Read Yimchungru Naga Levi 6 Bible Online

Levi 6 - Yimchungru Naga bible

Levi 6

¹ATUNGPUHNÜ Mosa ki tha,

²Küyimki nüsa khürünü yamhingrü ki zomukhungkhi yungsho thiyuchihchimkhi ching mülapyukde yungsho ahühmudode, ATUNGPUH azhihde neak yihbeakbanü yungsho nünü yamhingrü junosho,

³yungsho tümükhüh dükheakkhi ngübah akeangyu thasho — khürünü rhimobah neak yihbeakbe mungjithürü dünkheak amülim thiyuchihchimsho,

⁴küyimki khürünü junangde neak yihbeakbah amülim kambanü, apinü ahüh-a lukhi ju ajihlobah, yungsho apinü junode alukhi, yungsho zomukhungkhi apinü alukhi, yungsho adükheakkhi kukruk apinü angükhi,

⁵yungsho tümükhüh dünkheak apinü akeangyu thiyuchihchimkhi; apinü alala jihlobah, tüsho ju lung shihcham muku yukajakbah, tüsho kukruk putungpuh kilim amülimkhi kingaün nimung apinü ajihlobah.

⁶Apinü amükeambuh kilim ashaklo kingaün thsüde namfimihnu yungsho mihnupung lapha mükihkhi amülimkhi kingaün dün mode handarübah.

⁷Amükeambuhnü mihtsürü neak dünthsükhibah tüsho apinü alakmihkhi neak bahjihbah.

⁸ATUNGPUHNÜ Mosa ki tha,

⁹Aron tüsho atsührübo ki, ha taka kingaün yakzan ah de thiyukhüm jihang. Taka kingaünpü ju kingaünpung mokin kheak tsüngreroro takde yapsu khiungbah tüsho mo ju kingaünpung kheak taka zobah.

¹⁰Tüsho amükeambuhnü alunglim athünak yukbah khimzhingzhing yukbah, tüsho taka kingaünkhi wah ju wua kingaünpung mungyean zobah.

¹¹Tüsho apinü ayihkhi khim ju yihkhitbahle püpü yukbah, tüsho awah ju wungdo hande wukhiuknü amüsüh dangpung ching zobah.

¹²Kingaünpung kheak mo takkhi ju mümütshihdü lang azobah. Yapsu aban amükeambuhnü sang tsanglunga yukde ju kheak taka kingaünpü thsübah, tüsho mungtsü kingaün thsungkheak amüdang ju kheak takbah.

¹³Kingaünpung kheak mo ju mutukzhakde atakbah; ju mümütshih.

¹⁴Hi kingaün yakzan: Aron tsührübonü ATUNGPUH miki kingaünpung kheak jihbah.

¹⁵Arünü ayikangkang müyikhüh, müdangke, tüsho ju kheak lakhi rhümthüneabe lubah mümihpü thsüde ATUNGPUH kilim kingaünpung kheak takbah. Ha kingaünkhi rhümnü ATUNGPUH asühshihchoh.

¹⁶Tüsho aningkhi Aron tüsho atsührübonü phaüm muyukde amüsüh dangpung khülang chingnü atsühbah; ju ATUNGPUH shorupung khimyam dükeak chingnü atsühbah.

¹⁷Hoju phaüm yukbah munung. Ha ATUNGPUHNÜ arü kilim taka kingaünpü shihcham jihkheah; ju neak kingaün tüsho ashaklo kingaün ruk khide amüsüh lah.

¹⁸ATUNGPUH kilim taka kingaünkhi ching yo lünnü ATUNGPUH miki lün lün ching tangzüng thsüde Aron tsührübo athrürü abannü atsühpü kuklah; sherübonü ju qiubanü arü amüsüh kambah.

¹⁹ATUNGPUHNÜ Mosa ki tha,

²⁰Api mujude-müsühkhit nimung Aron tüsho atsührübonü ATUNGPUH kilim kingaün ha jihbah: ayikangkang khahngak 1 (hi kingaün nimung aban jihkhi dükhüh), chamshakkhüh yapsu lim tüsho chamshakkhüh are de ajihbah.

²¹Hoju müdangke yukbah thsürubahle keangkihphüh chingnü adükihbah tüsho hi kingaün nangde anininü anungbah, tüsho ju rhümnü ATUNGPUH asühshihde ajihbah.

²²Api tsührü bolung anihbuh müthri amükeambuh thsüpü mujude-müsühkhitkhinü ha jihbah. Ha ATUNGPUH kilim lünnü yakzan labah. Ha abümnü atakbah.

²³Amükeambuhnü hi kingaünkhibo ju mütsüh; ju shahde takabahbah.

²⁴ATUNGPUHNÜ Mosa ki tha,

²⁵Ha neak kingaün yakzan ah de Aron tüsho atsührübo ki thaang: Kükheaknü taka kingaünpü laksahkheanü ju kheaknü neak kingaünbe ATUNGPUH mikinü alaksahbah, hoju khide amüsüh kingaün ah.

²⁶Amükeamrü shepünü neak kingaün jihchonü ju amüsüh dangpung, ATUNGPUH shorupung khimyam dükeaknü atsühbah.

²⁷Khürünü yungsho tümükhühnü shih ju qiusho amüsüh kamabahbah. Shih thiyih khimmih kheak rhakkihsho, amüsüh dangpung chingnü müsühabahbeah.

²⁸Alo phüh chingnü shih ju khiunga lasho ju ayihrüpbeah, tüsho müwayinchi phüh chingnü khiunga lasho ju pheabahang tüsho kenü müsühabahbeah.

²⁹Amükeamrü yamkhün ching athrürü abannü ha kingaünkhi tsühpü kuklah; ha khide amüsüh.

³⁰Tüshe neak kingaünkhi yo thiyih amüsüh dangpung dünthsükhipü ashorupung khimyam ching handarüsho, ju shih mütsüh; hoju takabahbah.