Read Yimchungru Naga Levi 23 Bible Online

Levi 23 - Yimchungru Naga bible

Levi 23

¹ATUNGPUHNÜ Mosa ki tha,

²Israel trükbo ki thaang: Harü ha akhukhitkhi ATUNGPUH thüniobo, nüsanü amüsüh amukhung ah de azhiyukpü lah.

³Nimung thuruk rhimo rhimobah, tüshe thüne nipü a sühakhim amunimung, amüsüh kingaünpü nimung. Nüsa küching küching lalashe, nüsanü rhimo tümü she mürhimobeah, ha ATUNGPUH amunimung khülang ah.

⁴Harü ha ATUNGPUH thüniobo, amüsüh amukhungbo, nüsanü akhukhitkhi kim ching zhiyukjihpü lah.

⁵Akhuhbe khinu, nimung thürükheak phüyi nipü ani yüzahchoki ju ATUNGPUH phungho-thünio ah.

⁶Tüsho ju khinu nimung thürükheak phüngü nipü ju phaüm muyukkhi ATUNGPUH thünio labah; nüsanü nimung thüne phaüm muyukkhi yikhap tsühbah.

⁷Atan nimung nüsanü amüsüh amukhung khülang labah; nüsanü rhimo achak tümü she mürhimo.

⁸Tüshe nüsanü ATUNGPUH kilim nimung thüne taka kingaünbah; athüne nipü ju amüsüh amukhung nimung ah; nüsanü rhimo achak tümü she dürhimo.

⁹Tüsho ATUNGPUHNÜ Mosa ki tha,

¹⁰Israel mihtsürübo ki thaang: Küyimki nüsanü inü ajihkhi lo ching arüba, tüsho yimlubanü, nüsanü akhuhde yimlukhi hi phung amükeambuh kilim handarünü jihang;

¹¹tüsho nüsa aleangkhikhukpü thsüde, apinü ATUNGPUH miki müleamde kingaünbah; ju amunimung shidopü amükeambuhnü müleamde ajihbah.

¹²Tüshe hi phung müleamde ajih nimung, nünü lapha mükihkhi namfimihnunu pung kam khülang bankhi ATUNGPUH kilim taka kingaünang.

¹³Ju lung nüsanü ayikangkang khahngak 2 ching oliv müdangke yukbah hi kingaün jihde arhümthüneakhinü ATUNGPUH asühshihbah; tüsho yukhu she pungdüchi 1 kingaün jihbah.

¹⁴Nüsanü ju nimungnü nüsa Thrünpuh kilim kingaün handarü müjihyi khiungde yikhap thsüthsü, angukhi hi thsüthsü yungsho aso hi thsüthsü nüsanü mütsüh; ha nüsa tsühsoniuso lün ching lapung abande thiyukhüm labah.

¹⁵Tüsho amuni shidopü, nüsanü hi phung müleamde kingaünkhi ninü ründe amuni thüne khiungde kheang.

¹⁶Amuni thünepü dunglim nimung thünim kheang; jushu nüsanü aso hi kingaün ATUNGPUH kilim jihang.

¹⁷Nüsanü nüsa lapung chingnü ayikangkang khahngak 2nü anungkhi yikhap mahne müleamde ajihpü lubah arang; jurübo ju atsüdak ayikangkang, phaüm yukbah anungkhi, ATUNGPUH kilim akhuhbe sangaso thsübah.

¹⁸Tüsho nüsanü yikhap lung lapha mükihkhi namfimihnunu pung kam khülang bankhitkhi thüne, moshipung khülang, tüsho mihnupung mahne de jihang; jurübo ju hi kingaün tüsho yukhu kingaünkhi bolung taka kingaünde, arhümthüneakhinü ATUNGPUH asühshihbah.

¹⁹Tüsho nüsanü neak kingaünpü mihnupung khülang, tüsho kam khülang bankhi namfimihnunu mahne mungtsü kingaün shuhmülanga jihpü thsungkheak jihang.

²⁰Amükeambuhnü akhuhbe sangaso ju namfimihnu mahne lung ATUNGPUH miki müleamde kingaünbah; jurübo amükeambuh thsungkheaknü ATUNGPUH miki amüsüh labah.

²¹Tüsho ju ninü nüsanü zhiyukjang; nüsanü amüsüh amukhung khülang labah; nüsanü rhimo achak tümü she mürhimo: ha nüsa lapung abande kamruhroro nüsa lün amuyung yakzan labah.

