Read Yimchungru Naga Levi 17 Bible Online

Levi 17 - Yimchungru Naga bible

Levi 17

¹ATUNGPUHNÜ Mosa ki tha,

²Aron le atsührübo, tüsho Israel mihtsürü alala ki thaang, Ha ATUNGPUHNÜ thiyukhüm jihkhi ah.

³Israelrü bolung ching mihtsürü khürünü moshipung yungsho namfimihnunu yungsho mihnu binkheampung ching yungsho aleanglimnü laksahbah,

⁴ju ashorupung khimyam ripit ki ATUNGPUH kilim thsambah thsüde handarünü müjihsho thiyih ju buh mihtsürü kheak labah; apinü thiyih bukdo; tüsho mihtsürü ju Thrünpuh mihtsürü bolungnü khekhita bahbah.

⁵Ha yukhüm amütsan ju Israel mihtsürünü shiwüh thulu ching laksahkhi ATUNGPUH kilim handarübah. Arünü ashorupung khimyam ripit ki amükeambuh kilim jihbah tüsho mungtsü kingaün jihbah.

⁶Amükeambuhnü thiyih ju ashorupung khimyam ching kingaünpung yean mühide arhakkihbah tüsho amüdang taka arhümthüneashihde ATUNGPUH asühshihbah.

⁷Junangde arünü müzammüramkhi arimri ki laksah-a mükingaün. Ha arü lün lün ching arü thsungkheaknü kamruhroro yakzan thsükhi labah.

⁸Tüsho nünü arü ki thaang: Israelrü yungsho nüsa lung lakhi khiungkerünü taka kingaünkhi yungsho püpü shuhmülanga jihkhibo,

⁹ashorupung khimyam ripit ki ATUNGPUH ki shuhmülanga jihpü hande marüsho, ju mihtsürü Thrünpuh mihtsürü bolungnü khekhita bahbah.

¹⁰Israelrü khürü yungsho nüsa bolung larü khiungkerü shepünü thiyih tsühbanü, ATUNGPUHNÜ api azhihde bukakhiukbah tüsho api nihbuh mihtsürü bolungnü khekhita bahbah.

¹¹Tümüde shih ju thiyih ching lah; tüsho kingaün sadam kheak nüsa rhangdung dünthsükhipü inü nüsa kilim jihdo; tümüde thiyihnü nüsa rhangdung thsungkheak dünthsükhichoh.

¹²Jumonü ATUNGPUHNÜ Israel yungsho arü bolung lakhi khiungkerübo thsüthsü thiyih zahkhi shiwüh mütsühpü thakheah.

¹³Israelrü yungsho arü lung lakhi khiungkerü shepünü shih yande shiwüh yungsho wuhnu laksahbanü, apinü athiyih alo ching buka bahbah asungthulungnü yihdoabahbeah.

¹⁴Tümüde rhangdung lakhi shiwüh alala thiyih ching lah, jumonü inü Israel mihtsürü ki tha: Nüsanü tümü shih thiyih she dütsüh, tümüde rhangdung lakhi shih alala thiyih ah. Shepünü atsühbanü khekhita bahbah.

¹⁵Mihtsürü khürü, Israel yungsho khiungkerü thsüthsü akeangnü ashekhi shiwüh yungsho mütüm shiwühnü anguhsahkhi shih shepünü atsühbanü akhimmih müsühbeah, kemüyihbeah tüsho api arelim khiungde mümüsühkhi labah, tüsho api amüsüh kambah.

¹⁶Tüshe apinü khimmih mümüsüh yungsho kemümüyihsho, ju neak apinü ahanbah.