Read Yimchungru Naga Levi 20 Bible Online

Levi 20 - Yimchungru Naga bible

Levi 20

¹ATUNGPUHNÜ Mosa ki tha,

²Israel tsührübo ki thaang: Israel yungsho khiungkerü Israel ching larü shepünü nihbuh tsührü Molek thrünpuh kingaünpü jihbanü, lomi ching larü mihtsürü athrünkhinü dükde lungnü api rusahabahbah.

³Khürünü nihbuh tsührü Molek kilim jihde I yo amüsüh arüngyam müneansho tüsho I mung amüsüh achih kipsho, inü api azhihde awusubah tüsho api I mihtsürü bolungnü khekhita bahbah.

⁴Tüshe mihtsürü khülangnü nihbuh tsührü Molek kilim jihbah mihtsürübonü müngümürang thsüde api mülaksahsho,

⁵inü ju buh mihtsürü le api yamkhün kheak azhihbah; tüsho arü le arü yande Molek kheak müzammüramrü alala arü mihtsürü bolungnü khekhita bahbah.

⁶Shepünü mesherü tüsho thümürü kilim yübah arü kheak yüliyürabanü, inü arü azhihbah tüsho arübo mihtsürü bolungnü khekhita bahbah.

⁷Jumonü nüsa müsühkhitang, tüsho müsühde laang; tümüde I ATUNGPUH nüsa Thrünpuh ah.

⁸I yakzan thsükhi anide rhimoang: I nüsa müsühkhitjihbuh ATUNGPUH .

⁹Shepünü buhrü yungsho berü athruajibanü dükde asheshihbah. Apinü abuh yungsho abe athruajimonü, api thiyih api kheak kihbah.

¹⁰Athrürü shepünü nihbuh yamhingrü niuberü kheak müzammürambanü, müzammürambuh tüsho müzammürambe ane chido dükde asheshihbah.

¹¹Athrürü shepünü nihbuh abuh niube kheak nungbanü abuh mungchih ngüshihchoh; athrüpü tüsho alibe ane chido dükde asheshihbah. Ane thiyih ju ane kheak kihbah.

¹²Mihtsürü khülangnü nihbuh tsühmeakbe kheak nungsho, ane chido asheshihbah. Anenü amülim rhimodo; ane thiyih ju ane kheak kihbah.

¹³Athrürü khülangnü aliberü kheak nangde athrürü kheak nungsho, ane chidonü athraneanbe yihbeakdo. Ane dükde asheshihbah; ane thiyih ane kheak kihbah.

¹⁴Athrürü khülangnü aliberü le alibe abe ane chido lusho, ju yüliyürakhi ah; api tüsho arü chido monü ataksahbah, junangde nüsa bolung yüliyürakhi mülade akambah.

¹⁵Athrürü khülangnü shiwüh lung nungsho, api dükde asheshihbah, tüsho nüsanü shiwüh ju alaksahbeah.

¹⁶Aliberü khülangnü shiwüh lung müyampü mürangsho, nüsanü alibe tüsho shiwüh ane chido dükde alaksahbah. Ane thiyih ane kheak kihlah.

¹⁷Athrürü khülangnü nihbuh chiniurü lusho, abuh tsührü yungsho abe tsührü thsüthsü, tüsho anenü nungsho, ju khide amütsü rhimo ah. Tüsho ane ju nihbe mihtsürü mük kinü yankhita bahbah. Apinü nihbuh chiniurü mungchihshihdo. Apinü nihbuh amülim hanbah.

¹⁸Athrürü khülangnü aliberü khülang kheak anihbe thiyih yükhi kim ching nungsho, apinü alibe müyeanpung lahkhitchoh, tüsho alibenü she ju müyihdo. Ane chido ane mihtsürü bolungnü yankhita bahbah.

¹⁹Nü be niurü yungsho nü buh niurü kheak dünung, tümüde junü betsührü khung thsükhi wüntre mülade akambah; nüke chidonü neak hanbah.

²⁰Athrürü khülangnü nihbuh akü niube kheak nungsho, apinü nihbuh künirü mungchih ngüshihchoh. Neak anenü ahanbah; ane tsührü mülade ashebah.

²¹Athrürü khülangnü akhiung niube lusho, ju amümüsüh rhimo; apinü akhiung mungchih ngüshihchoh. Ane tsührü mülade alabah.

²²Jumonü nüsanü I yakzan thsükhi tüsho I yuzüngbo anide rhimoang, jude thsüsho inü nüsa lashihpü bede ayüpung Kanan lonü nüsa mülümkhita mübah.

²³Inü nüsa müngüh yankhita bahpü lakhi trükbonü arhimokhi düyan. Tümüde arübonü harü amütsübo rhimodo, jumonü inü arü thraneanabah.

²⁴Tüshe inü nüsa ki tha, “ Nüsanü arü lo yamrüplurüp lubah tüsho niuhke le mukhuke bukde alakhi lomi nüsa lashihpü inü nüsa kilim jihbah.” I ATUNGPUH nüsa Thrünpuh; apinü nüsabo mihtsürü bolungnü bemuwuh.

²⁵Jumonü nüsanü shiwüh amüsüh tüsho amümüsüh, wuhnu amüsüh tüsho amümüsüh dükeak mütsanmükhiang, tüsho inü nüsa kheaknü mümüsüh de büthsüjihkhi, shiwüh le wuhnu yungsho alo kheak chinde atsahbe rhangdung labebo hode nüsa mümüsühde dükam.

²⁶Tüsho nüsa I kilim amüsüh, tümüde I ATUNGPUH amüsüh, tüsho nüsa I yo kamshihpü thsüde inü nüsa püpürü trükshih bolungnü bemuwuh.

²⁷Athrürü yungsho aliberü shepü mesherü yungsho thümürü thsübanü, dükde arübo lungnü arusahbah. Arü thiyih ju arü kheak kihbah.