Read Yimchungru Naga Levi 22 Bible Online

Levi 22 - Yimchungru Naga bible

Levi 22

¹Tüsho ATUNGPUHNÜ Mosa ki tha,

²Aron tüsho atsührübo ki, Israel tsührübonü I kilim müsühkhitde kingaünkhi kümkangpü thaang, junangde arünü I mung amüsüh mümüneanjih; I ATUNGPUH ah.

³Arü ki thaang: Nü lünbo amuyung ching nü tsührü-tsührü bolung khürükhüh mümüsühde alachoki Israelrünü ATUNGPUH kilim müsühkhitde kingaün jihkhi miki arüsho, api ju I mikinü khekhita bahbah: I ATUNGPUH ah.

⁴Aron tsührü-tsührü bolung apham yungsho pang chingnü amüyeanrü shenü she nihbuh mümüsühkhityi khiungde amüsüh kingaünkhi mütsüh. Shepünü ashemi yungsho ke müyeanrü kheak qiubanü mümüsüh,

⁵yungsho apinü abüde atsahbe shiwüh yungsho amümüsüh mihtsürü kheak qiusho api mümüsühde akambah.

⁶Shepünü hadürü kukruk qiubanü api arelim khiungde mümüsühkhi labah tüsho api pang kenü müyihamübahsho amüsüh kingaünkhi apinü mütsüh.

⁷Tüsho küyimki ani yüzahbanü api amüsüh kambah; tüsho ju dunglim amüsüh kingaünkhibo ju apinü atsühpü kuklah, tümütüsho ju api tsühyungpü ah.

⁸Apinü shiwüh akeangnü ashekhi yungsho mütüm shiwühnü anguhsahkhi shih tümü she mütsüh; junü api müneanjihbah: I ATUNGPUH ah.

⁹Amükeamrü alalanü inü ajihkhi yuzüngbo anibah. Jude müthsüsho arübonü ju müneankhinü neak yihbeakbah tüsho ashebah: I ATUNGPUHNÜ arü müsühkhit.

¹⁰Püpürü shenü she amüsüh kingaünkhi mütsüh; amükeambuh lung lakhi hanrü yungsho amulokhi yamlarübonü she mütsühbeah.

¹¹Tüshe amükeambuhnü shonü athulokhi azhorü yungsho api yam chingnü azübekhi azhorünü a api tsühyungpü tsühpü kuklah.

¹²Amükeambuh tsührübe khülangnü püpürü ki rhangsho anihbenü amüsüh kingaünkhibo mütsüh.

¹³Tüshe amükeambuh tsührübe ju khimoberü kamsho yungsho bah-a lasho, tüsho tsührü mülasho, tüsho abuh yam ching alode arübah anihbe athunu kim ching lakhi ruk api lung lasho, anihbenü abuh tsühyungpü tsühpü kuklah; tütüshe püpürünü a ju mütsüh.

¹⁴Mihtsürü khürünü amüsüh kingaünkhi ju müreanglimnü tsühsho, apinü ju ching muku shihcham jihbah, tüsho amüsüh kingaünkhi ju amükeambuh kilim jihbah.

¹⁵Israel tsührübonü ATUNGPUH kilim jihkhi amükeamrübonü dümüneanjih,

¹⁶yungsho arü ki thiyukhüm jihbahle amüsüh kingaünkhi tsühkhi hode arübo kheak amülim akihbah; tümüde I ATUNGPUHNÜ jurü mümüsühkhit.

¹⁷Tüsho ATUNGPUHNÜ Mosa ki tha,

¹⁸Aron le atsührübo tüsho Israel mihtsürübo ki thaang, Küyimki Israel yamkhün khürü yungsho Israel lung larü khiungkerünü kingaün jihbanü, alokhikhi shakpü yungsho mulongde ATUNGPUH kilim taka kingaünpü thsüthsü,

¹⁹aleangkhipü thsüde nüsanü lapha mükihkhi moshipung yungsho namfimihnupung yungsho mihnupung bolungnü jihang.

²⁰Nüsanü mütsümüyangkhi shiwüh tümü she düjih, tümüde nü dünkheaknü müleangkhi.

²¹Tüsho küyimki khürünü mungtsü kingaün ATUNGPUH kilim shuhmülanga jihbanü, alokhikhi thsüthsü yungsho mulongkhi kingaünpü thsüthsü, aleangkhipü thsüde moshi yungsho namfimihnu bolungnü lapha mükihkhi jihbeah.

²²Shiwühbo amük tukkhi yungsho akikkhi yungsho ajing zhakkhi yungsho amüyeankhi yungsho aküp züngrüpkhi yungsho müshak kihkhibo, nüsanü hadürü shiwühbo kingaünpung kheak ATUNGPUH kilim taka dükingaün.

²³Moshipung yungsho namfimihnunu ajingkhah alü shangkhi yungsho alü khihkhi nüsanü mulongkhi kingaünpü kuklah, tüshe alokhikhi dünkheak a ju müleangkhi.

²⁴Shiwüh amükiji trükhi yungsho azünakkhi yungsho azüngrüpkhi yungsho akiukhi, nüsanü ATUNGPUH kilim müjihbeah yungsho nüsa lomi ching she shuhmülanga dükingaün;

²⁵yungsho hadürü shiwüh khiungkerü khah chingnü leangkhia nüsanü ATUNGPUH kilim tsühyungpü kingaün düjih. Tümüde jurü kheak lapha tüsho areak kihkhi hode nüsa thsungkheaknü müleangkhi.

²⁶Tüsho ATUNGPUHNÜ Mosa ki tha,

²⁷Küyimki moshipung yungsho namfimihnu yungsho mihnu adrebanü, abe lung nimung thüne labah; tüsho atizheah nipünü ründe ATUNGPUH kilim taka kingaünpü aleangkhikhukkhi thsübah.

²⁸Tüsho ju moshi dreto yungsho namfimihnu dreto thsüthsü, nüsanü anunu ane chido nimungkhühnü mülaksahbeah.

²⁹Nüsanü küyimki makshe jihkhi ATUNGPUH kilim shuhmülanga jihbanü, nüsa dünkheak aleangkhikhukpü thsüde jihang;

³⁰nüsanü ju nimungnü tsühang tüsho ashido yapsu khiungde daningshih: I ATUNGPUH ah.

³¹ATUNGPUHNÜ tha, Jumonü nüsanü I yukhümbo aniang; I ATUNGPUH ah.

³²Nüsanü I mung amüsüh mükhemürang düthsü; tüshe Israel tsührü bolung I amüsüh thsübah. I ATUNGPUH nüsa müsühkhitjihbuh;

³³tüsho I nüsa Thrünpuh thsüpü thsüde inü nüsa Ijip lomi chingnü bekhit: I ATUNGPUH ah.