Read Yimchungru Naga Levi 8 Bible Online

Levi 8 - Yimchungru Naga bible

Levi 8

¹ATUNGPUHNÜ Mosa ki tha,

²Aron tüsho api lung atsührübo beang tüsho ju lung amükeamrü khimmih, mujude-müsühkhitbe müdangke, neak kingaün thsungkheak moshipung nunu khülang, mihnupung mahne, tüsho phaüm muyukkhi yikhap muluk khülang,

³tüsho amukhungrü athrünkhi ashorupung khimyam ripit ki bemukhungang.

⁴ATUNGPUHNÜ thiyukhüm jihkhi nangde Mosanü rhimo, tüsho küyimki amukhungrü ju ashorupung khimyam ripit ki bemukhungkheanü,

⁵apinü arü ki tha, “ Kheakü inü tümü rhimopü lanü ju ATUNGPUHNÜ thiyukhüm jihkhi ah.”

⁶Mosanü Aron tüsho atsührübo khuhto ching bedarü tüsho arüngako kemüyihjih.

⁷Apinü Aron kheak pangkhümpü tüsho shulünkhim khümyukjih tüsho achim yande pangrümbe rümjih, tüsho amükeamkhim phuyujihbah düshihde akeakkhi pangrümbenü achim yande rümkihjih.

⁸Apinü api kheak treangkhümbe yihkihjih tüsho ju kheak Urim tüsho Thummim yihkih.

⁹ATUNGPUHNÜ Mosa ki thiyukhüm jihkhi nangde apinü anihbuh ku kheak kuhingbe khim hingkihjih, tüsho kuhingbe mikhuhlim amüsüh kuthran amütsan thsüde suna beak yihkihjih.

¹⁰Jushu Mosanü amujube müdangke lubahle arüngyam tüsho ju ching lakhi alala kheak mujukih, tüsho junangde apinü jurü ATUNGPUH kilim müsühkhit.

¹¹ATUNGPUH kilim müsühkhitpü thsungkheaknü apinü müdangke khürü lubah kingaünpung kheak thüne ki rhakkih, tüsho kingaünpung, pungphuru, müsühmüraphuru tüsho kingaün sadam jing kheak mujukih.

¹²Apinü Aron ku kheak müdangke dungkihjihde api mujude-müsühkhit.

¹³Jushu, ATUNGPUHNÜ Mosa ki thiyukhüm jihkhi nangde, apinü Aron tüsho atsührübo mikhuhlim bedarübah pangkhümpü khümjih, pangrümbe chim ching rümjih tüsho arü ku kheak kuthran rümkihjih.

¹⁴Neak kingaünpü Mosanü moshipung handarü, tüsho Aron le atsührübonü arü khah aku kheak nimkih.

¹⁵Mosanü ju laksahbahle athiyih khürü lu tüsho müsühkhitde ayingkhing kheaknü kingaünpung juhbo kheak yihkih. Tüsho apinü aningkhi thiyih ju kingaünpung jing kheak bukkih. Hanangde apinü dünthsükhide müsühkhit.

¹⁶Tüsho Mosanü bukning müdangbo, amüsan tüsho amüdang bebah amügüe mahne lubah kingaünpung kheaknü tak.

¹⁷Tüshe ATUNGPUHNÜ Mosa ki thiyukhüm jihkhi nangde, aküp, ayin, tüsho arhubo khimyam aleanglim hande wukhiukbah takabah.

¹⁸Jushu, Mosanü taka kingaünpü mihnupung handarü, tüsho Aron le atsührübonü arü khah aku kheak nimkih.

¹⁹Mosanü ju laksah tüsho athiyih kingaünpung khuh phüyi kheak hiukih.

²⁰Tüsho küyimki mihnupung ju akhapthünakkheanü, Mosanü aku, akhapthünakkhibo tüsho amüdangbo lua mo ching tak.

²¹Tüsho bukningbo le ajingbo kenü müsühabahshu, Mosanü mihnupung apang abümnü kingaünpung kheak taka kingaünde arhümthüneakhinü ATUNGPUH asühshih; ju ATUNGPUHNÜ Mosa ki thiyukhüm jihkhi yande rhimo.

²²Jushu, Mosanü amükeamrübo müsühkhitpü mihnupung mahnepü handarü, tüsho Aron le atsührübonü arü khah aku kheak nimkih.

²³Mosanü ju laksahbahle athiyih khürü lubah Aron nuku müzhean tsülim, akhahkutopü tsülim, tüsho ajingkutopü tsülim yihkihjih.

²⁴Jushu apinü Aron tsührübo mikhuhlim bedarü tüsho athiyih khürü lubah arü nuku müzhean tsülim, arü khahkutopü tsülim, tüsho arü jingkutopü tsülim yihkihjih. Tüsho Mosanü aningkhi thiyihbo kingaünpung khuh phüyi kheak dungabah.

²⁵Tüsho amüdang, amokungro müdang, bukning muhiukhi müdang alala, amüsan, amüdang bede amügüe mahne, tüsho tsülim pho apinü lu.

²⁶Jushu ATUNGPUH kilim müsühkhitkhi muluk ching yo phaüm muyukkhi yikhap khülang, müdangke bede akhapkhi yikhap khülang, yikhapkheam khülang apinü lu, tüsho jurübo amüdang tüsho tsülim pho mi kheak yihkih.

²⁷Harü tsühyungpü alala apinü Aron le atsührübo khah ching yukjih, tüsho arünü müleamde ATUNGPUH kingaün.

²⁸Tüsho Mosanü jurü arü khah chingnü lubahle müsühkhitkhi kingaün thsüde taka kingaünkhi mi kheak yihkih-a tak; ha kingaünkhi rhümnü ATUNGPUH asühshih.

²⁹Mosanü akhüh lubahle ATUNGPUH kilim müleamde jih; ju ATUNGPUHNÜ Mosa ki thiyukhüm jihkhi nangde müsühkhitpü jihkhi mihnupung lung Mosa shihcham lakheah.

³⁰Mosanü amujube müdangke khürü tüsho kingaünpung kheak lakhi thiyih khürü lubah Aron le atsührübo tüsho arü khimmihbo kheak rhakkihjih. Hanangde apinü arübo tüsho khimmihbo ATUNGPUH kilim müsühkhit.

³¹Mosanü Aron tüsho atsührübo ki tha, “Shih lude yübah ATUNGPUH shorupung khimyam ripit kinü khiungang, tüsho ATUNGPUHNÜ thiyukhüm jihkhi nangde müsühkhitkhi kingaün muluk ching lakhi yikhap bebah ju chingnü tsühang.

³²Shih thsüthsü yikhap thsüthsü aningkhi a takabahang.

³³Nüsa müsühkhitkhi arüngako rhimobo mübanyichokia, ashorupung khimyam ripit kinü nüsa mutsode nimung thüne mungang.

³⁴Khihni isanü tümü rhimodünü, nüsa neak dünthsükhipü thsungkheaknü ATUNGPUHNÜ isa ki thiyukhüm jih-a rhimoshihkheah.

³⁵Nüsa müshepü thsüde ATUNGPUHNÜ thiyukhüm jihkhibo rhimode ashorupung khimyam ripit ki nüsanü animung tüsho are nimung thüne mungang: tümüde ATUNGPUHNÜ ha I ki thiyukhüm jih.”

³⁶Jumonü Mosa hode ATUNGPUHNÜ thiyukhüm jihkhi nangde Aron tüsho atsührübonü athrünkhi rhimo.