Read Yimchungru Naga Levi 25 Bible Online

Levi 25 - Yimchungru Naga bible

Levi 25

¹ATUNGPUHNÜ Sinai Müzüng kheaknü Mosa ki tha,

²Israel mihtsürübo ki thaang, küyimki nüsa inü ajihkhi lomi ching arübanü, alonü ATUNGPUH thsungkheak amuni mungang.

³Kam thuruk nüsanü thulu ching müjih yukbah, tüsho kurungasolu mupungbah, tüsho asobo hanmukhungbah;

⁴tüshe kam thünepü ching alo ju ATUNGPUH miki sühakhimkhi amuni labah. Nüsa lu ching müjih düyuk yungsho kurungasolubo dümupung.

⁵Aküdah thsüde mukhuhkhi hi she düyimlu, tüsho mümupungkhi kurungasobo dühanmukhung; ha alo thsungkheaknü sühakhimkhi kam ah.

⁶Mude amungkhi kam ching akhiukkhi ju nüsa, athrürü tüsho aliberü azhorübo, nüsanü amulokhi rhimorübo tüsho nüsa lung larü thsungkheak tsühyungpü labah;

⁷nüsa akamshiwühbo, thulu ching lakhi mütüm shiwühbo thsungkheak alo chingnü akhiukkhi alala atsühpü labah.

⁸Nüsanü amuni kambo kheang, thünenü thüne kam; tüsho amuni thüne thsükhi kambo ju kam yirükheak tuku labah.

⁹Tüsho nüsanü khinu thüne nimung thürü nipü ching Jubilee hulipungpung achangnü müta khiungke lim yüshang; neak dünthsükhipü nimung ching nüsanü hulipungpung müta nüsa lomi alala ching yüshang.

¹⁰Tüsho nüsanü kam thünimpü ju müsühkhitbah tüsho lomi ching larübo alala ki zuzu kamkhi zhiyukjihbah. Ha nüsa thsungkheaknü Jubilee labah; tüsho nüsa mihbüm abannü nihbuh lakhitkukrukbo, tüsho nüsa mihbüm abannü nihbuh yamkhün kilim alode arübah.

¹¹Hoju thünimpü kam ju nüsa thsungkheaknü Jubilee labah; ju ching nüsanü müyang, yungsho aküdah thsüde mukhuhkhi müyimlu, yungsho mümupungkhi kurungaso mühanmukhungbeah.

¹²Tümüde ha Jubilee ah; ha nüsa thsungkheaknü amüsüh labah; nüsanü thulu chingnü akhiukkhi tümü la ju tsühang.

¹³Ha Jubilee kam ching nüsa mihbüm abannü nihbuh lakhit-kukruk lim alode arübah.

¹⁴Tüsho nüsanü yamhingrü ki alo yinsho yungsho nü yamhingrü kheaknü thulosho, khülangnü khülang dümülapyuk.

¹⁵Jubilee dunglim kambo ayannü nünü nü yamhingrü kheaknü athulobah, tüsho hi yimlupü aninga lakhi kambo ayannü apinü nü ki yinbah.

¹⁶Kambo ju hihsho nünü adün yükihbah, tüsho kambo ju nüksho nünü adün keamkhibah; tümüde apinü kambo ching hi khekhitkhi ayannü nü ki yinjihchoh.

¹⁷Jumonü nüsanü khülangnü khülang kheak dümülapyuk, tüshe nüsanü nüsa Thrünpuh wüntreang, tümüde I ATUNGPUH nüsa Thrünpuh ah.

¹⁸Jumonü nüsanü ATUNGPUH yakzan thsükhibo tüsho thiyuzüngbo anide rhimoang, jude athsükhinü nüsa lomi ching tsokhitde alabah.

¹⁹Alonü hi mukhuhshihbah, tüsho nüsa bukthsüde tsühde tsokhitde alabah.

²⁰Tüshe nüsanü akeokhibah, Isanü mümükhean yungsho hi müyimlusho, kam thünepü ching isa tümü tsühba?

²¹Inü kam thurukpü ching nüsa thsungkheak I müngühmühi jihbah; junangde kam mahsam thsungkheaknü sangsolungso suhdahde asoshihbah.

²²Küyimki nüsanü kam atizheahpü ching mükheanbanü, kam thurukpü khiungde nüsa awün hi tsühde alabah; ju yimlude malungyichoki khiungde, nüsa awün hi tsühbah.

²³Alo ju kamruhroro thsungkheak müyinbeah, tümüde alo ju I yo ah; nüsa I lung jaksorü tüsho tsotsahrü ruk lah.

²⁴Tüsho nüsa lakhi lomi athrünkhi ching nüsanü alakukruk rhokhitpü mülübeah.

²⁵Nü keoniorü khürü zhochihrü kambahle lakhit khürü yinsho api keoniorü khungnü arübah arhokhitbah.

²⁶Mihtsürü ju arhokhitpü she mülade azangrü lalimlako tsüshihbah arhokhitpü thsüsho,

²⁷apinü ayinkhi kam chingnü kambo kheshang, tüsho apinü ayinjihbuh kilim ju aningkhi jihloshang, jude thsübah api lakhit-kukruk lulobah.

²⁸Tüshe apinü suhdahde mülakhinü nihbuh zangrü rhokhita mulukhuksho, tümü yinkheanü athulobuh khah ching Jubilee kam khiungde alabah; tüsho ju Jubilee kim ching jihlobah, tüsho api nihbuh lakhit lim yübah.

