Read Yimchungru Naga Isa 9 Bible Online

Isa 9 - Yimchungru Naga bible

Isa 9

¹Judüalalashe lümthsünü ching larü thsungkheaknü kheaküa amiting mülade alabah. Akhuhbe kim ching apinü Zebulun lomi tüsho Naphtali lomi bahyuk, tüshe arübe kim ching keto limro, Jordan hobah alomi, khiungkerü lapung Galilee müretahshihbah.

²Amiting ching tsahrü mihtsürünü ayin ato khülang ngüdo; amiting lomi ching larü kheak ayin tahkihdo.

³Nünü trükshih wüh bushih, nünü asühpü alü kamshih; yimluchoki asühkhi nangde arünü nü miki asühachihchoh, mihtsürübonü ayankhikhi kukruk chamchoki asühkhi nangde lah.

⁴Tümüde arü nolokhi sangkaplak tüsho arü dubuh ajapkhi sangdüdam, arü junokhi tso, Midiarü kukkhi nimung nangde nünü yihshak.

⁵Tümüde thirithsürü jingkhümpübo tüsho thiyih kihkhi khimmihbo alala mokhih nangde atakbah.

⁶Tümüde isa thsungkheak tsührü khülang zübea lah, tsührü khülang isa kilim jih-a lah; kiulongthsü sühmüh api dubuh kheak kihlah tüsho api mung Amüyinsahbe Lümthiyan-jihrü, Wuto Thrünpuh, Akheam mülakhi Abuh, Mungtsü Kiulongthsürü de ajibah.

⁷Api kiulongthsü sühmüh mutuklode azokihbah, tüsho ju ching akheam mülakhi mungtsü David tüsho api kiulongthsü-binkiu thsungkheak labah. Thiyuro tüsho thiyuro-lungkinü ha kimnü ründe tüsho kamruhroro apinü arhimobah. Wuto ATUNGPUH mulungkhinü ha rhimobah.

⁸ATUNGPUHNÜ Jakob azhihde thiyu khülang yüshih, tüsho ju Israel kheak yükih;

⁹tüsho mihtsürü alalanü ju mükheahbah — Ephraim tüsho Samaria ching larü — tüshe kükheangde tüsho mulong zhipzhipde arünü thachoh:

¹⁰“ Lotaklungbo lungdo, tüshe isanü akheankhi lungbonü athsübah; sangzhinasodung kiukheamdo, tüshe isanü jurü müthri cedarbo yukbah.”

¹¹Jumonü ATUNGPUHNÜ arü azhihrübo bemusu, tüsho arü riribo rhumusu,

¹²Siriarü aniakhiuklim tüsho Filistiarü aniyüzahlim, Israel muyupü arü mün kaa lah. Ha alala thsungkheaknü api bukakhiukkhi rholode mutso; api khah kheakü khiungde chungkhih-a lah.

¹³Mihtsürübonü arü shikbuh api kilim manguh, yungsho Wuto ATUNGPUH müyim.

¹⁴Jumonü ATUNGPUHNÜ Israel kheaknü aku tüsho amo, ashidung khah tüsho kiupung nimung khülang chingnü yihshakabah —

¹⁵azothsürübo tüsho atorübo ju aku, tüsho akeangyu thsangyurü wukihrübo ju amo;

¹⁶tümüde sherünü ha mihtsürübo bekheanü arübo bephülapdo, tüsho sherübo arünü abekheanü yingyingde zojih.

¹⁷Jumonü ATUNGPUHNÜ arü athunu mihtsürübo kheak mihmuzho mülakheah, yungsho arü mürerübo tüsho khimoberü kheak muzhomüyi mülakheah; tümüde mihbüm abannü Thrünpuh mümükheah tüsho amütsü-rhimorü lakheah, tüsho arü mün abannü mahkhapkhi yu tha. Ha alala thsungkheaknü api bukakhiukkhi rholode mutso, api khah kheakü khiungde chungkih-a lah.

¹⁸Tümüde mihbukmuyuknü mo nangde takchoh, khingphu tüsho ayangbo aniuabahchoh; hanü murung achak takkihchoh, tüsho mokhüh nangde yükihchoh.

¹⁹Wuto A TU N GPU H bukakhiukkhi hode, alomi takkheah, tüsho mihtsürübo mokhih nangde kam. Khülangnü khülang maningshih.

²⁰Arünü tsülim aneam tüshe judü lang khümde alakheah, tüsho arünü huzulim aneam, tüshe bukmüthsü; arünü nihbuh tsührü shih she tsüh;

²¹Manasenü Ephraim tsüh, Ephraimnü Manase tsüh, tüsho rukhühnü arünü Juda azhih. Tümüde ha alala thsungkheaknü api bukakhiukkhi rholode mutso; api khah kheakü khiungde chungkih-a lah.