Read Yimchungru Naga Levi 9 Bible Online

Levi 9 - Yimchungru Naga bible

Levi 9

¹Nimung atizheah nipü Mosanü Aron le atsührübo tüsho Israel azothsürübo ji,

²tüsho apinü Aron ki tha, “ Neak kingaün thsungkheak moshipung nunu tüsho taka kingaünpü mihnupung lapha mükihkhibo luang, tüsho ATUNGPUH miki kingaünang.

³Tüsho Israel mihtsürübo ki thaang, ‘ Nüsanü neak kingaünpü mihnupung khülang, tüsho taka kingaünpü kam khülang bankhitkhi moshi nunu tüsho mihnupung lapha mükihkhi luang,

⁴tüsho mungtsü kingaünpü moshipung khülang tüsho mihnupung khülang luang. Arübonü ju müdangke yukkhi hi kingaün lung thsürubah ATUNGPUH kilim shuhmülanga jihbah. Arünü ha rhimobeah tümütüsho khihni ATUNGPUH arü miki akhiukbah.’ ”

⁵Mosanü thiyukhüm jihkhi nangde arünü athrünkhi ashorupung khimyam müngüh handarü, tüsho amukhungrü alala phünide arübah ATUNGPUH miki zhip.

⁶Tüsho Mosanü tha, “Ha nüsanü arhimoshihpü ATUNGPUHNÜ thiyukhüm jihkhi rhimo ah; tüsho ATUNGPUH müretahkhi nüsa ki akhiukbah.”

⁷Tüsho Mosanü Aron ki tha, “ Kingaünpung ki phünide yüliang, tüsho nüsa le mihtsürübo münean dünthsükhipü neak kingaün tüsho taka kingaünkhi jihang. ATU NGPUH NÜ thiyukhüm jihkhi nangde mihtsürübo neak dünthsükhijang.”

⁸Jumonü Aronnü kingaünpung phünide yübahle api neak kingaün thsungkheaknü moshipung nunu laksah.

⁹Api tsührübonü thiyih api kilim handarü, tüsho api yingkhing ju ching thsambahle kingaünpung juhbo kheak rhakkih, tüsho aningkhi thiyih ju kingaünpung jing kheak hiua bah;

¹⁰tüshe ATUNGPUHNÜ Mosa ki thiyukhüm jihkhi nangde, apinü amüdang le amügüebo tüsho amüsan, neak kingaünkhi chingnü lua kingaünpung kheak tak.

¹¹Tüshe apinü ashihtsü tüsho aküp khimyam aleanglimnü takabah.

¹²Apinü taka kingaünpü shiwüh laksah; tüsho atsührübonü athiyih handarü jihbah apinü kingaünpung mükamde hiua bah.

¹³Arünü api kilim aku tüsho akhapthünakkhi shihbo handarü jih, tüsho apinü jurü kingaünpung kheak tak.

¹⁴Tüsho apinü bukningbo le ajingbo müsüh tüsho kingaünpung kheak lakhi taka kingaünbe mi kheak yihkih-a tak.

¹⁵Jushu, apinü mihtsürübo yo kingaün jih. Akhuhbe api neak kingaün jihkhi nangde, apinü mihnu ju mihtsürübo neak dünkheak jihkhi lubahle laksah-a jih.

¹⁶Tüsho apinü taka kingaünpü shiwüh handarübah yakzan yande jih.

¹⁷Judüki apinü müyikhüh lubah hi kingaün handarü, tüsho yapsu shuhmülanga takkhi lung kingaün sadam kheak tak.

¹⁸Apinü mihtsürübo thsungkheak mungtsü kingaün moshipung tüsho mihnupung laksah. Atsührübonü athiyih lubah arü, tüsho apinü kingaünpung mükamde hiukih,

¹⁹tüsho moshipung müdang le mihnupung müdang, amokungro müdang, tüsho bukning muhiukhi müdangmurubo, amügüebo, tüsho amüsan —

²⁰harü arünü akhüh kheak yihkih tüsho amüdang ju kingaünpung kheak tak,

²¹tüshe Mosanü thiyukhüm jihkhi nangde, Aron nü akhühbo le tsülim pho ju ATUNGPUH miki müleamde kingaün.

²²Aronnü api khah mihtsürübo kilim shuhkih tüsho arü müngühjih; tüsho neak kingaün, taka kingaün, tüsho mungtsü kingaün banshu, api akiabah.

²³Mosa tüsho Aron ane ATUNGPUH shorupung yam ching yüzah, tüsho küyimki ane akhiukkheanü anenü mihtsürübo müngühjih, tüsho mihtsürübo ki ATUNGPUH müretahkhi akhiuka huh.

²⁴ATUNGPUH kilimnü mo akhiuk tüsho kingaünpung kheak lakhi taka kingaünkhi tüsho müdangmurubo aniuabah. Küyimki mihtsürübonü ju ngükhea, arü alalanü zhi tüsho arü miro mükhümabah.