²⁹Mihtsürü khürünü chipi thsükhi kiuto alunglim thüyam yinsho, apinü ayinkhi kim ching kam khülang amuyung rhokhitpü alim lah.

³⁰Ju kam khülang dükeak chingnü mürhokhitsho, chipi thsükhi kiuto alunglim lakhi thüyam ju aronü tsühsoniuso lün khiungde athulobuh yo kambah. Ju Jubilee ching müjihlo.

³¹Tüshe chipi mülakhi kiulongbo ching lakhi thüyambo ju lomi lubo nangde akhebah. Jurübo arhokhitkhukbah, tüsho Jubilee kim ching jihlobah.

³²Tahle Levirü kiutobo, tüsho arü lakhit-kukrukbo kiutobo ching lakhi thüyambo, Levirübonü tümütümü kim ching she rhokhitkhukbah.

³³Tüsho Levirü khülangnü thüyam yinbah rhokhitloa mulua lasho, arü lakhitkukruk kiuto ching lakhi thüyam yinkhi ju Jubilee kim ching jihlobah; tümüde Israelrü bolung Levirü kiutobo ching thüyambo lakhi ju arü lakhit-kukrukbo ah.

³⁴Tüshe Levirü kiutobo mühi boto lu lakhi ju küyimkishe müyinbeah; ju lün thsungkheaknü arü lakhit-kukruk ah.

³⁵Tüsho nü keoniorü khürü zhochihrü kambahle nihbuh zangrü mümütrükhuksho, nünü api rungang, api jaksorü khülang yungsho tsotsahrü nangde nü lung labah.

³⁶Api kheaknü sholü tümü dulu; tüshe nü Thrünpuh treang; arübo nü lung lashang.

³⁷Nünü api kheak alü lupü thsüde sho dünipjih, yungsho alü ngülopü thsüde tsühyungpü münipjihbeah.

³⁸I ATUNGPUH nüsa Thrünpuhnü nüsa kilim Kanan lo jihpü tüsho nüsa Thrünpuh thsüshihpü nüsa Ijip lomi chingnü bekhit.

³⁹Nü keoniorü khürü zhochihrü kamde anihbuh nü ki yinsho, nünü api ki azhorü nangde dütankihshih.

⁴⁰Tüshe api nü lung amulokhi rhimorü khülang nangde tüsho tsotsahrü nangde alabah, tüsho Jubilee kam khiungde nü tankihbah;

⁴¹jushu api le atsührübo nü kheaknü atsobah tüsho anihbuh yamkhün tüsho jipürü lopung yimde ayübah.

⁴²Tümüde arübo I yamlarübo, inü Ijip lomi chingnü abekhitkheah, arü azhorü nangde ayinpü mukuk.

⁴³Nünü api kheak müküpde thiyuzüng dahori, tüshe nünü nü Thrünpuh wüntreang.

⁴⁴Nü thsungkheaknü athrürü tüsho aliberü azhorü yihnüpü thsüsho, nü mühide alakhi trükbo chingnü arübo thuloang.

⁴⁵Nüsanü nüsa lung larü mihsorübo tsotsahrü sherübo nüsa lo chingnü zübekheanü arü yamkhün bolung chingnü athulopü kuklah; arübo ju nüsa lakhit-kukruk thsüpü kuklah.

⁴⁶Tüsho nünü arübo nü tsührübo thsungkheak yamrüplurüp thsüde azojihpü kuklah, arübo kamruhroro nüsa azhorü thsübah. Tüshe nüsa keoniorü Israelrü tsührübo kheak nüsanü müküpde yakzan düshuh.

⁴⁷Mürangkhüh nüsa lung larü khiungkerü alarü kamsho, tüsho keoniorü Israelrü khürü zhochihrü kambah jurü khiungkerü yungsho arü betsührü khürü ki yinsho,

⁴⁸api yinabahshu, anihbuh rhokhitlopü alim lah. Akeoniorü khürünü api rhokhitpü kuklah;

⁴⁹yungsho akü yungsho akü tsührünü api rhokhitpü kuklah; yungsho api thüninde alarü keoniorü khürünü arhokhitpü kuklah; yungsho api lalimlako tsüde kamsho anihbuh zangrü rhokhitpü kuklah.

⁵⁰Api tüsho api thulobuhnü anihbuh yinkhi Jubilee kam khiungkhi khebah. Api dükhepü dün ju kambo khekhi amulokhi yamlarü kilim jihkhi khuh yanbah.

⁵¹Kheaküshe kam hihde aninga lasho, ju yande apinü anihbuh dün jihkhi chingnü api rhokhitpü jihlobah,

⁵²tüsho Jubilee kam khiungpü kam nükde aninga lasho, apinü kambo khebah ju yande api rhokhitpü adün jihbah.

⁵³Api kam abande amulokhi yamlarü nangde alabah, tütüshe nü miki api putungrünü api kheak thiyuzüng müküpde mahoribeah.

⁵⁴Tüsho api jurü kambo ching mürhokhita lasho, api lung atsührübo she bebah Jubilee kam ching zuzu kamde atsobah.

⁵⁵Tümüde Israelrü tsührübo ju I yamlarübo ah; inü Ijip chingnü abekhitkhi I yamlarübo: I ATUNGPUH nüsa Thrünpuh.