Read Yimchungru Naga Isa 8 Bible Online

Isa 8 - Yimchungru Naga bible

Isa 8

¹Judüki ATUNGPUHNÜ I ki tha, Lungbeak ato khülang luang tüsho ju kheak atotonü thrütang, “Maher-shalal-hash-baz,”

²tüsho I thsungkheaknü mulonglamkhi thiyumütsan thsürü thsüpü amükeambuh Uria le Jeberekia tsührü Zekaria büne bedarang.

³Tüsho inü I yamkhünbe kheak nung tüsho alibenü tsührü labah athrürü khülang zübejih. Judüki ATUNGPUHNÜ I ki tha, api mung Maher-shalal-hash-baz de jiang;

⁴tümüde khungarünü “Abuh” yungsho “Aba” de ajipü mümükheahyide Damaska lakhit tüsho Samaria ching yankhikhi kukrukbo Asiria kiulongthsüpuhnü lude atsobah.

⁵ATUNGPUHNÜ I ki asuklo:

⁶Tümütüsho ha mihtsürübonü keamde abukkhi Shiloa ke thsunglo, tüsho Rezin le Remalia tsührü trekhinü niuthünak;

⁷jumonü ju azhihde ATUNGPUHNÜ Ayung Keking ato, Asiria kiulongthsüpuh tüsho api müretahkhi alala lude atuchoh; keru alala kumung yükihbah tüsho ayung alala bukmibah;

⁸keking nangde Juda ching zünde ayüzahbah, tüsho abukkhitbah, junü ahung khiungbah; tüsho aghi chutreakkhinü nüsa lomi apunglim mibah, O Immanuel.

⁹Rukhüh mukhungang, nüsa mihtsürübo, tüsho treang; aniang, nüsa limshu lomi alala; keochihpü thsakhamang tüsho treang; keochihpü thsakhamang tüsho treang!

¹⁰Rukhühnü lümkhi thsang, tüshe ju akeangkeang kambah; thiyu thaang, tüshe ju müzhip, tümüde Thrünpuh isa lung lah.

¹¹Tümüde api khah I kheak müküpde alachoki ATUNGPUHNÜ I ki ha tha, tüsho ha mihtsürü limro ching mütsahpü I ki tha:

¹²Ha mihtsürünü aramyu thakhi ching dübe, tüsho arünü atrekhi ching dütre.

¹³Tüshe Wuto ATUNGPUH ki nünü amüsüh ah de lümang; nünü api ki trepü lah, nünü api ki atrearangpü lah.

¹⁴Api ju arüngyam khülang labah; Israel yamkhün ane chido thsungkheak api jingmükhelung khülang labah — Jirusalem ching larü thsungkheak azheang tüsho qimürip labah.

¹⁵Tüsho arü bolung ahihdo jing mükhebah; arü alungbah tüsho azhakbah; arü aphuhbah tüsho lude atsobah.

¹⁶Rhangdung-yumütsan rhükruang, I jingyanrü bolung thsangyukhi yümkihang.

¹⁷Inü ATUNGPUH aleangbah, shepü miro Jakob yamkhün kheaknü jikla, tüsho inü api kheak mulonglambah.

¹⁸Kheahang, I tüsho Zion Müzüng kheak lakhi ATUNGPUHNÜ I kilim jihkhi tsührübo Wuto ATUNGPUH kilimnü Israel ching amütsan tüsho mütsanmükhibe lah.

¹⁹Küyimki mihtsürübonü dapdaprururü mesherü tüsho me-larü ki keoang de nü ki thabanü, mihtsürübonü arü Thrünpuh ki mükeobea de? Tümüde arhang larü thsung thsüde asherü ki keokhicho?

²⁰Yakzan tüsho rhangdung-yumütsan thsungkheaknü! Tsükjide, sherünü ha ruk thachonü yapsu müngü!

²¹Arü alomi hode tode lümthsünüde tüsho khümde ayübah; küyimki arü akhümbanü, arü bukakhiukbah tüsho arü kiulongthsüpuh le arü thrünpuhbo athrubah. Arü mirobo mutuh lim abinbah,

²²yungsho arünü alo lim kheahbah, tüshe lümthsünü tüsho amiting thsünü lang angübah; tüsho arü ju amiting akheah ching nimyukbah.