Read Yimchungru Naga Levi 14 Bible Online

Levi 14 - Yimchungru Naga bible

Levi 14

²Ha aphamrü müsühkhit nimung thsungkheaknü yakzan labah. Api amükeambuh kilim bedarübah,

³amükeambuhnü binpung chingnü api bebahle wungdo wukhiukbah akheahbah. Tukthsü ju thsüngua lasho,

⁴amükeambuhnü wuhnu arhang amüsüh mahne handarüpü thiyukhüm jihbah, ju lung cedar sang, shungliu amürüm, tüsho monam sangkhah;

⁵jushu amükeambuhnü wuhnu khülang ju alo phüh ching ke khipleangkhi zahkhi mi kheaknü alaksahpü thiyukhüm jihbah.

⁶Tüsho apinü wuhnu arhang lung, cedar sang, shungliu amürüm tüsho monam le alaksahkhi wuhnu thiyih ching yuka thsambah.

⁷Apinü apham tukthsü chingnü amüsühkhitbuh mihtsürü kheak thiyih thüne ki rhakkihbah, jushu api müsühlah de athabah, tüsho rhangdung lakhi wuhnu ju kimtsüh ching phinde atsoshihbah.

⁸Apham kihbuhnü akhimmihbo müsühbahle ku hütabahbah, tüsho kemüyihbah; jushu api amüsüh kambah. Api binpung ching yüzahpü kuklah, tüshe anihbuh khimyam aleanglim nimung thüne labeah.

⁹Kheaküshe apinü nimung athüne nipü akuyü, mükhühnam, müknam, tüsho apang kheak kihkhi nam alala hütabahbeah; apinü khimmih müsühbahle kemüyihbah, tüsho api müsühde akambah.

¹⁰Tüsho nimung atizheah nipü apinü lapha mükihkhi namfimihnunu kam khülang bankhi dre khülang, hi kingaün thsungkheaknü ayikangkang atsüdak muluk shihcham thürü ching shihcham mahsam lung müdangke thsürubah, tüsho müdangke pungdüchi shihchamkhüh handarübah.

¹¹Amükeambuhnü mihtsürü tüsho kingaünbo lubahle ATUNGPUH shorupung khimyam ripit ki yübah.

¹²Jushu amükeambuhnü namfimihnunu pung khülang tüsho müdangke pungdüchi shihchamkhüh lubah ashaklo kingaün jihbah; apinü jurü müleamde ATUNGPUH kilim amükeambuh thsungkheak jihbah.

¹³Tüsho apinü namfimihnunu ju neak kingaün tüsho taka kingaünpü laksahpung, amüsüh dangpung chingnü alaksahbah, tümüde neak kingaün ju amükeambuh yo ah, junangde ashaklo kingaün she api yo thsübah. Ju khide amüsüh ah.

¹⁴Amükeambuhnü namfimihnunu thiyih khürü lubahle müsühkhitpü lakhi mihtsürü tsülim nuku müzhean, tsülim khahkutopü, tüsho tsülim jingkutopü kheak yihkihbah.

¹⁵Amükeambuhnü müdangke pungdüchi shihcham khürü lubahle anihbuh müyi huzulim bukkihbah,

¹⁶ju ching tsülim yingkhing athsoyuka pangbahle müdangke khürü ATUNGPUH miki thüne ki rhakbah.

¹⁷Apinü amüyi ching yo müdangke tüsho namfimihnunu thiyih khürü ashaklo kingaün lubahle müsühkhitpü lakhi mihtsürü tsülim nuku müzhean, tsülim khahkutopü, tüsho tsülim jingkutopü kheak yihkihbah.

¹⁸Apinü aningkhi müdangke amüyi ching yo lubahle müsühkhitpü lakhi mihtsürü ku kheak yihkihbah, hanangde apinü ATUNGPUH miki dünthsükhia bahjihbah.

¹⁹Amükeambuhnü müsühkhitpü lakhi mihtsürü thsungkheak api mümüsühkhi chingnü müsühkhitpü dünthsükhide neak kingaün jihbah. Jushu apinü taka kingaünpü laksahbah;

²⁰tüsho amükeambuhnü taka kingaün tüsho hi kingaünkhi kingaün sadam kheak jihbah. Hanangde amükeambuhnü api thsungkheak dünthsükhibah, tüsho api ju amüsüh kambah.

²¹Tüshe mihtsürü ju zhochihrü thsübahle ju dükhüh müjihkhuksho, apinü anihbuh dünthsükhipü thsungkheaknü namfimihnunu pung khülang lang anihbuh dünkheak ashaklo kingaün handarübah, ju amükeambuh thsungkheaknü ATUNGPUH kilim müleamde ajihkhi labah, tüsho hi kingaün jihpü ayikangkang atsüdak muluk shihcham thürü ching khülang lung müdangke tüsho müdangke pungdüchi shihchamkhüh jihbeah;

²²kheaküshe apinü ajihkhukpü lakhi müthrithrümpü mahne yungsho chithüreku mahne jihbeah; khülang ju neak kingaünpü tüsho püpü ju taka kingaünpü thsungkheak.

²³Tüsho apinü nimung atizheah nipü anihbuh müsühkhitpü thsüde ashorupung khimyam ripit ki, ATUNGPUH ki jurübo handarübah.

²⁴Amükeambuhnü ashaklo kingaün jihkhi namfimihnunu tüsho müdangke pungdüchi shihchamkhüh lubahle müleamde ATUNGPUH kilim jihbah.

