Read Yimchungru Naga Levi 13 Bible Online

Levi 13 - Yimchungru Naga bible

Levi 13

²Küyimki mihtsürü khürü pang kheak abümkhi yungsho jukrüpa yungsho areak kihba, tüsho ju pang küp kheak apham tukthsü kambanü, ju buh amükeambuh Aron yungsho atsührü amükeamrü khülang kilim bedarübah.

³Amükeambuhnü apang küp kheak kihkhi mü ju kheahramde akheahbah; tüsho mü akhiukkhi ching anam müyedo kambahle mü ju pang küp kheaknü sükde yüzah-a lasho, ju apham tukthsü labah; küyimki amükeambuhnü kheahramde akheahbanü api mümüsüh de athabah.

⁴Tüshe pang küp kheak areak ju müyesho, tüsho küp lunglim müyüzahsho, tüsho ju kheak anam mümüyesho, amükeambuhnü tukthsü kihkhi mihtsürü ju nimung thüne thsungkheak büthsüde azobah.

⁵Nimung athüne nipü amükeambuhnü, api kheahbah amük ki mü ju küp ching mubude ju ruk lang lasho, jushu she apinü tukthsübuh ju nimung thüne büthsüde azobah.

⁶Kheaküshe amükeambuhnü api nimung athüne nipü kheahjihbah, tüsho mü ju amürung thsüde küp ching mubusho, amükeambuhnü api amüsüh de athabah; ju küp züngrüpkhi lang ah; tüsho apinü khimmih müsühabahbah, tüsho amüsüh kambah.

⁷Tüshe amükeambuhnü kheahjihbah amüsüh ah de athashu mü ju küp ching bua lasho, kheaküshe api amükeambuh kilim alode ayübah.

⁸Kheaküshe amükeambuhnü api kheahjihbah, tüsho ju bua lasho ju buh ju mümüsüh de athabah; ju apham tukthsü ah.

⁹Küyimki mihtsürü khürü apham tukthsü akhiukbanü, api amükeambuh ki bedarübah;

¹⁰amükeambuhnü akheahjihbah, tüsho küp kheak mü ju müyedo kamde nam müyede kamsho, tüsho nütlosho,

¹¹ju beshebe apham tukthsü ah, tüsho amükeambuhnü api mümüsüh de athabah; apinü ju buh büthsüde muzo, tümüde api mümüsüh.

¹²Tüsho aphamnü küp mide, tukthsübuh ju aku chingnü amüphü khiungde misho,

¹³kheaküshe amükeambuhnü api kheahlobah, tüsho aphamnü apang müyedo kamde mithülama lasho, api ju ngudo de athabah; tüsho api müsühlah.

¹⁴Tüshe judüchoki nütlosho, api mümüsüh.

¹⁵Amükeambuhnü api akheahlojihbah, tüsho apinü anütlokhi ngüsho ju buh mümüsüh de athabah. Anütlokhi amütsan apham tukthsü, api mümüsühkhi kambah.

¹⁶Tüshe küyimki mü ju ngude müyedo kamde arübanü, api amükeambuh kilim yübah,

¹⁷amükeambuhnü api kheahjihbah, tüsho mü ju müyedo kama lasho api amüsüh ah, jumonü amükeambuhnü tukthsübuh ju müsühlah de athabah.

¹⁸Küyimki khürü pang küp kheak phanjakkhuh akhiukbahle angubanü,

¹⁹tüsho phanjakkhuh akhiukkhi kheak müyede bümsho yungsho mamde kamsho, ju amükeambuh huhbah;

²⁰amükeambuhnü akheahjihbah, tüsho ju küp alunglim sükde ngüsho tüsho nam müyedo kamsho, amükeambuhnü api mümüsüh de athabah; ju phanjakkhuh chingnü kinkhitde akhiukkhi apham tukthsü ah.

²¹Tüshe amükeambuhnü kheahbah nam mümüyesho tüsho küp alunglim yungde amürung thsüde lasho, amükeambuhnü api nimung thüne büthsüde azobah;

²²tüsho ju küp ching bua lasho, amükeambuhnü api mümüsühde athabah; ju apham tukthsü ah.

²³Tüshe ju mümüthridü lang lasho tüsho mubusho, ju mü akhiukbah angukhi areak lang ah, tüsho amükeambuhnü api müsühlah de athabah.

²⁴Khürü pang monü takbahle müyedo nütlosho yungsho mamde kamsho,

²⁵amükeambuhnü api kheahjihbah, mü ching anam müyedo kama lasho tüsho küp alunglim sükde lasho, ju atakkhi chingnü athsukhi apham tukthsü ah tüsho amükeambuhnü api mümüsüh de athabah.

²⁶Tüshe amükeambuhnü kheahbahle nam ju müyedo mükamsho tüsho küp alunglim yungde amürung thsüa lasho, amükeambuhnü api nimung thüne büthsüde azobah.

²⁷Amükeambuhnü nimung athüne nipü kheahlobah, tüsho ju bua lasho apham tukthsü ah, tüsho amükeambuhnü api mümüsühde athabah.

²⁸Tüshe areak ju mümüthridü lang lasho tüsho mubude amürung thsüa lasho, ju apham tukthsü yung. Amükeambuhnü api müsühlah de athabah, tümütüsho ju atakkhi mü ching areak lang ah.

²⁹Küyimki athrürü yungsho aliberü ku kheak yungsho mükhüh kheak mü akhiukbanü,

³⁰amükeambuhnü tukthsü ju akheahbah; ju küp alunglim sükde ngüsho, tüsho ju ching nam yungsho kuyü kelülü kamde abükhabündo lasho, amükeambuhnü api mümüsüh de athabah; ju apham tukthsü ah, tüsho apinü ju buh mümüsüh de athabah.

