Read Yimchungru Naga Levi 21 Bible Online

Levi 21 - Yimchungru Naga bible

Levi 21

¹ATUNGPUHNÜ Aron tsührü amükeamrübo kilim thashihpü thsüde Mosa ki thiyukhüm jih, Shenü she nihbuh mihtsürü shekhi thsungkheak müneana dulu,

²tahle abe, abuh, tsührü athrürü tüsho aliberü, khiungmungrü,

³yungsho api lung lakhi amürhangrü achi pürü dünkheak a apinü nihbuh küdah thsüde müneanpü kuklah.

⁴Apinü nihbuh kimnangkünirü shechoki nihbuh zangrü müneana mulubeah.

⁵Amükeamrü shenü she atüzhokhi huhde nihbuh ku tüsho mükhühnam mühüt yungsho nihbuh pang kheak kiuaraka mulubeah.

⁶Arünü nihbuh Thrünpuh mung mümüneanbeah. Tümüde arünü arü Thrünpuh tsühyungpü ATUNGPUH kilim monü taka kingaün jih; jumonü arübo amüsüh labeah.

⁷Arünü müzammüramberü yungsho athsümünimkhi liberü, yungsho niubuhrünü abahkhi liberü mulu; tümüde amükeambuh ju api Thrünpuh ki amüsüh lah.

⁸Jumonü arübo amüsüh ah de khejang, tümüde arünü nüsa Thrünpuh tsühyungpü jihchoh; arübo nüsa kilim amüsüh labah, tümüde I ATUNGPUH ; I nü müsühkhitjihbuh, amüsüh ah.

⁹Amükeamrü tsührübe khülangnü müzammüramde nihbe zangrü thsümünimsho, alibenü abuh mungchihshihchoh; anihbe ju monü takabahbeah.

¹⁰Achangbe Amükeambuh ju nihbuh keoniorü bolungnü aku kheak müdangke dungkihdo tüsho amükeamrü khimmih phuyupü müsühkhit, jumonü apinü nihbuh kuyü mushude mülabeah yungsho khim murukrüpbeah.

¹¹Apinü ashemi phünide müyü; apinü nihbuh berübuhrü thsüthsü she müneana mulu;

¹²yungsho apinü arüngyam bahbah tsobah nihbuh Thrünpuh arüngyam mümüneanshih; tümüde api Thrünpuh yo mujude-müsühkhitbe müdangke api kheak lah. I ATUNGPUH ah.

¹³Apinü yihlupü lakhi aliberü ju atsangkhitkhi thsübeah.

¹⁴Khimoberü, abahkhi liberü apinü müyihlu, tüshe apinü nihbuh mihtsürü bolung atsangkhitkhi lubeah,

¹⁵yungsho apinü api mihtsürü bolung nihbuh keoniorü mümüneanjihbeah; tümüde I ATUNGPUH , inü api müsühkhit.

¹⁶ATUNGPUHNÜ Mosa ki tha,

¹⁷Aron ki thaang: Nü tsührü tsührübo mütsümüyangrü shenü she arü lün amuyung ching arü Thrünpuh tsühyungpü jihpü marü.

¹⁸Tümüde mütsümüyangrü shenü she phünide marü, amük tukkhi, phephea larü, yungsho athrünmüchihkhi;

¹⁹khürü müphü yungsho khah zhakkhi;

²⁰yungsho ngam dübümrü yungsho amükhirü; khürü mük yungsho küp tukthsü kihrü; tüsho mükiji trürübo.

²¹Amükeambuh Aron tsührübo mütsümüyangrübo sheshe ATUNGPUH kilim monü taka kingaünpü marü. Api mütsümüyang; apinü nihbuh Thrünpuh tsühyungpü jihpü phünide marübeah.

²²Apinü api Thrünpuh tsühyungpü khide amüsüh tüsho amüsüh ane chido tsühpü kuklah,

²³tüshe apinü azhindokhi yungsho kingaün sadam phünide marü, tümütüsho api mütsümüyang, junangde apinü I yo amüsüh dangpungbo mümünean; tümüde I ATUNGPUH ; inü arü müsühkhit.

²⁴Junangde Mosanü ha Aron le atsührübo tüsho Israel mihtsürü alala ki tha.