²²Tüsho küyimki nüsanü yimlubanü, nüsanü thulu tsünthri khiungde düyimlu, yungsho yimluabahshu hi müdre moa dulu; nüsanü jurübo zhochihrü tüsho khiungkerübo khilim zojang: I ATUNGPUH nüsa Thrünpuh.

²³ATUNGPUHNÜ Mosa ki tha,

²⁴Israelrübo ki thaang: Khinu thüne atan nimung nüsanü sühakhimkhi, lümrhihkhi amüsüh amukhung, khungpi khungde mungang.

²⁵Nüsanü rhimo achak tümü she dürhimo, tüsho nüsanü ATUNGPUH kilim taka kingaünkhi jihang.

²⁶Tüsho ATUNGPUHNÜ Mosa ki tha,

²⁷Ha khinu thüne nimung thürü nipü ju neak dünthsükhikhi nimung labah; nüsa thsungkheaknü ha nimung amüsüh amukhungkhi kim labah, tüsho nüsanü nüsa nihbe me thsünübah tüsho ATUNGPUH kilim taka kingaünkhi jihbah.

²⁸Tüsho nüsanü ha nimung rhimo tümü she dürhimo; tümüde ha nüsa neak dünthsükhipü ATUNGPUH nüsa Thrünpuh miki dünthsükhikhi nimung ah.

²⁹Tümütüsho shepünü ha nimung ching müthsünübanü api mihtsürü bolungnü khekhita bahbah.

³⁰Tüsho khürünü ju nimung rhimosho, ATUNGPUHNÜ api asheshihbah.

³¹Nüsanü tümü she mürhimo; ha nüsa lapungbo ching nüsa tsühsoniuso lün ching lünnü yakzan thsükhi labah.

³²Ha nüsa thsungkheaknü sühakhimpü amunimung ah, tüsho nüsanü nüsa nihbe küdah thsüde thsünüang. Khinu ching nimung tuku nipü arelimnü ashirepü khiungde nüsanü amunimung yihkhia lubeah.

³³Tüsho ATUNGPUHNÜ Mosa ki tha,

³⁴Israelrü tsührübo ki thaang: Ha khinu thüne nimung thürükheak phüngü ninü ründe nimung thüne khiungde ATUNGPUH miki arüngkhimyam thünio labah.

³⁵Akhuhbe nimung ching amüsüh amukhung labah; nüsanü rhimo achak tümü she mürhimobeah.

³⁶Nimung thüne nüsanü ATUNGPUH kilim taka kingaünbah; atizheah nipü nüsanü amüsüh amukhung labah tüsho ATUNGPUH kilim taka kingaünbah; ha mülangrüpdo amukhungkhi lah tüsho nüsanü rhimo achak tümü she mürhimobeah.

³⁷Harü ha nüsanü ATUNGPUH thüniobo, amüsüh amukhung kim ah de azhiyukpü lah, ju ATUNGPUH kilim taka kingaünkhi tüsho hi kingaünkhi, shuhmülanga jihkhi tüsho yukhu kingaün, buh nimungmung akhukhitkhi yande ajihbe ah.

³⁸Harü kingaünbo ha ATUNGPUH amuni kingaün, nüsa thsambahbo, nüsanü thiyuchihchimkhi kingaün tüsho mulongde jihchungkhi kingaünbo ATUNGPUH kilim jihkhi bolung yukrude ajihbe lah.

³⁹Jumonü küyimki nüsa lu yimlubanü khinu thüne nimung thürükheak phüngü ninü ründe nimung thüne ATUNGPUH thünio mungang; atan ni tüsho atizheah nipü ju sühakhimkhi amunimungbo labah.

⁴⁰Tüsho nüsanü atan nimung sangdung atsü sangasobo, ashidung khahbo, ayü hihkhi sangkhahbo tüsho keyean zhipkhi sangbo lude arübah; tüsho nüsanü ATUNGPUH nüsa Thrünpuh miki nimung thüne asühachihbah.

⁴¹Ha ATUNGPUH thünio kam abande nimung thüne mungang. Haju ha nüsa lün amuyung kamruhroro thsungkheaknü yakzan thsükhi lah; ha khinu athünepü ching mungang.

⁴²Israel mihtsürü alalanü nimung thüne khimyam ching labah,

⁴³jude athsükhi hode ATUNGPUHNÜ Israel mihtsürübo Ijip chingnü abekhitchoki khimyam yancho ching binshih-a lah de nüsa tsühsoniusobonü amükheahbah: I ATUNGPUH nüsa Thrünpuh.

⁴⁴Jumonü Mosanü akhukhitkhi ATUNGPUH thüniobo dünkheak Israel mihtsürübo kilim mükheahshih.