³¹Amükeambuhnü mükhüt tukthsü ju kheahbahle küp alunglim sükde müngü tüshe kuyü amürak mükihsho, amükeambuhnü mükhüt kihbuh ju nimung thüne büthsüde azobah,

³²nimung athüne nipü amükeambuhnü tukthsü kheahjihbah; tüsho mükhüt ju bude müyüde tüsho kuyü kelülü mükihsho, tüsho mükhüt ju küp alunglim yungde ngüsho,

³³jushua azangrü hütabahbah, tüshe mü kihpung a mühüt; tüsho amükeambuhnü tukthsübuh ju kheaküshe nimung thüne büthsüde azobah;

³⁴nimung athüne nipü amükeambuhnü mükhüt ju akheahbah, tüsho küp ching bude müyüa lasho tüsho küp alunglim sükde müngüsho, amükeambuhnü api müsühlah de athabah; apinü khimmih müsühbah, tüsho müsühde akambah.

³⁵Tüshe api müsühkhitshu mükhüt ju küp ching bua lasho,

³⁶amükeambuhnü api kheahbah, tüsho mükhüt ju küp ching bua lasho, amükeambuhnü kuyü kelülü kamkhi yimpü yihnüpü müla; api mümüsüh.

³⁷Tüshe mükhüt ju kheahbah amük ki kuyü amürak akhiuka lasho tüsho mükhüt ju ngua lasho, api müsühlah; tüsho amükeambuhnü api müsühlah de athabah.

³⁸Küyimki athrürü yungsho aliberü küp kheak areak amüye kihbanü,

³⁹amükeambuhnü ju mihtsürü kheahbah, areakbo ju buliudo müyesho, ju lapha küp kheak akhiukkhi lang ah; mihtsürü ju amüsüh ah.

⁴⁰Mihtsürü khülang aku kheaknü kuyü ayoabahbah rakrak kamkam she api amüsüh ah.

⁴¹Tüsho api kingkang le müchip kheaknü kuyü adanbah akingkang rakrakde kamkam she api amüsüh ah.

⁴²Tüshe ku rakrakkhi yungsho kingkang rakrakkhi kheak mamde mü-reak kihsho, ju aku yungsho kingkang rakrakkhi kheaknü apham akhiukkhi ah.

⁴³Jumonü amükeambuhnü api kheahbah, tüsho ku rakrakkhi yungsho kingkang rakrakkhi kheak mamde mü nütlokhi ju, küp kheak apham akhiukkhi nangde ngüsho,

⁴⁴api ju apham kihrü mihtsürü ah, api mümüsüh; amükeambuhnü api mümüsüh de athabah; api mü ju aku kheak kihlah.

⁴⁵Mihtsürü shepü apham tukthsü kihbanü khim arukthünakkhi phuyubah, tüsho kuyü mushude mün hümbahle zhiang, “ Mümüsüh, mümüsüh!”

⁴⁶Api tukthsü kih khiungde api mümüsühkhi labah, tüsho api püpürü kheaknü khanguhde yübah lapung aleanglim azangrü labah.

⁴⁷Küyimki mokri shihnam yungsho azhingzhing khimmih kheak kihbanü,

⁴⁸yungsho azhingzhing khim yungsho shihnam khim akeakkhi le amürhekhi yungsho shihküpnü athsükhi tümükhüh kheak kihbanü,

⁴⁹mürangkhüh jurü kheak phüyakde yungsho mamde lasho, ju abube mokri tukthsü ah, tüsho ju amükeambuh ki huhbeah.

⁵⁰Amükeambuhnü akheahbah tüsho kukruk ju nimung thüne büthsüde azobah.

⁵¹Kheaküshe apinü nimung athüne nipü kheahbah, tüsho mokri ju jurübo ching bua lasho, kukruk ju mümüsüh.

⁵²Akeakkhi yungsho amürhekhi shihnam yungsho azhingzhing khim yungsho shihküpnü athsükhi kheak tukthsü kihsho takabahbah, tümüde ha abube mokri tukthsü ah; ha mo ching takbah.

⁵³Tüshe, amükeambuhnü kheahbahle kukrukbo kheak ju mokri mübua lasho,

⁵⁴apinü müsühabahpü thiyukhüm jihbah tüsho kheaküshe nimung thüne büthsüde azobah.

⁵⁵Jushu mü ju müsühabahbah apinü akheahbah, tüsho mübua lalashe aphü mümüthria lasho, ju kheaküshe mümüsüh; mokri akhiukkhi ju kukruk mi kheak yungsho alunglim thsüthsü nünü monü takabahang.

⁵⁶Tüshe amükeambuhnü kheahlobahle, mokri ju amürung thsüa lasho, apinü ju khim yungsho shihküp chingnü rukkhita bahbah.

⁵⁷Jushu, mokri ju kukrukbo kheak akhiuklosho, ju abube tukthsü ah, tüsho ATUNGPUHNÜ kukruk ju monü atakbah.

⁵⁸Apinü kukruk ju müsühabahbahle areak kheamsho, apinü müsühloa bahbah, tüsho ha amüsüh labah.

⁵⁹Jumonü ha, mokri khimmih kheak kihkhi dünkheak, shihnam khim yungsho azhingzhing khim yungsho shihküpnü athsükhi tümükhühbo dünkheak yakzanbo ah; hanangde amüsüh yungsho amümüsühkhi dünkheak thashihpü thiyuzüng lah.