kheangbanü thiyuro Thrünpuhnü müngühjihbah, tüsho sherünü lomi ching thiyuchihchimbanü thiyuro Thrünpuh damde thiyuchihchimbah; tümütüsho akhuhlim küpkhuk mihdo tüsho I mük kinü rama lah.

¹⁷Tümüde inü yinmibo aso tüsho alomi aso thrünpü thsüchoh; akhuhlim dünjikhibo mülümkhit yungsho lüm ching marü.

¹⁸Tüshe inü athrünkhi ching lünnü asühbah tüsho asühachihbah; tümüde inü Jirusalem ju asühkhi thrünpü thsüchoh, tüsho ha mihtsürü asühpü labah.

¹⁹Inü Jirusalem ching asühachihbah, tüsho I mihtsürü kheak asühbah; ju ching atripkhi düsheak musolo, yungsho lümthsünü zhikhi müla.

²⁰Kheaküa ju ching khungarü nimung anükhüh müla, yungsho ashinbuhrü rhangdung khiukde alabah; tümüde shepü kam 100 ching shebanü athunu khebah, tüsho shepü kam 100 mukhiungbanü muthrumünean khebah.

²¹Arünü thüyambo thsübah tüsho ju ching labah; arünü kurungasolubo thsübah tüsho asobo tsühbah.

²²Arünü thüyambo thsübah püpürü mülashih; arünü yangbah püpürü mütsühshih; tümüde sangdung nimungbo nangde I mihtsürübo nimungbo labah, tüsho inü amokhitkhibonü arü khah rhimo ching ruhde asühachihbah.

²³Arünü akeangkeang ching mürhimo, yungsho thsümütsü thsungkheak tsührü müzübe; tümüde arübo ATUNGPUHNÜ müngühjihkhi münü labah, tüsho arü tsühsoniusobo she ju ruk labah.

²⁴Arünü müjiyide inü alobah, arü asukachihde lachoki inü asobah.

²⁵Rimre tüsho namfimihnunu rukhühnü yimtsühbah, kekhüzünü moshipung nangde hineang tsühbah; tüshe phuruto jim a asungthulung labah! Arübo I wung amüsüh alala kheak muyuri yungsho müthsümünim, ATUNGPUHNÜ thachoh.