Read Yimchungru Naga Levi 5 Bible Online

Levi 5 - Yimchungru Naga bible

Levi 5

¹Mihtsürü khülangnü tümükhüh ngükhi yungsho mükheahkhi dünkheak mihtsürübonü thiyumütsan jihang de arhunganimkhi sobah apinü müthakhi hode neak yihbeaksho, ju hah apinü ahanbah.

²Mihtsürü khülangnü amümüsühkhi qiusho — mütüm shiwüh ashemi yungsho, akam-shiwüh ashemi yungsho alo ching tsahbe lorilokobo, tüsho apinü ju müyima lasho, api mümüsühde akambah tüsho amülim thsübah.

³Mihtsürü khülangnü amümüsühkhi mihtsürü qiusho, ju tümütümü thsüthsü she qiubah mümüsühde akambe qiusho, tüsho apinü ju müyima lasho api mümüsühde akambah tüsho amülim thsübah.

⁴Mihtsürü khülangnü mükümkangde amütsü yungsho atsü rhimo thiyuchihchimsho, mihtsürünü thade thiyuchihchimbe küdürü thsüthsü she, tüsho apinü müyima zobah küyimki mükheahkhitbanü api jurü dünkheak amülim thsübah.

⁵Küyimki mihtsürü khülang ju amülim kambanü apinü ayihbeakkhi neak alokhibah,

⁶tüsho apinü ayihbeakkhi neak dünkheak neak kingaün mihnu bolungnü namfimihnu dre yungsho mihnu ATUNGPUH kilim handarübah; tüsho amükeambuhnü api neak dünthsükhibah.

⁷Tüshe apinü namfimihnu yungsho mihnu müjihkhuksho, apinü neak shaklopü müthrithrümpü mahne yungsho chithüreku mahne ATUNGPUH kilim, khülang neak kingaün tüsho püpü ju taka kingaünpü thsungkheak hande arübah.

⁸Apinü jurübo amükeambuh kilim handarübah, tüsho akhuhde neak kingaün thsungkheak wuhnu jihbah. Apinü aku muthokhitde ahung rhoshakbah

⁹tüsho athiyih khürü kingaünpung yeande rhaka bahbah. Aningkhi thiyih kingaün sadam kheak dunga bahbah; ha neak kingaün ah.

¹⁰Tüsho thiyuzüng yande mahnepü wuhnu ju apinü taka kingaünbah. Hanangde amükeambuhnü mihtsürü neak dünthsükhibah, tüsho api neak bahjihbah.

¹¹Tüshe apinü müthrithrümpü mahne yungsho chithüreku nunu mahne hande marükhuksho, apinü ayikangkang atsüdak khahngak 1 neak kingaünpü handarübah. Apinü müdangke thsüthsü rhümthüneabe thsüthsü ju ching muyuk, tümüde ha neak kingaün ah.

¹²Apinü ju amükeambuh kilim handarübah, tüsho amükeambuhnü ATUNGPUH kilim jihkhi amütsan müyikhüh kama lubah, tüsho apinü ju tsühyungpü kingaün thsüde kingaünpung kheak takbah; ha neak kingaün ah.

¹³Hanangde amükeambuhnü mihtsürünü ayihbeakkhi neak dünthsükhibah, tüsho api neak bahjihbah. Ha kingaünkhi ching akhualokhi nangde aningkhi ayikangkang ju amükeambuh yo thsübah.

¹⁴Tüsho ATUNGPUHNÜ Mosa ki tha,

¹⁵Khürünü müreanglimnü amüsüh kukruk ATUNGPUH kilim müjihde lakpheansho, apinü ashaklo kingaün ATUNGPUH kilim lapha mükihkhi namfimihnu yungsho mihnupung handarübah. Tüsho ju arüngyam ching lakhi düpüt 11.5nü adünang; tüsho ha amülim thsükhi kingaün ah.

¹⁶Apinü amüsüh kukruk müjihkhi dün she shihcham muku yuklobah ajihbeah. Apinü amükeambuh kilim ju jihbah, tüsho amükeambuhnü api neak dünkheak mihnupungnü dünthsükhibah, tüsho api neak bahjihbah.

¹⁷Mihtsürü khürünü müreanglimnü ATUNGPUH yukhüm thsümünimsho, api amülim thsübah tüsho ju mülimkhi apinü ahanbah.

¹⁸Apinü ashaklo kingaün lapha mükihkhi namfimihnu yungsho mihnu pung ATUNGPUH kilim handarübeah. Ju ashaklo kingaünkhi dün akebah ajihbah, tüsho apinü müreanglimnü ayihbeakkhi neak amükeambuhnü dünthsükhibah, tüsho api neak bahjihbah.

¹⁹Ha ATUNGPUH azhihde apinü neak yihbeakkhi dünkheak ashaklo kingaün ah.