Read Yimchungru Naga Levi 15 Bible Online

Levi 15 - Yimchungru Naga bible

Levi 15

¹ATUNGPUHNÜ Mosa tüsho Aron ki tha,

²Israel tsührübo ki thaang, Küyimki athrürü khürü pang chingnü amüyeanbanü, amüyeankhi ju mümüsüh.

³Ha api müyeankhi dünkheak yakzan: apang ching ju müyeanyean she yungsho, amüyeankhi ju tukloa lalashe, api pang ching mümüsühkhi lah.

⁴Amüyeanbuh yapkhi yapkiu tüsho binpungbo alala mümüsühkhi labah.

⁵Tüsho shepünü ju buh yapkiu qiubanü nihbuh khimmih müsühbah, kemüyihbah tüsho arelim khiungde mümüsühkhi labah.

⁶Sherünü abinpung tümükhüh kheak qiubanü nihbuh khimmih müsühbah tüsho kemüyihbah, tüsho api arelim khiungde mümüsühkhi labah.

⁷Shepünü amüyeanbuh pang kheak qiubanü nihbuh khimmih müsühbah tüsho kemüyihbah, tüsho api arelim khiungde mümüsühkhi labah.

⁸Amüyeanbuh mihtsürünü amüsüh mihtsürü khürü kheak mukhiukkihsho ju buhnü khimmih müsühbah tüsho kemüyihbah, tüsho arelim khiungde mümüsühkhi labah.

⁹Tüsho amüyeanbuhnü abinkhi binkiubo ju mümüsühkhi kambah.

¹⁰Ju buh mihtsürünü abinkhibo kheak shepünü aqiubanü api arelim khiungde mümüsühkhi labah; tüsho shepünü jurü kukruk hanbanü akhimmih müsühbah, tüsho kemüyihbah, tüsho arelim khiungde mümüsühkhi labah.

¹¹Amüyeanbuh mihtsürünü akhah mümütsakde khürü kheak qiusho, ju buhnü akhimmih müsühbah tüsho kemüyihbah, tüsho api arelim khiungde mümüsühkhi labah.

¹²Amüyeanbuhnü aqiukhi alo phüh ju yihrüpabahbah; tüsho sangnü athsükhi pungphurubo ju kenü müsühabahbeah.

¹³Mihtsürü amüyeankhi chingnü thsüngushu, apinü amüsühkhitpü thsungkheaknü nimung thüne aleangbah tüsho jushu akhimmih müsühbah tüsho akhipleangkhi kenü kemüyihbah, tüsho api amüsüh kambah.

¹⁴Nimung atizheah nipü apinü müthrithrümpü mahne yungsho chithüreku mahne lubah ATUNGPUH shorupung khimyam ripit ki arübah tüsho jurübo amükeambuh kilim jihbah.

¹⁵Amükeambuhnü khülang neak kingaün jihbah tüsho püpü ju taka kingaünbah. Hanangde apinü amüyeanbuh müsühkhitpü ATUNGPUH miki dünthsükhibah.

¹⁶Küyimki athrürü ke akhiukbanü, apinü apang alala müyihabahbeah; tüsho api arelim khiungde mümüsühkhi labah.

¹⁷Hing khim yungsho shihküp kheak judürü ke yükihsho kenü müsühabahbeah, tüsho ju arelim khiungde mümüsühkhi labah.

¹⁸Küyimki athrürünü aliberü kheak nungbah ke akhiukbanü, ane chido kemüyihbeah, tüsho ane arelim khiungde mümüsühkhi labah.

¹⁹Küyimki aliberü khülang nihbe khinu shihcham arübanü, alibe nimung thüne khiungde mümüsühkhi labah, tüsho shepünü alibe qiubanü arelim khiungde mümüsühkhi labah.

²⁰Anihbe khinu shihcham arüchoki binpung yungsho yappungbo mümüsühkhi labah.

²¹Shepünü anihbe yapkiu qiubanü akhimmih müsühbah tüsho kemüyihbah, tüsho arelim khiungde mümüsühkhi labah.

²²Tüsho shepünü alibenü abinkhi kheak qiubanü akhimmih müsühbah tüsho kemüyihbah, tüsho arelim khiungde mümüsühkhi labah;

²³yapkiu thsüthsü yungsho alibenü abinpung tümükhüh thsüthsü, apinü qiusho api arelim khiungde mümüsühkhi labah.

²⁴Tüsho athrürü khürünü anihbe lung nungbah alibe mümüsühkhi api kheak yükihsho, api nimung thüne mümüsühkhi labah; tüsho anihbuhnü ayapkhi yappung aban mümüsühkhi labah.

²⁵Aliberü khürü khinu shihcham marüpü kim ching nimung ashang thiyih müyeansho yungsho amünchi kim hode müyeansho, amüyeankhi kim khiungde alibe ju püpüki mümüsühkhi kim nangde mümüsühkhi labah.

²⁶Alibe müyeande alakhi nimung alala ching anihbenü ayapkhi yapkiu aban, anihbe mümüsühkhi yapkiu khejihbah; tüsho alibe binpungbo kheak anihbe mümüsühkhi kim ching nangde mümüsühde alabah.

²⁷Shepünü jurü qiubanü mümüsüh tüsho khimmih müsühbeah tüsho ke müyihbeah, tüsho api arelim khiungde mümüsühkhi labah.

²⁸Anihbe thiyih müyeankhi tuklosho, alibenü nimung thüne khebah, tüsho jushu anihbe müsühde akambah.

²⁹Nimung atizheah nipü alibenü müthrithrümpü mahne yungsho chithüreku mahne lubahle ATUNGPUH shorupung khimyam ripit ki amükeambuh kilim yübah.

³⁰Amükeambuhnü khülang neak kingaün jihbah tüsho püpü ju taka kingaün jihbah, tüsho hanangde apinü alibe müsühkhitpü thsungkheak ATUNGPUH miki dünthsükhibah.

³¹Hanangde nünü Israel mihtsürübo arü mümüsühkhi chingnü chamkhijihbeah, jude yungsho arü bolung lakhi I yo arüngyam thsümünimkhi hode arü münean chingnü ashebah.

³²Harübo ha athrürü shepünü müyeancho yungsho ke akhiukkhinü müneana lucho, api thsungkheak yakzanbo,

³³aliberü nihbe khinu shihcham arüchoki, athrürü yungsho aliberü müyeankhi, tüsho athrürü shepünü aliberü amümüsüh kheak nungcho, arü thsungkheak ah.