²⁵Apinü namfimihnunu laksahbahle athiyih khürü lubah tüsho ju mihtsürü tsülim nuku müzhean, tsülim khahkutopü, tüsho tsülim jingkutopü kheak yihkihjihbah.

²⁶Amükeambuhnü müdangke khürü amüyi huzulim bukkihbah

²⁷tüsho tsülim yingkhingnü müdangke khürü ATUNGPUH miki thüne ki rhakbah.

²⁸Apinü ashaklo kingaün thsungkheak thiyih yihkihpung kheak lang müdangke khürü yihkihbah: ju mihtsürü tsülim nuku müzhean, tsülim khahkutopü, tüsho tsülim jingkutopü kheak yihkihbah;

²⁹tüsho aningkhi müdangke amüyi ching yo ju apinü mihtsürü ku kheak bukkihbah tüsho hanangde ATUNGPUH miki müsühkhitde dünthsükhibah.

³⁰Tüsho apinü akukkhi müthrithrümpübo yungsho chithürekubo jihbah,

³¹khülang neak kingaün tüsho püpü ju taka kingaünpü thsungkheak hi kingaün lungnü ajihbah. Hanangde amükeambuhnü api dünkheak amüsühkhitpü ATU NGPUH miki dünthsükhibah.

³²Ha apham tukthsü kihrü shepünü nihbuh müsühkhitpü thsungkheak kingaün müjihkhukpü lanü api thsungkheak yakzan ah.

³³ATUNGPUHNÜ Mosa tüsho Aron ki tha,

³⁴Küyimki inü nüsa yamalo thsüpü jihkhi Kanan lomi ching nüsa arüba, tüsho thüyam ching mokri yükihshihbanü,

³⁵thüyam putungpuhnü amükeambuh ki yübah thaang, “I yam ching mokri khürü lakhi ruk ah.”

³⁶Amükeambuhnü api yübah mokri ju mükheahyide thüyam ching lakhi kukrukbo athrünkhi akükhita bahang de thiyukhüm jihbah; jude yungsho thüyam ching lakhi kukruk lüpdükhi amümüsüh kambah. Tüsho apinü thüyam ching yübah,

³⁷tüsho mokri ju akheahbah. Ju ching phüyakdo yungsho mamde mokri kihbah rhü alunglim tsühde ayüzahpü lasho,

³⁸apinü thüyam chingnü atsobah tüsho nimung thüne rihdoa zobah.

³⁹Nimung athüne nipü amükeambuhnü arülobah akheahbah; tüsho tukthsü ju thüyam rhübo ching bua lasho,

⁴⁰tukthsü yükihkhi lungbo akükhita mümüsühkhi dangpung kiuto aleanglim bahang de amükeambuhnü thiyukhüm jihbah;

⁴¹tüsho apinü thiyia thüyam lunglim rhü kheak mujukhi khukkhishihbah, tüsho arünü ayihkhikhi asungthulung ju mümüsühkhi dangpung kiuto aleanglim wukhita zobah;

⁴²tüsho arünü lahkhita bahkhi lungbo müthri lung püpü handarünü ayukbah, tüsho amujube aso handarünü rhü ju amujudobah.

⁴³Lungbo tüsho rhü mujukhi khukkhia bahbahle amuju dunglim kheaküshe tukthsü ju thüyam ching akhiuklosho,

⁴⁴amükeambuhnü arübahle akheahbah; tüsho tukthsü ju thüyam ching bua lasho, ju amütsü kambe apham tukthsü ah. Thüyam ju mümüsüh.

⁴⁵Tüsho thüyam, lungbo, sangbo tüsho amujukhibo alala akhapkheambah; tüsho jurübo mümüsühkhi dangpung kiuto aleanglim hande ayübah.

⁴⁶Khürükhüh thüyam rihdoa lachoki yüzahsho api arelim khiungde mümüsühkhi labah.

⁴⁷Khürükhühnü thüyam ching awuh-a yapde yungsho tsühyungsho akhimmihbo müsühabahbeah.

⁴⁸Tüshe thüyam mujulobah dunglim, amükeambuhnü arünü kheahbahle tukthsü ju thüyam ching mubuloa lasho, amükeambuhnü thüyam ju müsühlah de athabah, tümüde tukthsü shahde wukhiukabahdo.

⁴⁹Thüyam müsühkhitpü, apinü wuhnu mahne, cedar sang, shungliu amürüm tüsho monam sangkhahbo lubah.

⁵⁰Apinü wuhnu khülang ju alo phüh ching ke khipleangkhi zahkhi mi kheaknü alaksahbah.

⁵¹Tüsho apinü cedar sang, monam, shungliu amürüm tüsho wuhnu arhang lubah alaksahkhi wuhnu thiyih ju akhipleangkhi ke ching thsambah. Tüsho apinü thüyam kheak thüne ki rhakbah.

⁵²Hanangde apinü thüyam ju wuhnu thiyih, ke khipleangkhi, wuhnu arhang, cedar sang, monam, tüsho shungliu amürümnü müsühkhitbah.

⁵³Tüsho apinü wuhnu arhang ju kiuto aleanglim kimtsüh ching phinde atsoshihbah. Hanangde apinü thüyam thsungkheak amüsühkhitbe dünthsükhibah, tüsho ju müsühde akambah.

⁵⁴Ha apham tukthsü thsungkheaknü yakzan; mükhüt,

⁵⁵khimmih tüsho thüyam ching akhiukkhi mokri,

⁵⁶tüsho abümkhi yungsho azüngrüpkhi yungsho areak akhiukkhi,

⁵⁷ju mümüsühkhi tüsho amüsühkhi dünkheak huhpü. Ha apham tukthsü thsungkheak yakzan.