Read Yimchungru Naga Levi 7 Bible Online

Levi 7 - Yimchungru Naga bible

Levi 7

¹Harü ha ashaklo kingaün thsungkheaknü khide amüsüh yakzanbo ah.

²Ashaklo kingaünpü thsüde taka kingaünpü laksahpung chingnü alaksahbah, tüsho thiyih ju kingaünpung thrip phüyi abande arhakkihbah.

³Amüdang harü alala yihkhitbah kingaünpung kheak zojihbah: amokungro-müdang, bukning muhiukhi müdang,

⁴amügüe mahne lung azungyin ching lakhi amüdang, tüsho amüsan she de amügüe mahne lung yihkhita jihbah.

⁵Amükeambuhnü tsühyungpü kingaün thsüde ATUNGPUH ki amüdangbo kingaünpung kheak takbah; ha ashaklo kingaün.

⁶Amükeamrü yamkhün ching athrürübonü ju tsühpü kuklah tüshe amüsüh dangpung chingnü atsühbeah, tümüde ha khide amüsüh.

⁷Neak kingaün tüsho ashaklo kingaün ane chido thsungkheaknü yakzan khülang rukhüh lah: shih ju dünthsükhia bahjihbuh amükeambuh yo thsübah.

⁸Tüsho amükeamrü shepünü khürü yo taka kingaünkhi jihchonü, taka kingaünkhi küp ju anihbuh lubah.

⁹Hi kingaünkhibo yinchikuk, yungsho keangkihphüh yungsho tak-phuru chingnü thsakhama anungkhi ju Thrünpuh kilim jihbuh amükeambuh yo thsübah.

¹⁰Tüshe amükhiungkhi hi kingaün alala, müdangke yukkhi thsüthsü yungsho akung thsüthsü, Aron tsührü amükeamrübo yo thsübah tüsho arü bolung rukhühnü chama lubah.

¹¹Ha ATUNGPUH kilim mungtsü kingaün jihpü yakzan ah.

¹²Khürünü ATUNGPUH kilim makshe kingaün jihsho apinü shiwüh lung phaüm muyukkhi yikhap bebah shuhmülanga jihbah: ju ayikangkangnü anungkhi yikhap ching müdangke yukkhi yungsho yikhapkheam müdangkenü amujukhi yungsho ayikangkang atsüdak ching müdangke yukkhi yikhap jihbeah.

¹³Ju lungnü, mungtsü kingaün makshe jihde shuhmülanga jihkhi phaüm yukkhi yikhap jihbah.

¹⁴Apinü yikhap mungji aban chingnü khülang khülang thrükhita ATUNGPUH kilim arung nangde ajihbeah; hoju shih thiyih lubah kingaün mühide buka bahbuh amükeambuh yo thsübah.

¹⁵Makshe jihde mungtsü kingaünkhi shih ju shuhmülanga jihkhi nimung tsühkhambeah; ashido yapsu khiungde anikhüh she maningshih.

¹⁶Tüshe apinü shuhmülanga jihkhi kingaün ju thiyuchihchim yungsho arung jihkhi kingaün thsüsho, apinü shuhmülanga jihkhi ju ju ninü atsühbeah; tüshe aningkhi ashido she atsühpü kuklah,

¹⁷tütüshe shuhmülanga jihkhi shih aningkhi ju nimung asampü ching a monü takabahbah.

¹⁸Khürünü ha mungtsü kingaünkhi shih mahsam nipü tsühsho anihbuhnü kingaünkhi ju müleangkhi, ju mükheyuk; tüshe amümüsühkhi khejihbah, tüsho shepünü atsühbanü apinü neak hanbah.

¹⁹Amümüsühkhi kukruk kheak qiukhi shih ju mütsüh, tüshe monü takabahbeah. Sherü müsühlanü arünü shih ju atsühpü kuklah.

²⁰Tüshe amümüsührü khürünü ha mungtsü kingaün ATUNGPUH kilim jihkhi tsühsho, api ju nihbuh mihtsürü bolungnü khekhita bahbah.

²¹Tüsho khürünü tümükhüh amümüsüh kukruk qiubah ha mungtsü kingaün ATUNGPUH kilim jihkhi shih tsühsho, mihtsürü thsüthsü yungsho shiwüh thsüthsü, api ju nihbuh mihtsürü bolungnü khekhita bahbah.

²²ATUNGPUHNÜ Mosa ki tha,

²³“Israelrü tsührübo ki thaang: Nüsanü moshipung, namfimihnu tüsho mihnubo müdang mütsüh.

²⁴Ashelimnü ashekhi shiwüh yungsho ari-shiwühnü anguhsahkhi müdang mütsühbeah, tüshe yihnüpü khürü ching yukpü kuklah.

²⁵Khürünü ATUNGPUH kilim taka kingaünkhi shiwüh müdang tsühsho, api ju nihbuh mihtsürü bolungnü khekhita bahbah.

²⁶Junangde, Israelrü küching küching lalashe arünü wuhnubo yungsho shiwühbo thiyih mütsüh.

²⁷Khürünü ha thiyih tsühsho api ju nihbuh mihtsürü bolungnü khekhita bahbah.”

²⁸ATUNGPUHNÜ Mosa ki tha,

²⁹Israelrü tsührübo ki thaang: Shepünü nihbuh mungtsü kingaün ATUNGPUH kilim shuhmülanga jihbanü api mungtsü kingaün shuhmülanga jihkhi chingnü ATUNGPUH kilim kingaün jihbah.

³⁰Anihbuh khahnü taka kingaünkhi ATUNGPUH kilim handarünü ajihbah. Apinü shiwüh müdang tüsho ju lung akhüh ju atsüdakbe thsambah thsüde ATUNGPUH kilim handarübah.

³¹Amükeambuhnü amüdang ju kingaünpung kheak takbah, tüshe akhüh a Aron tüsho atsührübo yo thsübah.

³²Tüsho nüsanü tsülim pho ju shuhmülanga jihkhi mungtsü kingaün chingnü arung kingaün nangde amükeambuh kilim jihang;

³³Aron tsührü bolung shepünü mungtsü kingaün ching athiyih tüsho amüdang jihchonü apinü ashihcham tsülim pho lubah.

³⁴Tümüde Israel mihtsürünü mungtsü kingaünkhi chingnü atsüdakbe kingaün jihkhi akhüh, tüsho apho inü ludo, tüsho ha Israel mihtsürünü lünnü jihde alapü yakzan thsüde amükeambuh Aron le atsührübo kilim jihdo.

³⁵Ha Mosanü arübo amükeamrü thsüde ATUNGPUH tankihshihpü jih nimung ATUNGPUH kilim taka kingaünkhi chingnü Aron tüsho atsührübo kilim amüsüh shihcham.

³⁶Apinü arü mujudemüsühkhitkhi nimung arübo kilim ha shihcham jihshihpü ATUNGPUHNÜ Israelrü kilim thiyukhüm jih. Ha Israel mihtsürübonü lün lün ching anide rhimode ayüpü yakzan ah.

³⁷Jumonü ha yakzanbo ha taka kingaün, hi kingaün, neak kingaün, ashaklo kingaün, müsühkhitkhi kingaün, tüsho shuhmülanga jihkhi mungtsü kingaünbo thsungkheaknü ah.

³⁸Apinü Israelrübo ki kingaünshihpü thiyukhüm jih nimung sunglo ching Sinai Müzüng kheaknü ATUNGPUHNÜ Mosa kilim thiyukhüm harü jih.