Read Yimchungru Naga Levi 16 Bible Online

Levi 16 - Yimchungru Naga bible

Levi 16

¹Aron tsührü athrürü mahnenü mümüsühkhi mo kingaünkhi hode ane ATUNGPUHNÜ asheshihshu ATUNGPUHNÜ Mosa ki tha;

²apinü tha, “ Khide Amüsüh Dangpung ching zhinkhi khim miki kim yancho ching darü de nü khiung Aron ki thaang, tümüde ju tangzüng sangdan khidopü kumung amo ching I akhiukchoh. Apinü mihyumanisho, api asheshihbah.

³Hanangde Aronnü amüsüh dangpung ching arübah: neak kingaünpü thsungkheak moshi nunu tüsho taka kingaünpü thsungkheak mihnupung lubah.”

⁴Tüsho ATUNGPUHNÜ thsangdankhibo harü jih. Aronnü khide Amüsüh Dangpung ching müyüyide, apinü kemüyihjungbeah tüsho amükeamrü khimmih yihbeah; shulünkhim zhingzhing tüsho khimmih akhihkhihbo, pangrümbe, tüsho kuhingbe lubeah.

⁵Israel trüknü Aron kilim mihnupung mahne neak kingaünpü tüsho namfimihnupung khülang taka kingaünpü jihbah.

⁶Apinü anihbuh tüsho yamkhün neak dünthsükhipü moshipung khülang jihbah.

⁷Tüsho apinü ATUNGPUH shorupung khimyam ripit ki mihnu mahne lubah ayübah.

⁸Jude thsah Aronnü mihnu mahne kheak azan thsübah: Khülang ATUNGPUH thsungkheak tüsho püpü ju Azazel thsungkheak.

⁹ATUNGPUH thsungkheak azankhi mihnu ju Aronnü ATUNGPUH kilim neak kingaün jihbah;

¹⁰tüsho Azazel jihpü zan thsükhi mihnu ju arhangnü ATUNGPUH kilim jihbah tüsho mihtsürübo neak dünthsükhide sunglo ching Azazel kilim dükhea tsoshihbah.

¹¹Küyimki Aronnü api tüsho ayamkhün thsungkheak moshipung arü neak dünthsükhipü laksah-a neak kingaün jihbanü,

¹²apinü ATUNGPUH miki kingaün sadam kheaknü mo takpung ching mokhih zahde alubah tüsho tsüde anitkhi rhümthüneabe müyikhüh lubah Amüsüh Dangpung ki arübah.

¹³Apinü ATUNGPUH miki rhümthüneabe ju mo kheak yihkihbah, tüsho rhümthüneabe takkhi mokhühnü tangzüng sangdan khidopü liudobah, jude athsükhinü apinü ju müngü tüsho müshe.

¹⁴Apinü moshipung thiyih anükhüh lubah tüsho akhidopü tsülimpeang ayingkhingnü arhakkihbah; tüsho apinü tangzüng sangdan mikhuh ki thüne ki rhaka bahbah.

¹⁵Jushu apinü mihtsürübo thsungkheak neak kingaünpü mihnu laksahbah, tüsho khim zhindokhi khüp athiyih handarübah, tüsho moshi thiyih rhaka bahkhi ruk, akhidopü kheak tüsho tangzüng sangdan mikhuh ching rhaka bahbah.

¹⁶Hanangde apinü Israel mihtsürü mümüsühkhi tüsho arü neak chingnü amüsüh dangpung dünthsükhibah, junangde apinü arü mümüsühkhi bolung ching lakhi ashorupung khimyam thsungkheak rhimobah.

¹⁷Aronnü api, ayamkhün tüsho Israel amukhungrü alala thsungkheak dünthsükhipü amüsüh dangpung ching yüzahbah makhiukloyi khiungde sheshe ashorupung khimyam ching müla.

¹⁸Tüsho apinü ATUNGPUH miki lakhi kingaün sadam ki wukhiukbah ju thsungkheak dünthsükhibah, tüsho moshi le mihnu thiyih khürü lubah kingaün sadam juhbo kheak yihkihbah.

¹⁹Ayingkhing kheaknü athiyih khürü kingaünpung kheak thüne ki rhakkihbah. Hanangde apinü Israel mihtsürübo neak chingnü throde müsühkhitbah.

²⁰Küyimki apinü amüsüh dangpung, ashorupung khimyam tüsho kingaünpung müsühkhitpü rhimo banbanü, apinü rhangdung lakhi mihnu handarübah.

²¹Apinü akhah ane chido mihnu ku kheak nimde Israel tsührünü ayihbeakkhi amülim alala, azhihde thiyuzüng thsümünimkhi alala, tüsho arü neak thsükhibah, tüsho akhukhita lubuhnü mihnu bebah yünü sunglo ching dükhebah.

²²Mihnunü arü neak alala hanbah mihtsürü mülapung, sunglo ching mihnu ju dükhea tsoshihbah.

²³Aronnü amüsüh dangpung ching yüki yihkhi amükeamrü khimmih yihbah ashorupung khimyam ching yüzahbah, tüsho jurübo ju kheak zojihbah;

²⁴tüsho apinü amüsüh dangpung ching junü kemüyihbah nihbuh khimmih yih-a lubah. Jushu apinü anihbuh neak tüsho mihtsürübo neak dünthsükhipü wukhiukbah taka kingaünkhi jihbah.

²⁵Tüsho neak kingaünbe amüdang ju apinü kingaün sadam kheak takbah.

²⁶Tüsho Azazel kilim mihnu dükhea yüshihbuhnü akhimmih müsühbah tüsho pang müyihbah, jushu lang api binpung ching azahlopü kuklah.

²⁷Neak kingaünpü lukhi moshi tüsho mihnu thiyih neak dünthsükhipü amüsüh dangpung ching lude ayüzahkhi ju, binkheampung aleanglim hande awukhiukbah tüsho atakbah. Aküp, ayin, tüsho bukningbo alala takabahbah.

²⁸Shepünü jurü takbanü akhimmihbo müsühbah tüsho kemüyihabahbah, jushu lang api binpung ching azahlopü kuklah.

²⁹Ha nüsa thsungkheak lünnü thiyuzüng thsübah: Khinu thüne nimung athürü nipü nüsa Israelrü tüsho nüsa lung lakhi khiungkerübonü khümkeak thsübeah tüsho tümü she mürhimobeah.

³⁰Tümüde ha nimung amükeambuhnü nüsa neak dünthsükhijihbah, junangde ATUNGPUH miki nüsa neak alala chingnü amüsüh labah.

³¹Ha nüsa thsungkheaknü sühakhim amunimung tüsho nüsanü khümkeak thsübeah. Ha kamruhroro thsungkheak yakzan thsükhi lah.

³²Anihbuh abuh müthri amükeamrü thsüpü mujudemüsühkhitkhinü amüsüh amükeamrü khim yihbah dünthsükhibah.

³³Tüsho apinü amüsüh dangpung, ATUNGPUH shorupung khimyam, kingaünpung, amükeamrübo, tüsho Israel mihtsürü amukhungrü alala thsungkheak dünthsükhibah.

³⁴Ha kam ching khülang ki Israel neak dünthsükhipü nüsa thsungkheaknü kamruhroro yakzan thsükhi lah. Tüsho ATUNGPUHNÜ api ki thiyukhüm jihkhi nangde Mosanü rhimo.