Read Yimchungru Naga Isa 7 Bible Online

Isa 7 - Yimchungru Naga bible

Isa 7

¹Uzzia tsührü, Jotham tsührü Ahaz, Juda kiulongthsüpuh nimungbo ching, Siria kiulongthsüpuh Rezin tüsho Remalia tsührü Israel kiulongthsüpuh Pekanü Jirusalem yanpü wutu, tüshe müyankhuk.

²Küyimki Sirianü Ephraim kheak arihkhi David yamkhünnü asokhea, Ahaz tüsho api mihtsürü mulong ju murung ching sangdungbo apungnü ayünkhi nangde ajan.

³Judüki ATUNGPUHNÜ Isaia ki tha, Ahaz shorupü nü tüsho nü tsührü Shear-jashub Müsühmürarü Lu limto kheak akube kekung münitkhi-ru akheam kheak yüang,

⁴tüsho api ki thaang, Aniang, zhikde laang, dütre, tüsho Rezin le Siria tüsho Remalia tsührü müküpde bukakhiukkhi, ha mozhuh aniukheamkhi mahne dünkheaknü nü mulong düjaniu.

⁵Tümütüsho Siria lung Ephraim tüsho Remalia tsührünü nü azhihde amütsü tha,

⁶Isanü Juda azhihde wutubah Jirusalem yanabahanü tüsho isa thsungkheak yankhia luanü tüsho ju ching Tabeel tsührü kiulongthsüpuh kamshihanü;

⁷jumonü A TU N GPU H THRÜNPUHNÜ ha thachoh: Hoju akuk müngü, tüsho müdünji.

⁸Tümüde Siria ku ju Damaska, tüsho Damaska ku ju Rezin. ( Kam rukrükheak phüngü dükeak chingnü Ephraim niukmüzütbah, junangde mihtsürü mükhede akambah.)

⁹Ephraim ku ju Samaria, tüsho Samaria ku ju Remalia tsührü. Nünü akin ching düküngde müzhipsho, nü judü lang müzhip.

¹⁰Kheaküshe ATUNGPUHNÜ Ahaz ki tha,

¹¹ATUNGPUH nü Thrünpuh ki amütsan khülang kheangang; ju Ashe-lomi nangde asük yungsho yinmi nangde achang lashang.

¹²Tüshe Ahaz nü tha, Inü mükheang, tüsho inü ATUNGPUH rükmaki.

¹³Judüki Isaia nü tha: “ Kheakü aniang, O David yamkhün! Nü thsungkheaknü mihtsürü khikhi khide ninilah de, nünü I Thrünpuh she keaksahshihba de?

¹⁴Jumonü ATUNGPUHNÜ nü kilim amütsan khülang jihbah. Kheahang, anünürü khülang mübünkeangde akambah tüsho tsührü khülang zübebah, tüsho api mung Immanuel de ajibah.

¹⁵Apinü amütsü reanglopü tüsho atsü mokhitpü mükheahkhi kim chingnü apinü niuhke-kingkung tüsho mukhuke tsühbah.

¹⁶Tümüde azübuhnü amütsü reanglopü tüsho atsü mokhitpü mümükheahyide, nünü kiulongthsürü mahne trede alakhi lomi zhikrangkhündo akambah.

¹⁷Asiria kiulongthsüpuh Ephraim, Juda chingnü chamachihkhi nimungnü ründe marükhi hadürü nimungbo nü tüsho nü mihtsürü tüsho nüsa jipürü yamkhün kheak ATUNGPUHNÜ handarübah.”

¹⁸Ju nimung ching Ijip kenü ching lakhi somünak tüsho Asiria lomi ching lakhi mukhu thsungkheak ATUNGPUHNÜ amütbah.

¹⁹Arü alala arübah tüsho jindükhün lunghü, lungrhün, ayangrungbo tüsho rimkiubo alala kheak binbah.

²⁰Ju nimung ATUNGPUHNÜ nüsa kuyü, jingnam tüsho nüsa mükhühnam she ahütshihpü ke thripkhühnü kuyüliuh — Asiria kiulongthsüpuh — muloa handarübah.

²¹Ju nimung khürünü moshi nunu khülang tüsho namfimihnu mahne arhangnü akambah,

²²tüsho jurünü suhdahde ajihkhinü niuhkekingkung tsühbah; tümüde mihbüm aban lomi ching aninga larünü niuhke-kingkung tüsho mukhuke tsühbah.

²³Ju nimung kurungaso 1000 lapung, shotoyinchi 1000 dünkhi ju, khingphu tüsho ayangrungnü chakdoabahbah.

²⁴Khürünü sanglüh tüsho hühzo shuhbah ju ching yübah, tümüde alo alala khingphu tüsho ayangrungbo labah;

²⁵tüsho thuwuh müzheannü awochakkhi wungbo alala ching khingphu tüsho ayangrungbo trekhinü nünü ju ching müyü; tüshe jurübo moshi tüsho namfimihnu mungpung kambah.