Read Yimchungru Naga Levi 24 Bible Online

Levi 24 - Yimchungru Naga bible

Levi 24

¹ATUNGPUHNÜ Mosa ki tha,

²Israel mihtsürübo ki tsünpung ching yukpü thsüde oliv chingnü anitkhitkhi müdangke handarüpü thiyukhüm jihang, junangde tsün ju mutukzhakde atrushihbah.

³Ashorupung khimyam ching tangzüng khim zhinkhi aleanglim, Aronnü tsünpungbo ju takkih-a zoanude arenü yapsu khiungde akümbah. Ha tsühsoniuso lün thsungkheaknü yakzan thsükhi labah.

⁴Suna müthsün tsünpung zopung ATUNGPUH miki lakhi kheak dubopü tsünpungbo ju apinü mutukzhakde azobeah.

⁵Tüsho nüsanü ayikangkang khahngak 12 lubah yikhap thürükheak mahne nungang.

⁶Jurübo ju thuruk thuruknü ru mahne thsüde ATUNGPUH miki lakhi suna müthsünnü athsükhi dükhüm kheak zoang.

⁷Tüsho nüsanü atsangkhitkhi rhümthüneabe aru abande yihkihang; ju yikhap ching ride yüzahbah mümihpü shihcham ATUNGPUH kilim monü taka kingaünkhi labah.

⁸Israelrü mihtsürü thsung thsüde Aronnü ha yikhap lubah amuni aban mutukzhakde, lünnü tangzüngkhi amütsan ATUNGPUH miki zojihbah.

⁹Ha yikhap ju Aron le atsührübo yo thsübah, arünü ju amüsüh dangpung chingnü atsühbah, tümütüsho, ha ATUNGPUH kilim taka kingaünkhi chingnü arü lün yo khide amüsüh shihcham ah.

¹⁰Kheakü athrürü khülang, abe Israelrü tüsho abuh Ijiprü labuhnü Israel mihtsürü bolung wukhiuk; tüsho Israelbe tsührü tüsho Israelbuh ane binkheampung ching rukachih.

¹¹Israelbe tsührü junü Thrünpuh mung athrude tha; jumonü arünü api Mosa kilim bedarü. ( Abe mung ju Shelomith, Dan trük, Dibri tsührübe lakheah).

¹²Tüsho ATUNGPUHNÜ arü ki mütsanmükhi müjihyi khiungde api rihyam ching zo.

¹³Tüsho ATUNGPUHNÜ Mosa ki tha,

¹⁴Athruajibuh ju binkheampung chingnü bekhitang, tüsho apinü athruajikhi sorü abannü amülim ah dükhi amütsan arü khah aku kheak nimbah, tüsho boto alalanü api lungnü rusahang.

¹⁵Tüsho Israelrü ki thaang, Shepünü nihbuh Thrünpuh athruajibanü nihbuh neak hanbah.

¹⁶Shepünü ATUNGPUH mung athrubanü api asheshihbah; boto ching athrünkhinü api rusahbah; hanrü thsüthsü mihkhung larü thsüthsü, küyimki ATUNGPUH athrubanü api asheshihbah.

¹⁷Khürünü mihtsürü laksahsho api asheshihbah.

¹⁸Shepünü shiwüh laksahbanü ju dün shaklobah, rhangdung müthri rhangdung.

¹⁹Khürünü nihbuh yamhingrü yurijihsho, apinü arhimokhi nangde api kheak rhimolobah;

²⁰ro nüpkhi dün ro, mük müthri mük, hü müthri hü; apinü mihtsürü kikshihkhi nangde, api kikabahshihbah.

²¹Shepünü shiwüh laksahbanü amüthri jihloshihbah, tüshe shepünü mihtsürü laksahbanü api asheshihbah.

²²Khiungkerü tüsho mihkhung thsungkheaknü yakzan khülang lang alabah: tümüde I ATUNGPUH nüsa Thrünpuh.

²³Mosanü Israel mihtsürübo ki tha; tüsho arünü athruajibuh ju binkheampung aleanglim bekhit, tüsho api rusahabah, ATUNGPUHNÜ Mosa ki thiyukhüm jihkhi nangde Israel mihtsürünü rhimo.