Read Yimchungru Naga Levi 10 Bible Online

Levi 10 - Yimchungru Naga bible

Levi 10

¹Aron tsührübo Nadab tüsho Abihu, ane abande mophuru lua mo takkihbahle rhümthüneabe yuk, tüsho ju ATUNGPUH kilim jih. Tüshe mo ju mümüsühkhi lakheah, tümüde ATUNGPUHNÜ ane ki ju jihshihpü thiyukhüm müjih.

²Tüsho ATUNGPUH kilimnü mo akhiukbah ATUNGPUH miki ane taksahabah.

³Jumonü Mosanü Aron ki tha, “ATUNGPUHNÜ athakhi ju ha: I phünide arürü abannü I müsühkhitkhi kheak wüntre jihbeah; tüsho mihtsürübo alala ki I müretahshihbeah.” Tüshe Aronnü düsheak makhiukde la.

⁴Mosanü Aron künirü, Uzziel tsührübo Mishael tüsho Elzaphan büne ji tüsho tha, “Ha ching arübah nü keoniorü mibo amüsüh arüngyam chingnü hande yünü khimyam aleanglim zoang.”

⁵Mosanü thiyukhüm jihkhi nangde, anenü arü tüsho ashemi ju pangkhümpü kheaknü thoa shuhbah khimyam aleanglim wukhiuk.

⁶Tüsho Mosanü Aron le atsührüne Eleazar tüsho Ithamar ki tha, “ Nüsa mulong rozhaklah de akheahkhitshihpü thsüde nüsa ku düdukiu, tüsho khimmih dürukrüp, jude thsüsho nüsa ashebah tüsho ATUNGPUH bukakhiukkhi boto alala kheak yükihbah. Tüshe nü keoniorü tüsho Israelrü yamkhün alalanü, ATUNGPUHNÜ monü ataksahshihkhi dünkheak mulong rozhakpü kuklah.

⁷Arüngyam ripit kinü dütso, jude thsüsho nüsa ashebah, tümüde ATUNGPUHNÜ nüsabo mujude-müsühkhitkhi müdangke nüsa kheak lah.” Jumonü Mosanü athakhi nangde arünü rhimo.

⁸ATUNGPUHNÜ Aron ki tha,

⁹“ Nü tüsho nü tsührübonü yukhu yungsho püpü amüshangbe yungbah I shorupung khimyam ching düyüzah; jude thsüsho, nüsa ashebah. Ha nüsa lün alala ching yakzan khülang labah.

¹⁰Nünü amüsüh tüsho amümüsüh dükeak, tüsho amüsühkhitkhi tüsho mümüsühkhitkhi dükeak shihcham thsübeah;

¹¹tüsho Mosa hode ATUNGPUHNÜ arü kilim yakzanbo jihkhi nüsanü Israelrü ki huhang.”

¹²Mosanü Aron tüsho atsührü aningkhi Eleazar le Ithamar ki tha, “ATUNGPUH kilim taka kingaünkhi chingnü aningkhi hi kingaün ju luang tüsho phaüm muyukde kingaünpung mungyeannü tsühang; tümütüsho ha kingaün khide amüsüh.

¹³Ha amüsüh dangpung chingnü tsühang, haju ATUNGPUH kilim taka kingaünkhi chingnü nü tüsho nü tsührübo dün ah; tümüde ha inü thiyukhüm jih.

¹⁴Tüsho amükeamrübo dünkheaknü akhüh le apho müleamde ATUNGPUH kilim jihkhi ju nü tüsho nü tsührübonü atsühpü kuklah. Nüsanü ju amüsüh dangpung khürü chingnü tsühang. Ha kingaünbo ha Israelrü mungtsü kingaün chingnü ayihkhitkhi nü tüsho nü tsührübo shihcham ah.

¹⁵Arung kingaünkhi apho tüsho müleamde kingaünkhi akhüh ju, ATUNGPUH miki müleamde kingaünpü thsüde taka kingaünkhi amüdang lung handarübah, tüsho ATUNGPUHNÜ thiyukhüm jihkhi nangde, ha nü tüsho nü tsührübonü lünnü rhimode ayüpü yakzan labah.”

¹⁶Tüsho Mosanü neak kingaünpü mihnu dünkheak düshihde atsangashu tüsho ju takabah-a lakheah. Ju dünkheaknü Aron tsührübo aninga lakhi Eleazar le Ithamar büne ki bukakhiuk, tüsho tha,

¹⁷“Tümüde nüsanü neak kingaünkhi amüsüh dangpung chingnü mütsühkhea? Tümüde ha khide amüsüh, tüsho boto neak dünthsükhishihpü thsüde ATUNGPUHNÜ nüsa kilim jihkheah.

¹⁸Kheahang! Ju thiyih arüngyam alunglim hande mazah-a lah; inü thiyukhüm jihkhi nangde nüsanü arüngyam chingnü atsühpü lado.”

¹⁹Tüsho Aronnü Mosa ki alo, “ Kheahang, khihni arünü neak kingaün tüsho taka kingaünkhi ATUNGPUH kilim jihdo; judüalalashe I kheak atrebe dünjia lah! Inü neak kingaünkhi khihni tsühkhülaa, ATUNGPUH miki aleangkhikhukbe laba shi?”

²⁰Küyimki Mosanü ju sokhea, api reangkeamabah.