Read Yimchungru Naga Levi 3 Bible Online

Levi 3 - Yimchungru Naga bible

Levi 3

¹Küyimki khürünü mungtsü kingaünpü shiwüh jihbanü, ATUNGPUH miki lapha mükihkhi moshi pung yungsho dre thsübeah.

²Apinü kingaün jihkhi shiwüh ku kheak akhahnü animbah tüsho ATUNGPUH shorupung khimyam ripit kinü alaksahbah. Aron tsührü amükeamrübonü kingaünpung thrip phüyi ching thiyih hiua bahbah,

³tüsho mungtsü kingaün chingnü ATUNGPUH kilim harü taka kingaün jihbah: bukning muhiukhi amüdang tüsho bukning ching lakhi müdangmurubo,

⁴amügüe mahne lung azungyin ching lakhi amüdang, tüsho amüsan she de amügüe mahne lung yihkhita jihbah.

⁵Amükeamrübonü harü alala taka kingaünkhibo lung kingaünpung kheak yihkih-a takbah. Ha taka kingaünkhi rhümnü ATUNGPUH asühshihchoh.

⁶Mungtsü kingaün thsungkheaknü namfimihnu yungsho mihnu ATUNGPUH kilim jihsho, pung thsüthsü dre thsüthsü, lapha mükihkhi jihang.

⁷Apinü kingaün ju namfimihnu jihsho, apinü ATUNGPUH miki ludarübah,

⁸tüsho apinü akhah aku kheak nimbahle ATUNGPUH shorupung khimyam müngühnü alaksahbah; Aron tsührü amükeamrübonü kingaün thrip phüyi ching athiyih rhakkihbah.

⁹Apinü mungtsü kingaün chingnü ATUNGPUH kilim harü taka kingaün jihbah: amüdang, adüthsünro chingnü kimshakbah amokungro müdang alala, bukning muhiukhi müdangmuru alala,

¹⁰amügüe mahne lung azungyin ching lakhi amüdang, tüsho amüsan she de amügüe mahne lung yihkhita jihbah.

¹¹Tüsho amükeambuhnü ATUNGPUH kilim jihkhi tsühyungpü kingaün ah de kingaünpung kheak takbah.

¹²Kingaün jihkhi ju mihnu thsüsho, apinü ATUNGPUH miki lude arübah

¹³tüsho apinü aku kheak akhahnü nimbah ATUNGPUH shorupung khimyam müngühnü alaksahbah. Aron tsührü amükeamrübonü kingaünpung thrip phüyi ching athiyih rhakkihbah.

¹⁴Apinü ha kingaün chingnü ATUNGPUH kilim taka kingaün jihbah: bukning muhiukhi amüdang tüsho bukning ching lakhi müdangmurubo,

¹⁵amügüe mahne lung azungyin ching lakhi amüdang, tüsho amüsan she de amügüe mahne lung yihkhita jihbah.

¹⁶Tüsho amükeambuhnü ATUNGPUH kilim tsühyungpü kingaün ah de kingaünpung kheak takde arhümthüneakhinü ATUNGPUH asühshihbah; amüdang alala ju ATUNGPUH yo.

¹⁷Ha nüsa lünbo, nüsa lapung alala ching kamruhroro yakzan labah; nüsanü amüdang yungsho athiyih mütsühbeah.